Mga Batan-on Nagakinahanglag Maayong Panig-ingnan
1 Nagakalipay kita nga uban kanato ang nagauswag nga gidaghanon sa mga batan-on kinsa ‘nagadayeg sa ngalan ni Jehova.’ (Sal. 148:12, 13) Daghan kanila maoy mga bata pa sa edad. Ang ilang pag-uswag dugang matino pinaagig pagbansay ug panig-ingnan sa ilang mga ginikanan ug sa ubang mga hamtong diha sa kongregasyon. Dili laktawan, hinuon, mao ang impluwensiya nga ginahimo sa ubang mga batan-on, ilabina sa huhingkod nang mga tin-edger. Kon ikaw ania niining hugponga sa pangidaron, kining mga komentoha hayan makabenepisyo kanimo.
2 Ang mga batan-on nga wala pa sa ilang pagkatin-edger mahilig sa pagsundog sa huhingkod nang mga tin-edger. Aduna sila ing kinaiyanhong tinguha nga magustohan nga masuod nga mga kabarkada niadtong ilang ginasumitehan. Mahilig sila sa paglantaw ngadto sa mga batan-on nga maorag huhingkod na ug kinsa daw mas utokan. Ingong resulta, sila mahimong mosundog sa imong sinultihan ug panggawi maingon man sa imong apresasyon ug mga pagpabili sa espirituwal.
3 Ingong usa ka huhingkod nga tin-edger, ikaw aduna ing mabug-at nga responsabilidad. Karon dayon, ang imong ehemplo lagmit nagaimpluwensiya sa imong mas batan-ong mga kaubanan. Suknaang kaugalingon, ‘Unsang matang sa impluwensiya nga akong gipasunod sa mga mas batan-on? Ako ba maugdang-hunahuna, nga nagalikay sa binuang ug “mga tinguha nga iya sa pagkabatan-on”? Ako ba nagapakitag pagkamasinundanon ug pagkamatinahoron ngadto sa akong mga ginikanan, sa mga ansiyano, ug sa uban?’ (2 Tim. 2:22; Col. 3:20) Kon unsa ang imong ginasulti ug ginabuhat mahimong dakog impluwensiya sa espirituwal nga tingusbawan sa ubang mas batan-on nga nagapaniid kanimo.
4 Ang imong regular nga pakig-ambit sa pagsangyaw sa maayong balita makapalig-on man sa imong mga kaubanan nga mas pang magmaaktibo. Kon ikaw makaarang sa pagsulod sa payunir nga pag-alagad, ang imong mga higala mapalihok sa samang paagi. Ang pagkomento diha sa mga tigom ug sa pagboluntaryo sa pagbuhat sa gikinahanglang mga buluhaton diha sa Kingdom Hall hayan usab magpahimutang ug maayong panig-ingnan.
5 Kamong mga tin-edger makapadapat man sa mosunod nga tambag ngadto kang Timoteo: “Mahimong panig-ingnan ngadto sa mga matinuohon diha sa pamulong, sa panggawi, sa gugma, sa pagtuo, sa kaputli.” (1 Tim. 4:12) Ang inyong masibotong pakig-ambit sa pag-alagad kang Jehova makapalihok sa mas batan-ong mga tigpaniid diha sa positibong paagi, nga nagatabang kanila sa pag-uswag ngadto sa pagkahimong bug-os-hamtong nga mga tawo sa espirituwal nga paagi. (Efe. 4:13) Ang mga tin-edger kansang mga pamilya bag-o pa lang magsugod sa pagtuon hayan madani ngadto sa kamatuoran pinaagi sa inyong panig-ingnan.
6 Nga mas pang importante, ang imong pagpasundayag sa diyosnong mga hiyas magpasidungog kang Jehova ug sa iyang kapunongan. (Prov. 27:11) Ang sinserong mga tigpaniid mahibulong sa kalainan tali kanimo ug sa mga batan-on sa kalibotan. Busa aduna ka ing talagsaong kahigayonan sa pagtabang sa mga mas batan-on samtang ikaw nagahimog bililhong amot ngadto sa kadayegan ni Jehova.—Sal. 71:17.