Dumalaha sa Kahanas ang Pulong sa Kamatuoran
1 Ang atong kahanas sa paggamit sa Pulong sa Diyos makaapektar sa paagi sa pagsanong sa katawhan sa atong mensahe. Busa, si Pablo miingon: “Buhata ang imong maarangan sa pagtanyag sa imong kaugalingon ingong inuyonan sa Diyos, usa ka magbubuhat nga walay bisan unsa mang igakaulaw, nga nagadumala sa pulong sa kamatuoran sa hustong paagi.”—2 Tim. 2:15.
2 Ang kahanas sa paggamit sa Bibliya kinahanglang ugmaron. Ang personal nga pagtuon ug pagtambong sa tigom maoy mahinungdanon. Hinuon, kinahanglang ipadapat nato kon unsay atong makat-onan pinaagi sa makanunayong paggamit sa Bibliya diha sa ministeryo. Gikinahanglan usab natong pangayoon ang tabang sa Diyos ug paggiya.—1 Juan 3:22.
3 Ipunting sa Pulong sa Diyos: Maoy mahinungdanon nga maamgohan sa katawhan nga ang mensahe nga atong gidala dili atoa apan nagagikan sa sinulat nga Pulong sa Diyos. (Juan 7:18) Ang pagpakita sa tawo kon unsay giingon sa Diyos diha sa Bibliya adunay dakong sangpotanan. Ang matarong-kasingkasing nga katawhan mabutad ngadto sa gamhanang mensahe sa Bibliya.
4 Kadaghanan sa mga tawo dili sinati sa Bibliya. Sa dihang magagamit niini, kinahanglang magabuhat kitag labaw pa kay sa pagbasa lamang sa mga teksto. Kinahanglan natong hunahunaon kon unsaon pagpaila ang usa ka kasulatan. Ang mga pangutana o suliran magamit sa pagpukaw sa interes. Usab, human nga mabasa ang kasulatan, gikinahanglan natong ipasiugda pag-usab ang yawing mga pulong ug ipadapat kini aron ang mga ideya mapatidlom.—Tan-awang Giya sa Tunghaan, mga tun-anan 24 ug 25.
5 Ang Tanyag: Sa Disyembre itanyag ta sa interesadong katawhan ang New World Translation of the Holy Scriptures uban sa Ang Bibliya—Pulong sa Diyos o sa Tawo? Sa unsang paagi maduol ta ang mga tawo uban niining tanyaga? Human nga ikapaila ang kaugalingon makaingon ta: “Karong adlawa, daghan ang milantaw sa lainlaing mga indibiduwal o mga basahon alang sa paggiya. Unsa may imong gibating labing maayong tinubdan sa mapuslanon nga paggiya? [Tugoting motubag.] Tagda ang giingon sa Bibliya bahin sa matuod nga tinubdan sa kaalam. [Basahang Proverbio 2:6, 7.] Ang tawhanong kaalam napamatud-ang kulang gayod. Ang kaalam sa Diyos, hinunoa, napamatud-an kanunay nga kasaligan ug mapuslanon. [Basahang Isaias 48:17, 18.] Busa, kinahanglang motutok ta sa Diyos, kinsa nagataganag paggiya sa pagbuntog sa atong mga suliran.” Dayon mapakli nato ang kapitulo 12 sa librong Pulong sa Diyos ug basahon ang parapo 2.
6 Human sa paggamit sa Proverbio 2:6, 7 aron pagpatugbaw sa kaalam sa Diyos, ipaila ang New World Translation ug ipatin-aw sa tagbalay kon nganong gitahod ug gimahal mo ang Bibliya. Ipahibalo kaniya nga ang pagtulon-an niini magatagana kaniyag solidong paglaom sa umaabot. May kahigayonan ka usab sa pagpunting sa pipila ka maalamong tambag sa Bibliya sa matag adlaw nga mga suliran, nga mahimong motultol ngadto sa usa ka pagtuon sa Bibliya.
7 Si Jesus kanunayng mitumong sa mga Kasulatan sa pagbulig sa mga mabuot-kasingkasing ug pagsumpo sa iyang mga magsusupak. Maoy batasan ni Pablo ang ‘pagpatin-aw ug pagpamatuod pinaagig mga reperensiya’ sa mga butang nga iyang gitudlo. (Buh. 17:2, 3) Ang atong pagsalig ug kalipay diha sa ministeryo magauswag samtang matinguhaon tang manlimbasog nga mahimong labi pang mahanason sa pagdumala sa Pulong sa kamatuoran.