Ipadayag ang Imong Pag-uswag
1 Hinumdomi ang panahon sa dihang una nimong nadunggan ang mensahe sa Gingharian. Ang yanong mga kamatuoran nagdasig sa imong tinguha alang sa kahibalo. Wala madugay imong nakita ang panginahanglan sa paghimog mga pagpasibo sa imong kinabuhi aron makab-ot ang taas nga mga sukdanan ni Jehova. (Isa. 55:8, 9) Miuswag ka, nagpahinungod sa imong kinabuhi, ug nabawtismohan.
2 Bisan human makahimog pipila ka pag-uswag, aduna gihapoy mga kahuyangan nga kinahanglang buntogon. (Roma 12:2) Basin ikaw adunay kahadlok sa tawo, nga nagpaduhaduha nimo sa pagpakig-ambit sa pag-alagad sa kanataran. O tingali nakulangan ka sa pagpasundayag sa bunga sa espiritu sa Diyos. Apan determinado ka sa pag-uswag pinaagig paghimog teokratikanhong mga tumong sa imong kaugalingon.
3 Pipila ka katuigan na tingali karon ang milabay sukad imong gihimo ang pagpahinungod. Sa pagsubli, unsang pag-uswag ang imong nahimo? Imo bang nakab-ot ang pipila sa imong mga tumong? Anaa pa ba kanimo ang samang kadasig nga imong “nabatonan sa sinugdan”? (Heb. 3:14) Usa na ka hamtong nga Kristohanon si Timoteo sa dihang giawhag siya ni Pablo: “Hinuktoki kining mga butanga; magpatuhop diha niini, aron ang imong pag-uswag madayag sa tanan nga mga tawo.”—1 Tim. 4:15.
4 Personal nga Pagsusi Gikinahanglan: Sa dihang atong hinuktokan ang atong nangaging panglihok, anaa pa ba kanato ang pipila sa mga kahuyangan sa dihang kita misugod? Napakyas ba kita sa pagkab-ot sa pipila sa mga tumong nga atong gipahiluna? Kon mao, ngano man? Bisan tuod maayo ang atong mga intensiyon, tingali kita naglangaylangay. Hayan atong gitugotan ang mga kabalaka sa kinabuhi nga mopugong kanato.—Luc. 17:28-30.
5 Bisan dili na nato mabag-o ang nangagi, seguradong aduna pa kitay mahimo sa umaabot. Matino nato kon diin kita nagkulang, ug dayon maningkamot pag-ayo aron mouswag. Tingali kinahanglan natong pauswagon ang pagpasundayag sa mga bunga sa espiritu sa Diyos, sama sa pagpugong-sa-kaugalingon o pagkamainantoson. (Gal. 5:22, 23) Kon gilisdan kita sa pagpakigtambayayong sa mga ansiyano, kinahanglang ugmaron nato ang pagkamapainubsanon ug pagpaubos sa hunahuna.—Filip. 2:2, 3.
6 Mapadayag ba nato ang atong pag-uswag pinaagig pagpangab-ot sa mga pribilehiyo sa pag-alagad? Pinaagig ekstrang paningkamot ang mga igsoong lalaki mamahimong takos ingong ministeryal nga mga alagad o mga ansiyano. Daghan kanato basin makaarang sa pagpatala ingon nga mga regular o katabang payunir. Ang uban makapaningkamot sa pagpauswag sa personal nga mga batasan sa pagtuon o dugang pagpakig-ambit diha sa mga tigom sa kongregasyon.
7 Kana, siyempre, hukman sa matag usa kanato kon diin kita angay mohimog pag-uswag. Makapaneguro kitang ang atong sinserong panikaysikay nga ‘mouswag ngadto sa pagkahamtong’ makaamot ug dako sa atong kalipay.—Heb. 6:1.