Aduna Kitay Espirituwal nga Kadagaya nga Wala Gayod Kanhi!
1 Kadaghanan sa mga tawo nangandoy sa adlaw sa dihang sila makaingon, “Aduna kitay kadagaya nga wala gayod kanhi!” Ilang gipasabot nga sila nagalaom nga magmadagayaon sa materyal nga mga butang, aron sila ‘magpahayahay, mokaon, moinom, ug maglipay sa ilang kaugalingon.’ (Luc. 12:19) Sa kasukwahi, sa pagkakaron kita makaingon nga sa espirituwal nga pagsabot, walay nakulang kanato. (Sal. 34:10) Sa unsang paagi kana mahimo?
2 Ang Proverbio 10:22 nagaingon nga “ang panalangin ni Jehova—nagapadato kini.” Mahimong ikaingon nato nga ang Diyos “nagahatag kanato sa tanang butang nga dagaya alang sa atong kalipayan.” (1 Tim. 6:17) Kini nagahimo kanatong labing datong katawhan sa yuta!
3 Pag-ila sa Atong mga Panalangin: Bisan tuod diyutay ang nahuptan sa materyal nga paagi, kita wala mabalaka pag-ayo bahin sa atong adlaw-adlawng mga panginahanglan. Si Jehova nasayod kon unsa ang atong gikinahanglan, ug siya nagasaad sa pagtagana niini. (Mat. 6:31-33) Kini nagahatag kanatog kalinaw sa hunahuna nga maoy dili gayod kabayran.
4 Ang atong espirituwal nga mga panalangin, hinuon, maoy mas labaw pa. Ang atong mga kinabuhi nagadepende sa espirituwal nga pagkaon gikan kang Jehova. (Mat. 4:4) Sila nga modangop sa kalibotanong mga tinubdan alang sa espirituwal nga pagkaon pagagutomon samtang kita bug-os nga tagbaw nga madagayaon pinaagi sa ‘kasaligan nga ulipon.’—Isa. 65:13; Mat. 24:45.
5 Ang atong tibuok-kalibotang panag-igsoonay nagatagana kanatog panag-uban sa mahigugmaong mga igsoon sa tanang bahin sa yuta. (Juan 13:35) Ang lokal nga kongregasyon maoy dapit diin atong makaplagan ang kahupayan ug kahayahay. Ang mga ansiyano padayong nagabantay sa atong mga kalag, nagatabang kanato nga makasagubang sa daghang matang sa mga problema. (Heb. 13:17) Ang atong pagpakigsuod sa atong mga igsoon nagadasig ug nagapalig-on kanato sa paglahutay.—Roma 1:11, 12.
6 Bisan ang atong buluhaton maoy usa ka panalangin. Ang pagpaambit sa maayong balita nagadalag kangaya ngadto sa uban ug kalipay sa atong kaugalingon. (Buh. 20:35) Mahimo gayod natong makaplagan ang maayo alang sa tanan natong paghago.—Eccl. 2:24.
7 Labaw sa tanan, kita adunay kahibulongang paglaom sa ugma-damlag. (Roma 12:12) Kita nagapaabot sa usa ka hingpit bag-ong kalibotan sa pagkamatarong, diin kita magapuyo uban ang atong mga minahal diha sa kalipay ug pakigdait sa walay kataposan!
8 Sa Unsang Paagi Atong Ikapakita ang Atong Pagpabili? Dili gayod kita makabayad kang Jehova kon unsa ang iyang nahimo alang kanato. Ato lamang ikapadayag ang atong pagpabili pinaagig (1) pagpasalamat kaniya sa matag adlaw tungod sa iyang di-takos nga kalulot (Efe. 5:20), (2) pagpasundayag sa atong gugma pinaagig pagkamasinundanon (1 Juan 5:3), (3) pagbayaw sa iyang ngalan pinaagig pagsangyaw sa maayong balita (Sal. 83:18), ug (4) pagpaluyo sa Kristohanong kongregasyon pinaagi sa atong tibuok-kalag nga kooperasyon.—1 Tim. 3:15.
9 Aduna kita ing tanang katarongan nga mahimong labing malipayong katawhan ibabaw sa yuta. (Sal. 144:15b) Hinaot ang atong tinamdan, panggawi, ug pag-alagad magabanaag sa kangaya nga atong gibati diha sa atong espirituwal nga paraiso—nga aduna kitay kadagaya nga wala gayod kanhi!