Nagasangyaw Ka ba Uban ang Kaisog?
1 Bisan pag gidakop ug gihulga sa mga magsusupak, si Pedro ug Juan nagpadayon sa pagpahayag sa mensahe sa Gingharian uban ang kaisog. (Buh. 4:17, 21, 31) Unsay kahulogan alang kanato karon sa pagsangyaw uban ang kaisog?
2 Maisogong Magpamatuod: Ang kapulong alang sa “maisogon” maoy “masigihon,” nga nagkahulogang “desididong pagkaway-kokahadlok, kalig-on, ug pagkamalahutayon.” Alang sa matuod nga mga Kristohanon, ang pagsangyaw uban ang kaisog nagkahulogan nga di-mahadlok nga mosulti sa dihang adunay haom nga higayon sa pagpaambit sa maayong balita ngadto sa uban. (Buh. 4:20; 1 Ped. 3:15) Nagkahulogan kini nga dili nato igakaulaw ang maayong balita. (Sal. 119:46; Roma 1:16; 2 Tim. 1:8) Busa, ang kaisog maoy hiyas nga gikinahanglan sa pagpalampos sa atong buluhaton nga isangyaw ang maayong balita sa Gingharian niining panahon sa kataposan. Mopalihok kini kanato nga ipaambit ang maayong balita ngadto sa mga tawo bisan asa sila makaplagan.—Buh. 4:29; 1 Cor. 9:23.
3 Kaisog Diha sa Eskuylahan: Ang kiling ba nga mahadlokon o maulawon nagpalisod sa pagsangyaw ngadto sa imong mga eskolmet? Usahay dili kini sayon; sa pagkamatuod, mahimo kining usa ka tinuod nga hagit. Apan, si Jehova mopalig-on kanimo kon ikaw moampo alang sa kaisog sa pagsangyaw sa uban. (Sal. 138:3) Ang kaisog motabang kanimo sa pagpaila sa imong kaugalingon ingong usa sa mga Saksi ni Jehova ug sa pagbarog sa pagbiaybiay. Ingong resulta, ang imong pagsangyaw diha sa eskuylahan mahimong moluwas kanilang mamati kanimo.—1 Tim. 4:16.
4 Kaisog Diha sa Trabahoan: Ikaw ba nailhan ingong usa sa mga Saksi ni Jehova diha sa trabahoan? Ang bugtong paagi nga ang imong mga isigkatrabahante maabot sa maayong balita mahimo pinaagig imong pagsangyaw kanila. Ang imong kaisog motabang usab kanimo sa paghangyo nga mopalta sa trabaho alang sa imong Kristohanong mga tigom ug mga kombensiyon.
5 Maisogon sa Dihang Ilalom sa Pagsulay: Ang pagtigom ug kaisog hinungdanon sa dihang kita makasugamak ug pagsupak. (1 Tes. 2:1, 2) Motabang kini kanato nga magmalig-on sa atong pagtuo sa dihang kita mailalom sa mga paghulga, pagbiaybiay, o dihadihang paglutos. (Filip. 1:27, 28) Mopalig-on kini kanato sa pagbarog nga malig-on sa dihang mailalom sa pagpit-os nga ikompromiso ang atong pagsunod sa mga sukdanan sa atong Diyos, si Jehova. Mopalig-on kini kanato sa pagmentinar sa atong pagkamakigdaiton sa dihang ang uban makig-away.—Roma 12:18.
6 Bisan unsang mga kalisdanan nga personal natong masugamak, hinaot nga kita molahutay sa pagsangyaw sa maayong balita uban ang kaisog.—Efe. 6:18-20.