Sulti Uban ang Kaisog

¹ Sulod sa di pa dugayng katuigan ang mga magmamantala sa pipila ka dapit nakakaplag nga nagakalisod ang pagsulti ngadto sa katawhan didto sa ilang balay. Daghan ang nagtaho nga sa ilang teritoryo kapin sa 50 porsiento sa mga tawo wala sa balay sa gihimo ang mga duaw sa pamalaybalay.

² Sa mga tuig nga miagi daghang katawhan ang nakaplagan nga anaa sa balay sa Dominggo, nga giisip ingong adlaw sa pahulay. Ang mga kustom­bre nausab. Maoy komon karong adlawa para sa mga tawo sa pagtrabaho sa sekular nga mga trabaho, pag-atiman sa mga panginahanglan sa pamilya sama sa pagpamalit, o pagkalangkit sa lulinghayaw, nga magpahilayo kanila sa balay. Busa bisan sa mga Dominggo, ang pagkontak sa mga tawo sa pamalaybalay nahimong usa ka gumonhap.

³ Tungod kay ang atong tumong maoy pagpakigsulti sa katawhan, nganong di makigsulti ngadto kanilang atong mahibalag​—diha sa dalan, sa merkadohan, o sa trabahoanan. Maoy batasan ni Pablo ang pagduol “kanilang nahitabong atua didto” aron mohatag kanilag pamatuod. (Buh. 17:17) Kini sa gihapon usa ka epektibong paagi sa pagpamatuod sa atong adlaw.

⁴ Sa dihang mamalaybalay kita, sagad atong makita ang mga tawong sa kasuwal nagalakaw o tingali adunay ginahulat. Sa maanindot nga adlaw, basin sila nagalingkod sa lingkoranan sa parke o nagatrabaho o nagahugas sa ilang kotse. Ang usa ka sinilingan nga pahiyom ug mahigalaong timbaya hayan mao ra ang atong gikinahanglan aron makasugod ug panaghisgot. Kon duol ra ang ilang gipuy-an, kita makahisgot nga lagmit sila nasayloan lamang sa ilang balay ug karon kita malipayon nga ania niining higayona aron sa pagpakigsulti kanila. Pinaagig pagpakitag diyutay pang kaisog, daghan ang nakatagamtam ug magantihong mga kasinatian.

⁵ Kaisog Adunay mga Resulta: Miasoy ang usa ka igsoong lalaki nga siya nagaduol sa mga tawo nga nagabarog, nagahulat ug bus, nagasuroysuroy, o nagalingkod sa ilang kotse. Uban sa mahigalaong pahiyom ug malipayong tingog, siya nagalihok nga samag mahigalaong silingan kinsa gusto lamang makig-estorya. Niining paagiha siya nakapahimutag daghang basahon ug nakasugod usab ug pipila ka pagtuon sa Bibliya.

⁶ Ang laing igsoong lalaki ug iyang asawa namalaybalay sa dihang ilang nahibalag ang usa ka babaye nga naglakaw dala ang dakong bag sa pinalit nga mga makaon. Gisugdan nila ang usa ka panaghisgot, nagdayeg kaniya sa pagtagana sa mga panginahanglan sa iyang pamilya. “Apan kinsa,” sila misukna, “ang makasuplay sa mga panginahanglan sa katawhan?” Kana nag­pahaling sa interes sa maong babaye. Ang mubong panaghisgot mihatod sa pagdapit ngadto sa iyang balay, diin ang usa ka pagtuon sa Bibliya nasugdan.

⁷ Busa sa sunod panahon nga ikaw magasangyaw sa pamalaybalay, kana man sa Dominggo o sa bisan unsang ubang adlaw, ug makaplagan mo nga ang mga tawo wala sa balay, nganong di maghimog diyutay pang kaisog ug makigsulti sa mga tawo nga imong mahibalag​—diha sa kalsada o bisan asa? (1 Tes. 2:2) Ikaw hayan makabatog mas mabungahong ministeryo, ug makahupot ug mas dakong kalipay gikan sa imong pag-alagad.