Pangutana

◼ Unsang mga publikasyon ang angayang ibutang sa librarya sa Tunghaan sa Teokratikanhong Ministeryo?

Ang librarya sa Tunghaan sa Teokratikanhong Ministeryo didto sa Kingdom Hall magtagana sa mga panginahanglan alang sa panukiduki diha sa mga publikasyon nga tingali dili mabatonan sa laing paagi. Busa, kini kinahanglang masangkapan pag-ayo sa lainlaing matang sa mga hubad sa Bibliya, sa bag-ong mga publikasyon sa Sosyedad, mga kopya sa Atong Ministeryo sa Gingharian, mga tinahing tomo sa Ang Bantayanang Torre ug Pagmata!, ug ang Watch Tower Publications Indexes. Dugang pa, ang usa ka maayong modernong diksiyonaryo kinahanglang ipuno. Kon mabatonan, ang mga ensiklopedia, mga basahon sa mga mapa (atlas), o reperensiyang mga libro bahin sa gramatika ug kasaysayan mahimong makatabang.

Dili gayod tukma ang paglakip sa tinumotumong mga basahon, mga komentaryo sa Bibliya nga nagpasiugda sa tumang pagpanaway, o mga libro sa pilosopiya o espiritismo. Ang librarya sa Tunghaan sa Teokratikanhong Ministeryo angayng maglakip lamang sa materyal nga magpaarang niadtong magagamit niana sa paghimog dugang pag-uswag sa espirituwal.​—1 Tim. 4:15.

Ang magtatan-aw sa tunghaan maoy responsable sa librarya, bisan tuod ang laing igsoong lalaki mahimong itudlo sa pagtabang kaniya sa pag-atiman niana. Kinahanglang tinoon niya nga ang bag-ong mga publikasyon idugang sa dihang kini mabatonan na. Ang matag libro kinahanglang tin-aw nga markahan sa sulod sa hapin nga may ngalan sa tag-iya nga kongregasyon. Matag tuig, ang mga libro kinahanglang susihon aron matino kon kinahanglang ipaayo o ilisan.

Pinaagig pagsunod sa mga sugyot sa ibabaw, ang librarya sa Tunghaan sa Teokratikanhong Ministeryo makatabang sa tanan sa pagkaplag sa natagong mga bahandi sa Pulong sa Diyos, nga nagahatag ug kahibalo, kaalam, ug pagsabot.​—Prov. 2:4-6.