Pag-atubang sa Hagit sa Ministeryo
1 Ang pagpamalaybalay naghatag ug tinuod nga hagit ngadto sa daghang misagop sa putling pagsimba. Apan ang tiunay nga gugma kang Jehova moabag sa usa ka tawo nga atubangon kini nga hagit ug daghan nga sa kinaiya maulawon ang miuswag pa gani ngadto sa pagkahimong bug-os-panahong mga magwawali.
2 Maoy tin-aw gikan sa Bibliya nga ang sayong mga Kristohanon nagsangyaw sa Gingharian sa pamalaybalay. (Buh. 5:42; 20:20, 21) Gibuhat nato ang sama niana karong adlawa bisan kon tingali atong maatubang ang kawalay-pagtagad, kahasol, o deretsong pagsupak.
3 Kon Unsay Mapalampos sa Pag-atubang sa Hagit: Sa matag panahon nga kita moduaw, atong mapugas ang pipila ka binhi sa kamatuoran, nga nahibalo nga ang uban sa ngadtongadto mamunga. (Eccl. 11:6) Ang indibiduwal nga kahimtang mabag-o, nga hayan magpahunahuna sa tagbalay maylabot sa gikabutyag sa usa kanato ug mahimong mas madinawaton sa sunod nga panahon sa atong pagduaw.
4 Ang atong ministeryo nagahatag ug kahigayonan ngadto kanilang may hilig sa pagkamatarong sa pagkat-on bahin kang Jehova. Kini mahigugmaong nagapasidaan niadtong nagapangagpas sa kalibotanong kalipayan nga kinahanglan silang magbag-o aron makabaton sa pag-ayon sa Diyos. Kini usab nagapaila sa ngalan ni Jehova ug nagapasidungog kaniya, maminaw man o dili ang mga tagbalay.—Ezeq. 3:11.
5 Ang pagbuhat diha sa ministeryo mobulig usab kanato nga maugmad ang mga bunga sa espiritu. (Gal. 5:22) Kini nagatabang kanato nga mahimong mapainubsanon ug mabination. Ang pagkapuliki kanunay diha sa buluhaton ni Jehova nagpanalipod kanato gikan sa kalibotan.—1 Cor. 15:58.
6 Samtang kita mamalaybalay, kita aduna ing pribilehiyo sa paghawas sa atong Diyos, si Jehova. Unsa pay mas labaw nga dungog ang mabatonan ni bisan kinsa kay sa pagkahimong isigkamagbubuhat sa Diyos? (1 Cor. 3:9) Kon kita mosalig kaniya, ang iyang espiritu motabang kanato nga atubangon ang hagit sa pamalaybalay nga ministeryo.