Padayong Isangyaw ang Pulong sa Diyos Uban ang Kaisog
1 Ingong Kristohanong mga ministro, nahibalo kita nga dili tanan mamati sa dihang kita mosangyaw. (Mat. 10:14) Bisan pa niana, dili kita mohunong sa pagsangyaw sa maayong balita tungod lang sa negatibong sanong sa pipila ka tawo. (Prov. 29:25) Unsay makatabang kanato sa pagsangyaw kanunay sa pulong sa Diyos uban ang kaisog?
2 Nasabtan ni apostol Pablo ang “pagkalabaw ug bili sa kahibalo ni Kristo Jesus.” Kini nagtukmod kaniya sa pagsangyaw nga may “hugot nga pagtuo.” (Filip. 3:8; 1 Tes. 1:5) Bisan tuod ang pipila nag-isip sa mensahe nga iyang gisangyaw ingong way-kapuslanan ug binuang, siya nahibalo nga kini ang “gahom sa Diyos alang sa kaluwasan sa matag usa nga may pagtuo.” (Roma 1:16) Busa, bisan nag-atubang ug pagsupak, siya padayong “nagsulti uban ang kaisog pinaagi sa awtoridad ni Jehova.”—Buh. 14:1-7; 20:18-21, 24.
3 Ang Atong Tuboran sa Kusog: Dili pinaagi sa kaugalingon niyang kusog nga si Pablo nakahimo sa pagsangyaw nga maisogon. Nga nagsulti bahin sa iyang kaugalingon ug kang Silas, si Pablo misulat: “Human kami mag-antos una ug gipasipalahan . . . sa Filipos, kami nakabaton ug kaisog pinaagi sa atong Diyos nga isulti kaninyo ang maayong balita sa Diyos uban ang hilabihang pakigbisog.” (1 Tes. 2:2; Buh. 16:12, 37) Dugang pa, samtang nabilanggo sa Roma, mihangyo si Pablo nga iampo unta siya sa uban aron makapadayon siya sa pagsangyaw sa maayong balita ‘uban ang kaisog sa paagi nga angay niyang isulti kini.’ (Efe. 6:18-20) Pinaagi sa pagsalig kang Jehova imbes sa iyang kaugalingon, si Pablo nakaarang sa pagpadayon sa pagsangyaw sa pulong sa Diyos uban ang kaisog.—2 Cor. 4:7; Filip. 4:13.
4 Tinuod usab kana karon. Usa ka igsoong lalaki nga nalisdan sa pagpaila sa iyang kaugalingon diha sa iyang gitrabahoan ingong usa sa mga Saksi ni Jehova ug sa pagsangyaw sa di-pormal nga paagi miampo bahin niining butanga ug misugod sa pagsangyaw. Sa sinugdan, wala dawata sa usa ka isigkatrabahante ang iyang mga paningkamot, apan ang paghisgot niya bahin sa paglaom sa pagkabanhaw mitultol ngadto sa pagtuon sa Bibliya. Sukad niadto, gipahimuslan na sa maong igsoon ang tanang kahigayonan sa pagsangyaw. Sa iyang sunod nga gitrabahoan, nakatabang siyag 34 ka tawo nga mabawtismohan sulod sa yugto nga 14 ka tuig. Makasalig kita nga si Jehova mopalig-on usab kanato sa ‘pagpadayon sa pagsulti sa iyang pulong uban ang bug-os nga kaisog.’—Buh. 4:29.