Pagpamatuod sa Kamatuoran

¹ Si Jesus miingon: “Tungod niini akong nagpakatawo, ug tungod niini ako mianhi sa kalibotan, aron ako magpamatuod gayod sa kamatuoran.”​—Juan 18:37.

² Pinaagi sa iyang masibotong pagsangyaw, si Jesus nagpasidungog sa ngalan ni Jehova. Iyang gipakita usab ang lunsay nga gugma alang sa katawhan. Misulat si Mateo bahin kang Jesus: “Sa pagkakita niya sa panon sa katawhan siya naluoy kanila, tungod kay sila nangalibog ug nanagsubo sama sa mga karnero nga walay magbalantay.” (Mat. 9:35, 36) Sama kang Jesus, ang atong debosyon kang Jehova ug gugma sa uban magpalihok gayod nato sa pagsangyaw.

ATONG HINUNGDANONG ASAYNMENT

³ Ang atong gugma kang Jehova ug sa katawhan magpalihok kanato sa pagpahimulos sa matag higayon sa pagtudlo sa kamatuoran bahin kang Jehova. (Sal. 96:2, 3; 145:10-13) Apan, ang mga kabalaka sa kinabuhi dali nga magpasimang kanato gikan sa atong buluhatong pagpanaksi. Mao nga atong gikinahanglan nga padayong puntingon ang pagkadinalian sa pagpamatuod sa kamatuoran ug dili magpabalda sa laing mga butang. (Mat. 24:14; 28:19, 20) Ang padayong pagkapuliki maoy usa ka panalipod alang kanato ug mopatunghag malungtarong mga kaayohan ngadto kanilang nagapatalinghog kanato.​—1 Cor. 15:58.

⁴ Ikaw ba makaalagad ingong regular o katabang nga payunir? Nganong dili tagdon ang imong mga kahimtang sa pagtino kon ikaw ba makapadako sa imong pag-alagad niining paagiha? Ikaw ba retirado na gikan sa sekular nga trabaho? Nganong dili gamiton ang imong panahon nga mas bug-os pa sa pagsangyaw? Daghang batan-on sa eskuwelahan ang regular nga nag-oksilyare payunir ug nakakaplag niana nga makapalunhaw sa espirituwal ug pisikal nga paagi.

⁵ Ang epektibong pagpamatuod sa kamatuoran nagakinahanglan ug mabinantayong pag-eskedyol sa atong panahon. (Efe. 5:15, 16) Ang katabang nga pagpayunir nagakinahanglan ug aberids nga duha ka oras lamang sa matag adlaw. Ang uban nagapalabi nga mobangon nga usa ka oras nga abante aron sila makagula sa pagsangyaw sa dili pa moadto sa eskuwelahan o sa trabaho. Daghang kongregasyon nakatabang sa oksilyare nga mga payunir pinaagig paghikay alang sa pagsangyaw sa magabii. Usab, mahimong mapalig-on ka ug makakuhag makatabang nga mga sugyot pinaagig pagpakigsulti sa uban nga maayo ang nahimo sa pag-eskedyol sa ilang panahon aron makaoksilyare payunir.

⁶ Kadtong nagaalagad kang Jehova sa pagkamatinumanon nakadawat ug mga panalangin diha sa dakong kadagaya. Siya malipayon sa pagdawat sa bisan unsa nga itugot sa atong mga kahimtang sa pagbuhat samtang kita nagapamatuod sa kamatuoran.​—Heb. 6:10.