Padayong Magmabungahon Uban ang Paglahutay

¹ Sa misulat ngadto sa kongregasyon sa Colosas, sa hapit 30 ka tuig human sa kamatayon ug pagkabanhaw ni Jesu-Kristo, ang apostol nga si Pablo makaingon nga ang kamatuoran sa maayong balita namunga ug nag-uswag sa tibuok kalibotan. (Col. 1:5, 6) Sa mas pang gidak-on karon, ang mga Saksi ni Jehova kon maohon nakaabot na “sa kinalay-ang bahin sa yuta” pinaagig maayong balita sa Gingharian. (Buh. 1:8; Juan 14:12) Sulod sa 1989 nga tuig sa pag-alagad, dihay 5.6-porsiyentong uswag diha sa aberids nga gidaghanon sa mga magmamantala sa Gingharian sa tibuok-kalibotan, ug atong nakab-ot ang bag-ong kinatas-ang ihap nga 3,787,188 ka magmamantala sa 212 ka kanasoran!

² Sa mga nasod diin ang pagsangyaw bahin sa Gingharian sa Diyos gibando ug ang mga report maoy di-kompleto, diha pa ganiy mas dakong uswag sa 7.6 porsiyento nga gitaho! Bisan pa sa daghang problema nga naglungtad sa maong kayutaan, ang mga magmamantala padayong “nagapamunga uban ang paglahutay.” (Luc. 8:15) Sa pipila ka lugar, ang mga kapit-osan mikunhod, apan ang malisod nga mga kahimtang padayong wala mausab sa ubang kanasoran.

³ Sa mga nasod diin ang mas dakong kagawasan sa pagpadayon sa pagsangyaw-Ginghariang mga kalihokan, ginaatubang ta ang laing mga gumonhap. Nasugamak ang dakong pagkawalay-kaikag ug pagkawalay-pagtagad, ilabina sa lugar nga dagaya ang materyal. Ang mga alagad ni Jehova kinahanglang magmabinantayon nga dili sagopon ang maong mga tinamdan. Dili ta gusto nga ang intereses sa materyal, mga kalingawan, lulinghayaw, ug uban pang kabaldahan makayatak sa atong teokratikanhong mga kalihokan. Basin hinuon kita mahimong di-matinagdanon ug mapakyas sa pagpabili sa panginahanglan sa padayong pagpamunga uban ang paglahutay.​—Luc. 21:34-36.

PAGLAHUTAY UG PANIKAYSIKAY GIKINAHANGLAN

⁴ Ang paglahutay maoy usa ka kinahanglanon kon makasugamak kitag pagsupak sa maayong balita o adunay di-bug-os nga kagawasan sa pagpadayon sa atong Kristohanong mga kaakohan. Sa pipila ka kayutaan, ang atong mga igsoon nanaghago ubos sa malisod nga mga kahimtang sa mga dekada. Ang ilang paglahutay ubos sa maong kalisdanan nagpatunghag inuyonang kahimtang, ug sila karon nagaani na sa dagayang mga panalangin. (Roma 5:3-5; Gal. 6:9) Unsa mang matang sa kalisdanan nga ato kahang masugamak, buot ta nga mopadayon sa paglahutay. Ang pagpamatuod sa Gingharian kinahanglang buhaton, ug ang tanan kanato kinahanglang padayong magpasundayag sa atong integridad. Pinaagig paglahutay sa atong bahin, atong maluwas ang atong kalag, o kinabuhi.​—Mar. 13:10; Luc. 21:19.

⁵ Atong ikapasundayag nga dili ta bastabastahon lang ang espirituwal nga mga butang pinaagig pagpanikaysikay gayod sa buluhaton ni Jehova, nga dili magmaluya sa buluhatong pagsangyaw. Sa ubang kayutaan diin ang transportasyon kulang, ug aduna ing ekonomikanhong mga suliran, wala man ing paghunong sa pagwali sa maayong balita. Sa pipila sa maong kanasoran, ang mga magmamantala sa kongregasyon sa regular nag-aberids ug 14 ngadto sa 17 oras sa pag-alagad sa kanataran sa kada bulan. Ang ilang ranggo sa payunir padayong nagauswag usab. Kini magpahimo kanato nga adunay daghang materyal nga mga kahamugaway sa paghunong ug sa paghunahuna. Ato bang mapauswag ang atong regular nga pakig-ambit sa importante-kaayo nga buluhaton sa pagwali sa Gingharian ug paghimog tinun-an?

ATONG MAHIMO BA ANG DUGANG PA?

⁶ Ang paggugol ug dugang panahon sa pag-alagad sa kanataran hayan nagakinahanglang bag-ohon diyutay ang atong mga eskedyol. Kon ginagugol ta ang usa ka oras sa ministeryo sa kanataran sa Domingo, mahimo kaha nga atong madugangan ang maong panahon pinaagig paggugol ug laing oras sa mga balikduaw o pagdumalag usa ka pagtuon sa Bibliya? O kon kita nagadumalag usa ka pagtuon sa Bibliya, ato bang ikalakip ang usa o mas pang oras sa buluhatong pamalaybalay o sa paghimog pipila ka balikduaw sa dili pa ang pagtuon? Sa Sabado human sa paggugol ug duha ka oras sa buluhatong magasin, tingali atong ikahatod ang mga magasin sa usa ka rota sa magasin nga atong natukod o mosulay sa paghimog pipila ka balikduaw. Kadtong anaa magpuyo sa siyudad basin makakaplag nga kombeniyente sa paggugol ug panahon sa pagsangyaw sa kadalanan. Niini o sa uban pang mga paagi, kita makaarang sa pagpauswag sa atong pakig-ambit diha sa pag-alagad sa kanataran. Ang maayong mga resulta mapauswag gayod nga igoigo.

⁷ Ang dugang panahon diha sa pag-alagad sa kanataran nga nagahimog mga balikduaw sa walay duhaduha moresulta sa dugang mga pagtuon sa Bibliya nga madumala. Ngadtongadto kini magkahulogan sa dugang mga tawo nga makadangat sa kamatuoran ug mobulig kanato sa pagtuman sa buluhatong pagwali sa Gingharian.​—Mat. 28:19, 20.

PAG-AMPO HINUNGDANON

⁸ Kon kita padayon mang magmabungahon uban ang paglahutay, ato gayong huptan ang panalangin ni Jehova ug mosunod sa pagtultol sa iyang espiritu. Kinahanglang atong himoon ang ministeryo nga angay sa pag-ampo ngadto kang Jehova. Sa mag-ampo kang Jehova bahin sa atong buluhaton sa kanataran, kita gipahinumdoman nga kita maoy iyang mga isigkamamumuo. (1 Cor. 3:9) Uban sa tabang ni Jehova, kita makalahutay sa atong ministeryo bisan pa kon dili ta dayon makita ang mga resulta. Sa ubang dapit, ang pag-uswag nakab-ot lang human sa daghang mga tuig sa matinumanong paglahutay sa bahin sa mga magmamantala sa Gingharian. Samtang molantaw kita sa umaabot, gikinahanglan kanunay ang pagpangayo sa balaang giya ug tabang aron dili moundang kondili ang pagtuman sa atong ministeryo sa bug-os pang paagi. (2 Tim. 4:5) Aduna pa gihapon ing dakong bunga nga napatungha diha sa buluhatong pagwali sa Gingharian ug paghimog tinun-an.

⁹ Gipasiugda ni Jesus ang panginahanglan alang kanato sa pag-ampo kanunay. (Luc. 18:1) Si Pablo mitambag: “Pag-ampo nga mapinadayonon.” (1 Tes. 5:17) Adunay dinaliang mga rason alang kanato sa paglahutay diha sa pag-ampo karon. Daghang kaakohan ang nalangkit sa pag-atiman sa nagauswag nga panon sa matag tuig. Gusto tang abagan ang uban nga mamunga uban ang paglahutay. Ang pagtagad kinahanglang ipunting ngadto sa lainlaing mga panginahanglan sa indibiduwal nga mga magmamantala ug sa organisasyon sa katibuk-an. Tungod sa pagsabot sa panginahanglan alang sa mga donasyon sa pagsuportar sa buluhaton ug sa padayong pagpatik sa binase-Bibliya nga literatura nga mahimong posible, buot tang moampo nga si Jehova padayong mopalihok sa mahadlokon-Diyos nga mga tawo nga magmahinatagon niining bahina.​—2 Cor. 9:8-11.

¹⁰ Maingon nga ang mga bahin sa tibuok-kalibotang nataran nabuksan para sa teokratikanhong kaugmaran ngadto sa mas dako pa kay sa sukad-masukad, ang Kasulatanhong tambag sa Colosas 4:2 mahimong mas makahuloganon pa: “Magmalahutayon diha sa pag-ampo, nga nagatukaw niana uban ang pagpasalamat.” Ang atong mga pag-ampo kinahanglang maoy alang sa atong mga igsoon bisan diin nga sila magapadayon sa pagpamunga, nga nagabulig sa ubang mga karnerohon nga nakaplagan diha sa mga teritoryo nga ang pagsangyaw sa miaging panahon nahimong mas lisod.

IPADAYAG ANG PAGKAMAPASALAMATON

¹¹ Pagkamapasalamaton ta sa dagayang espirituwal nga mga tagana nga ato gayong natagamtam! Buot tang magpasalamat kang Jehova niini, ug nagaampo usab kita sa iyang padayong panalangin sa buluhaton sa matinumanong ulipon ug sa Nagamandong Lawas niini. Ang ilang mapainubsanon, padayong mga panlimbasog alang sa atong kaayohan ug sa mga karnerohon sa tibuok kalibotan ginapabilhan gayod kaayo.

¹² Sa pagpugas sa binhi sa Gingharian, ang dakong gidaghanon sa literatura napahimutang. (Mat. 13:3-8, 18-23) Apan, adunay padayong panginahanglan sa mga Bibliya ug mga basahon sa Bibliya diha sa kanataran. Ang report sa kalibotan nagabutyag nga ang dakong pag-ugmad ug pagbisibis pinaagig mga balikduaw ug mga pagtuon sa Bibliya sa balay nahimo na. Samtang kita magapadayon sa pagbuhat sa atong bahin niining importanteng mga bahin sa atong ministeryo, kita nagapasalamat kang Jehova alang sa iyang padayong panalangin nga magapatubo sa mga butang. Sa pagkamatuod, kita nagaampo alang sa maong panalangin.​—1 Cor. 3:6, 7.

UBANG MGA PANGINAHANGLAN

¹³ Tungod kay anaa sa kalibotan bisan tuod dili bahin niana, ang mga Kristohanon padayong magaatubang ug mga pagtental ug mga pagsulay, ug kini mograbe pa niining kataposang mga adlaw. Ang pipila karon nagaantos na sa paglutos o ubang kalisdanan. Ang uban kinahanglang mopadayon sa ilang Kristohanong mga buluhaton diha sa nagusbat-gubat nga kayutaan. Ang atong mga igsoon nakaagom sa mga katalagman sama sa mga linog, mga bagyo, ug mga unos. Sa dihang mahitabo kini, kita gayod magaampo alang sa atong mga igsoon sa maong mga dapit. (Itandi ang Buhat 12:5; 2 Corinto 1:11.) Usahay gikinahanglan nga duolon o sulatan ang mga opisyal sa hataas nga mga katungdanan bahin sa mga bando sa atong buluhaton, paglutos sa atong mga igsoon, o ubang mga butang nga nagaapektar sa intereses sa Gingharian. Ubos sa maong mga hitabo, may buhaton ta kutob sa mahimo sa personal nga paagi, ug kita magaampo mahitungod niining mga tawhana nga sila unta mahimong mauyonon ngadto sa atong mga isigkaalagad.​—1 Tim. 2:1, 2.

¹⁴ Adunay daghang kapit-osan nga napadangat sa mga pamilya nga nagapuyo sa daotang kalibotan ni Satanas. (2 Cor. 4:4) Ang mga magtiayon mahimong giatubang sa seryosong mga suliran. Sila kinahanglang palig-onon nga mag-ampo alang sa balaang giya, ug kita usab makaampo man alang sa ilang kaayohan. (1 Cor. 7:5; 1 Ped. 3:7) Ang mga ulo sa pamilya kinahanglang magpabili nga si Jehova mopatalinghog sa ilang tim-os nga mga pag-ampo alang sa pagtultol diha sa maayong pagdumala sa ilang mga panimalay. (Maghu. 13:8; Filip. 4:6, 7) Ang mga batan-on maingon man ang mga tigulang ginaatubang sa masulayong mga kahimtang. Kini mahimong didto sa eskuwelahan, sa sekular nga trabaho, sa dihang nagabiyahe, o sa ubang mga kahimtang. Ang pag-ampo makatabang kanato sa pagsukol sa espiritu sa daotang kalibotan ug padayong magapamunga samtang kita nagapadayon sa pagbuhat nianang makapahimuot sa panan-aw sa Diyos.​—Mat. 6:13; Efe. 6:13-18; 1 Juan 3:22.

¹⁵ Si Jehova mao ang dakong Tigpatalinghog sa pag-ampo. (Sal. 65:2) Sa tanang panahon gikinahanglang itugyan ang atong mga kabalaka ngadto kaniya. (Sal. 55:22) Aduna kita ing mga kahigayonan sa pagpakita sa atong kabalaka pinaagig pag-ampo alang sa tanang intereses sa Gingharian ug sa kaayohan sa atong mga igsoon bisan asa. Sa dihang palandongon ang buluhaton niadtong nagapanguna sa kongregasyon ug niadtong nagatultol sa programang pagpalapad sa tibuok kalibotan, sa dihang magdumala kanilang masakiton sa espirituwal o sa pag-atiman sa ubang mga gumonhap gagmay man o dagko, ang tanan kanato kinahanglang padayong modala niining mga butanga sa atubangan ni Jehova diha sa pag-ampo. (1 Tes. 5:25; Sant. 5:14-16) Oo, ang atong mga kabalaka kinahanglang itugyan ngadto kang Jehova uban ang bug-os nga pagsalig nga bisan kon unsa kana nga atong gihangyo uyon sa iyang kabubut-on, siya magpatalinghog kanato. (1 Ped. 5:7; 1 Juan 5:14) Hinaot nga kita magmasiboton diha sa buluhaton sa Gingharian ug padayong motutok kang Jehova sa pagtabang kanato sa padayong pagpamunga uban ang paglahutay.