Gigantihan ang Pagkamatinumanon
1 Sa Hebreohanon 11:6 kita giingnan nga ang Diyos “maoy tigganti sa mga matinuorong nagapangita kaniya.” Usa ka paagi nga siya nagaganti sa iyang debotadong mga alagad nga ‘kasaligan sa diyutayng mga butang’ mao ang ‘pagtudlo kanila ibabaw sa daghang butang.’ (Mat. 25:23) Sa laing pagkasulti, si Jehova kasagarang nagaganti sa maayong buhat pinaagig paghatag sa iyang matinumanong mga saksi sa dugang mga pribilehiyo sa pag-alagad.
2 Ang pagkamatinumanon ni apostol Pablo gigantihan pinaagi sa iyang pagkatudlo sa ministeryo nga nagdala kaniya ngadto sa mga siyudad ug mga balangay sa Uropa ug Asia Minor. (1 Tim. 1:12) Bisan tuod dakong paningkamot ang nalangkit sa bug-os nga pagtuman sa iyang ministeryo, gipabilhan pag-ayo ni Pablo ang iyang nadawat nga pribilehiyo. (Roma 11:13; Col. 1:25) Iyang gipakita ang iyang kinasingkasing nga pagpabili pinaagi sa mainitong pagpangita ug mga kahigayonan sa pagsangyaw. Pinaagi sa iyang masibotong kalihokan, tin-aw niyang gipakita nga siya nagkinabuhi sa iyang pagtuo. Ang iyang panig-ingnan magpalihok kanato sa pagbahandi sa atong mga pribilehiyo sa pag-alagad.
3 Si Jehova Naghatag Kanatog Usa ka Ministeryo: Unsaon nato pagpasundayag sa samang panglantaw niining pribilehiyo sa pag-alagad nga gipakita ni Pablo? Kita mangitag mga paagi sa pagpauswag sa atong pagpakig-ambit sa ministeryo. Pahimuslan ta ang matag kahigayonan sa pagsangyaw nga di-pormal maingon man sa pultahan ug pultahan. Balikan ta ang tanang wala sa balay ug duawog balik ang tanang interesado. Ug atong tumanon ang mga kasabotan nga atong gihimo sa pagdumalag mga pagtuon sa Bibliya sa balay.
4 Maylabot sa atong ministeryo, si Pablo nagtambag: “Magmadalion diha niana.” (2 Tim. 4:2) Ang butang nga dinalian nanginahanglag dihadihang pagtagad. Buhaton ba nato ang atong ministeryo nga may pagkadinalian, nga nagauna niana sa atong mga kinabuhi? Pananglitan, dili nato tugotan ang atong mga kalihokan sa lulinghayaw ug uban pang personal nga mga pangagpas sa hinapos sa semana sa pagbalda sa panahon nga angay natong gamiton sa ministeryo sa kanataran. Sanglit kita kombinsido nga taliabot na ang kataposan niini nga sistema, kita usab kombinsido nga ang pagsangyaw sa maayong balita sa Gingharian mao ang labing importanteng buluhaton nga atong mahimo.
5 Ang pagkamatinumanon ngadto sa Diyos mapasundayag pinaagi sa pagkahimong matuod ug maunongon kaniya ug makanunayon diha sa buluhaton nga iyang gihatag kanato. Bug-os natong tumanon ang atong ministeryo aron si Jehova magaganti sa atong pagkamatinumanon sa dakong paagi.