Ang mga Panahaon Nausab Na
1 Ang Bibliya nagatug-an kanato nga “ang talan-awon niining kalibotana nagakausab.” (1 Cor. 7:31) Pagkatinuod niana karong adlawa! Bisan sa atong tibuok kinabuhi, atong nakita ang daling mga kausaban diha sa panghunahuna ug panggawi sa mga tawo sa matag kahimtang sa tawhanong sosyedad. Aron malamposong maabot sila uban ang mensahe sa Gingharian, ang atong paagi kinahanglang mopasignunot sa nagakausab nga mga panahon.
2 Mga tuig kanhi, sa daghang dapit ang buluhatong pagwali maoy lahi sanglit ang mga tawo nagkinabuhi man sa mas linaw nga mga kinabuhi, ug sila mibating luwas. Ang relihiyon gihuptang sagrado, diha sa ilang mga kinabuhi. Ang Bibliya giisip nga halangdon. Niadtong mga adlawa kasagarang gikinahanglan natong buntogon ang bakak nga mga doktrina. Karong adlawa, ang mga kinabuhi sa mga tawo anaa sa kagubtanan. Daghan ang nawad-an sa pagtuo sa relihiyon ug sa Bibliya.
3 Usa ka nagapanawng magtatan-aw nakamatikod: “Karon, maorag, daghan kaayong problema sa mga kinabuhi sa mga tawo nga kinahanglan natong tudloan sila kon unsaon sa pagkinabuhi.” Ang unang mga alatimanon sa katawhan siyempre anaa nagalibot sa ilang kaugalingon, sa ilang mga pamilya, ug sa ilang mga kabalaka. Mao kini ang mga butang nga ilang ginahisgotan sa dihang sila managkatigom. Kinahanglang huptan nato kana sa hunahuna sa atong buluhatong pagsangyaw. Atong mabatonan ang mas maayong kalamposan kon atong masugdan ang mga panaghisgot nga nagatandog sa mga problema nga ginaatubang kanilang atong gipakigsultihan.
4 Ang Gingharian sa Dios Mao ang Bugtong Seguradong Paglaom sa Kaugmaon: Kadaghanang katawhan adunay gamayng pagsalig diha sa tawhanong kagamhanan. Ang bakak nga relihiyon napakyas sa paghatag kanila sa bisan unsang pasikaranan alang sa paglaom. Maoy hinungdan nga ang labing dakong panginahanglan sa katawhan mao ang pagpatalinghog sa maayong balita bahin sa Gingharian sa Dios. Ang atong unang tumong sa pagsangyaw mao ang pagpunting diha sa Gingharian ug ipakita kon sa unsang paagi kini magataganag mga kasulbaran sa tanang problema nga ginaatubang sa katawhan.
5 Ang Bibliya Mao ang Bugtong Kasaligang Tinubdan sa Giya: ang kinabag-ang katawhan karong adlawa nahisalaag pinaagig mga pangulo kinsa nagasalig sa tawhanong kaalam ug kalibotanong mga pilosopiya. (Jer. 10:23) Ang labing hinungdanong leksiyon nga ilang matun-an mao nga kinahanglan silang ‘mosalig kang Jehova uban sa bug-os nilang kasingkasing ug dili magsalig sa ilang kaugalingong pagsabot.’ (Prov. 3:5) Samtang ang mga panahon nausab na, ang Bibliya wala man. Busa, sa atong ministeryo kinahanglan natong tudloan ang uban sa pagpabili sa dinasig nga giya niana. (2 Tim. 3:16, 17) Sa paghimo niana, kinahanglan natong gamiton ang Bibliya sa pagtubag sa ilang mga pangutana, ug ipasiugda ang panginahanglan sa pagtuon niana ug pagpadapat sa praktikal nga kaalam niana.
6 Bisan duyog sa nagakausab nga mga panahon karong adlawa , ang atong mga tumong sa ministeryo wala mausab. Apan, aron makab-ot kining mga tumonga sa labing maayong paagi sa 1996, kon unsa ang atong isulti kinahanglang may kalabotan sa presenteng mga panginahanglan kanilang atong ginapamatud-an. Sa paghimo niana, kita mahimong mga tigpaambit sa maayong balita ngadto sa uban ug sa ingon madala ang labing daghang tawo.—1 Cor. 9:19, 23.