Pagtanyag sa Maayong Balita—Sa mga Adlawng Piyesta Opisyal
1 Bisan tuod adunay paganong mga sinugdanan ang daghang selebrasyon sa Pasko ug Bag-ong Tuig, kapin sa usa ka bilyong nanag-angkong mga Kristohanon ang nagasaulog niini sa kada tuig. Sa unsang paagi atong maabot ang mga kasingkasing sa maong mga tawo uban sa maayong balita sa panahon sa maong piyesta opisyal?
2 Magmatinagdanon ug Matinahoron: Maghimog espesyal nga mga kahikayan ang mga ansiyano para sa pagsangyaw sa adlawng piyesta opisyal, ilabina sa Disyembre 25 ug Enero 1. Samtang magpadayon kita sa atong ministeryo, lagmit nga atong makaplagan ang ubay-ubay sa katawhang puliki gayod sa mga bisita ug mga pangandam sa pagkaon. Tungod kay may konsiderasyon, atong mub-on ang atong mga komento ug ngadto sa punto. Kini hayan magbukas sa dalan alang sa dugang pamatuod sa umaabot.
3 Dili kita makig-ambit sa kalibotanong relihiyosong mga saulog, ug dili kita mogamit sa mga timbaya sa adlawng piyesta opisyal. Busa, ang taktika gikinahanglan kon unsaon ta sa pagsanong sa maong mga timbaya. Walay kinahanglan nga maghimog isyu, kondili sa kasagaran atong mapasalamatan lamang ang tagbalay sa iyang maayong mga panghinaot. Kon mangutana ang mga tawo sa atong gituohan, atong mapasaligan sila nga kita nagapasidungog kang Kristo Jesus, sanglit kay kana gikinahanglan man niadtong nagapasidungog sa Diyos. (Juan 5:23) Kon buot ang mga tawo ug dugang impormasyon sa maong panahon o sa ulahi niana, atong ikapaambit uban kanila ang materyal diha sa librong Nangatarongan sa mga panid 32-34 ug 36 (mga panid 176-8 ug 180 sa Ingles).
4 Mga Pasiuna: Mahimong makaplagan ta nga ang mga tawo mas hilig sa pagpakigsulti bahin sa Diyos niining panahona sa tuig. Atong mapahimuslan kini diha sa atong introduksiyon. Pananglitan, kita makaingon: “Sulod niining panahona sa Pasko, sagad atong madungog ang mga tawo nga mopatugbaw ug paglaom nga adunay kalinaw ibabaw sa yuta ug maayong kabubut-on ngadto sa mga tawo. Sa hunahuna mo ang kalinaw patunghaon ba sa Diyos nganhi sa yuta sa atong panahon?” Human niana atong ikapadayon ang pagpakita nga si Jesu-Kristo mao ang gitagnang “Prinsipe sa Pakigdait.” (Isa. 9:6, 7) Ingong tinudlong Magmamando sa kagamhanan sa Diyos, si Kristo sa dili madugay molihok sa pagpatunghag dumalayong kalinaw nganhi sa yuta.—Dan. 2:44; Pin. 21:3-5.
5 Bisan tuod ang kadaghanan sa mga tawo walay lahay sa mensahe sa Gingharian ug nagakalipay diha sa bakak relihiyosong mga adlawng piyesta opisyal, si Jehova tinuod gayod nga magpanalangin sa atong mga panlimbasog sa pagpangita sa mga nagapangita sa kamatuoran ug siya motultol kanila ngadto sa iyang kapunongan.—Juan 4:23, 24.