Pagsulti sa Pulong sa Diyos Uban ang Kaisog
1 Sa unsang paagi maapektahan ka sa dihang makasugamak ug pagsupak? Determinado ka ba sa pagpadayon bisan pa kon unsay isulti o buhaton sa mga magsusupak? Kitang tanan makabenepisyo gikan sa ehemplo nila ni Pablo ug Silas. Wala nila tugoti ang paglutos sa pagpaluya o pagpahilom kanila. Si Pablo misulat: “Human kami unang nag-antos ug gidagmalan . . . , kami nagbaton ug kaisog pinaagi sa atong Diyos sa pagsulti nganha kaninyo sa maayong balita.” (1 Tes. 2:2) Uban sa tabang ni Jehova, kita usab makapakitag kaisog ug mogulang madaogon atubangan sa pagsupak.
2 Si Jehova mao ang atong salipdanan sa panahon sa kasamok. Ngadto kaniya nga kita mapainubsanong mangaliya sa panabang. (Sal. 18:2, 3) Ang atong mga igsoon sa unang siglo nangamuyo kang Jehova sa pagbulig kanilang ‘padayong mosulti sa iyang pulong uban ang kaisog gayod.’ (Buh. 4:29) Si Jehova misanong pinaagig pagpuno kanila sa balaang espiritu. Iyang buhaton ang sama niana alang kanato.—Buh. 4:31.
PAGSAKMIT SA KAHIGAYONAN SA PAGSULTI
3 Diha sa matag kongregasyon, ang mga tigom sa dayon na nga pagsangyaw gihikay aron hisgotan ang espirituwal nga mga butang sa dili pa moadto sa teritoryo. Ikaw ba nagasuportar niini sa dihang posible? Kon mao, ikaw mapalig-on samtang manlimbasog ka sa paglig-on sa uban. Samtang anaa sa pag-alagad sa kanataran, ang mga payunir ug ubang bansay nga mga magmamantala makahimo sa pagbulig ug paglig-on sa uban samtang sila nagapamalaybalay. Pinaagig pagpadapat sa mga sugyot gikan sa basahong Nangatarongan, ang tanan masangkapan nga mas pa sa pagsulti uban ang hugot nga pagtuo.
4 Sa ubang mga dapit, ang mga tawo wala diha sa balay sa maadlaw. Ang lainlaing mga paagi hayan gamiton sa pag-abot niining mga tawhana. Ang pipilang magmamantala magsangyaw sa kadalanan duol sa hunonganan sa bus o sa mga dapit nga daghang tawong mopaingon sa trabaho o mopauli na. Ang uban makigsulti sa mga tawo nga anaa sa nagparking nga mga kotse. Sa usa ka lugar duha ka sister nga nagsangyaw niining paagiha nakapahilunag kapin sa 50 ka magasin nga wala pa ing usa ka oras.
5 Sa dihang ikapahimutang ang mga basahon sa katawhan sa publikong mga dapit, basin makuha mo ang ilang adres sa balay ug hikayon ang balikduaw ug hayan ang usa ka pagtuon sa Bibliya. Nagakinahanglan ug kaisog sa pagduol sa mga dili kaila ug makigsulti kanila, apan ang mga resulta maoy magantihon. Sama sa mga apostol, gikinahanglang mosulti uban ang “kaisog pinaagig awtoridad ni Jehova.”—Buh. 14:3.
IPRESENTAR ANG TANYAG UBAN ANG KAISOG
6 Sa Agosto ang tanyag sa basahon mao ang ‘brochure’ nga Kagamhanan sa amot nga ₱4.20. Kini nga brochure maoy tukmang itanyag ngadto sa mga tawo sa tanang kahigayonan ug among giawhag kamo sa pagdalag suplay sa tanang panahon, bisan kon nagapamalit o nagatrabaho sa sekular nga trabaho. Magmaalisto sa pagtanyag sa ‘brochure’ ngadto kanilang imong kaila, nga nagabuhat niana uban ang kaisog, sanglit ikaw nahibalo man nga kini makaabag kanila sa pagkakat-on nga mas pa bahin sa Gingharian.
7 Sa gidapit si Pablo nga mahimong sumusunod ni Jesus, siya misanong uban ang kasibot ug misangyaw uban ang kaisog. (Buhat 9:5, 15, 16, 20, 27, 28) Siya mipadayon nga matinumanon niining dalana hangtod sa kamatayon. Atong pagasundon ang iyang panig-ingnan ug mopadayon sa pagsulti sa Pulong sa Diyos uban ang kaisog.