Magmabug-os-Kalag sa Ministeryo sa Kanataran
Bahin 1—Ang Bili sa Pagpabili Kang Jehova
1 Ang pagkahimong bug-os kalag diha sa ministeryo nagsumikad sa lalom nga pagpabili kang Jehova ug sa tanang iyang nabuhat alang kanato. (2 Sam. 22:2, 3) Ang kabalaka alang sa mga tawo angay usab motukmod kanato sa pagpaningkamot sa atong kaugalingon diha sa pag-alagad. (Mat. 9:36; 2 Cor. 5:14, 15) Kon mas debotado kita ngadto kang Jehova ug mas nabalaka sa mga tawo, mas mapalihok kitang makig-ambit nga mainiton diha sa pag-alagad sa kanataran. (Mat. 22:37-39) Nan ang atong ministeryo mahimong usa ka bahandi nga gipabilhan. (2 Cor. 4:7) Apan sa unsang paagi kana nga pagpabili maugmad?
MGA YAWI SA PAGTUKOD UG PAGPABILI
2 Ang pagtuon sa Bibliya nga personal ug sa kongregasyon duyog sa pagpamalandong motabang kanato sa pag-ugmad ug usa ka personal nga relasyon uban kang Jehova. Gisunod ba nimo ang eskedyol alang sa senemanang pagbasa sa Bibliya? Ikaw ba sa regular nagatuon sa mga publikasyon sa Sosyedad? Ikaw ba nagapangandam, nagatambong, ug nagapakig-ambit sa tanang mga tigom sa kongregasyon? (Heb. 10:24, 25) Ang pagpamalandong motukod usab ug pagpabili sa kasingkasing dapig kang Jehova ug sa iyang pagsimba.—Sal. 27:4.
3 Ang laing paagi sa pagpauswag sa atong pagpabili maoy pinaagi sa pagtagad sa panig-ingnan sa ubang bug-os-kalag nga mga ministro. Si Jeremias giut-ot sa kasibot alang sa buluhatong gisalig kaniya. (Jer. 20:9) Si Jesus nagpakitag usa ka maayong sumbanan sa kadasig. (Juan 4:34) Si Pablo nagpasalamat sa diyosnong kaluoy nga gipakita kaniya. (1 Tim. 1:12, 13, 17) Samtang atong gipalandong kini nga mga panig-ingnan, atong matukod ang pagpabili alang sa ministeryo.
4 Dihang atong makat-onan ang katahom sa kahalangdon ni Jehova ug kabalaka sa atong kaugalingon uban sa iyang katingalahang mga buhat, kita maagda sa pagdayeg kaniya nga malipayon. (Sal. 145:5-7) Atong ipakita nga atong gibahandi ang atong mga kahigayonan sa pagpamatuod sa balaang ngalan pinaagi sa pagpangitag mga paagi sa pagpakaylap sa mensahe sa Gingharian.—Luc. 6:45.
5 Apan aduna bay lain pang mga butang nga modasig sa atong tibuok-kalag nga pagpakig-ambit diha sa ministeryo? Kon aduna, unsa man kini? Sa unsang paagi makatabang ang mga ansiyano, ministeryal nga mga alagad, mga payunir, ug ubang may kasinatiang mga magmamantala? Unsang bahin ang gidula sa mga tumong sa pag-ugmad sa kadasig? Kini nga mga pangutana ug uban pa matubag niining limag-bahin nga serye, nga ipadayon sa mosunod nga mga isyu sa Atong Ministeryo sa Gingharian.