Itanyag ang mga Magasin sa Matag Okasyon
1 Kita adunay maayong rason nga pabilhan Ang Bantayanang Torre ug Pagmata! Niining bulana ang mga magasin igapatugbaw sa atong pagsangyaw nga buluhaton, ug pagkakusganong impormasyon ang anaa sa mga gula sa Oktubre! Busa, gusto nato nga mahimong andam sa pagtanyag sa matag tukmang okasyon.
2 Sa dihang itanyag ang Oktubre 1 “Bantayanang Torre,” mahimong makapukaw ka sa interes sa artikulong “Usa ka Kalibotan nga Walay Gubat—Kanus-a?” pinaagi sa pag-ingon:
◼ “Daghang tawo nahibulong kon nganong ang usa ka kalibotan nga walay gubat daw dili makab-ot. Unsa ang imong hunahuna niining mga pulonga sa panid 5 sa Oktubre 1 nga Bantayanang Torre? [Basaha ang unang tudling-pulong sa unang duha ka parapo ilalom sa ulohang “Relihiyon—Usa ka Dakong Babag,” ug tugoting motubag.] Siyempre, kini wala magkahulogan nga kanunay na lang adunay mga gubat. Matikdi ang saad sa Diyos dinhi sa Isaias 9:6, 7.” Itanyag ang mga magasin.
3 Sa dihang ipresentar ang Oktubre 22 nga “Pagmata!” ikaw makaingon:
◼ “Unsa ang imong hunahuna bahin sa pangutana sa hapin niining magasina: ‘Nganong Mubo Kaayo ang Kinabuhi?’ [Tugoting motubag.] Kining serye sa mga artikulo nagatagad kon unsay ikasulti sa modernong mga siyentipiko ug uban pa bahin sa pagkatigulang, ug dayon kini nagapunting kon unsa ang gisaad sa atong Maglalalang bahin sa kahigayonan alang sa kinabuhing walay kataposan.” Itanyag ang mga magasin.
4 Sa dihang makaplagan nimo ang mga tawo nga may hilig sa relihiyon, nganong dili ipatugbaw ang usa ka artikulo gikan sa Oktubre 15 “Bantayanang Torre”? Kining presentasyona mahimong makaaghat ug paborableng pagsanong:
◼ “Gusto nakog makuha ang imong opinyon niining pangutanaha: Posible ba nga higugmaon ang Diyos ug kahadlokan siya sa samang higayon?” Tugoting motubag, ug unya basaha ang sukaranang teksto diha sa artikulong “Nganong Kahadlokan ang Matuod nga Diyos Karon?” (Eccl. 12:13) Itanyag ang magasin.
5 Sa dihang nagakobre sa balay ngadto sa balay, ayawg laktawi ang gagmayng mga tindahan. Sila nga regular nga nagaduaw sa mga tindahan nagabatbat niining buluhatona nga makalilipay ug mabungahon. Imong masulayan ang usa ka yanong presentasyon sama niini sa dihang magatanyag sa Oktubre 8 nga “Pagmata!”:
◼ “Kami nahibalo nga ang mga negosyante nagapabili nga kanunayng nunot-sa-panahon sa mga isyu nga nagalangkit sa ilang komunidad. Nakaseguro ako nga kining artikuloha makapainteres kanimo.” Unya sa mubo ipaambit ang usa ka puntos gikan sa artikulong “Usag-Ginikanang mga Pamilya—Mahimong Unsa ka Malamposon Sila?”
6 Kon ang tawo nga imong giduol tinuod nga puliki, mahimong imong ikapakita ang mga magasin ug moingon:
◼ “Ako nahibalo nga wala ka magdahom ug usa ka bisita karong adlawa, busa dili ra ako magdugay. Gusto nakong matagaan ka sa kahigayonan nga makabasag usa ka butang nga hinungdanon.” Ipunting ang usa ka artikulo nga imong napilian, ug itanyag ang mga magasin.
7 Hupting maampingon ang house-to-house record, ug baliki ang tanang napahimutangan. Kon ang sinserong interes makaplagan sa pagbalikduaw, itanyag ang suskrisyon sa usa o duha sa mga magasin. Magmaandam kita ug magmaalisto sa pagtanyag sa atong mga magasin sa tanang nahiangay nga okasyon.