Maningkamot Kita sa Pagpauswag sa Atong Ministeryo
1 Giawhag ni apostol Pablo ang mga Kristohanon sa paglakaw diha sa dalan sa Diyos ug sa ‘pagpadayon sa paghimo niini sa mas bug-os pa.’ (1 Tes. 4:1) Sa unsang paagi atong matuman kini? Ang usa ka paagi mao nga kita kinahanglang padayong mangitag mga paagi sa pagpauswag sa atong pag-alagad, nga maningkamot kanunay sa ‘pagtuman sa bug-os sa atong ministeryo.’—2 Tim. 4:5.
2 Tinamdan: Kita madasig sa pagpaningkamot sa pagpauswag sa atong ministeryo tungod kay buot natong alagaron ang atong Maglalalang sa mas bug-os pa. Buot natong mohamtong sa espirituwal ug mangitag mga paagi sa pagpauswag sa atong ministeryo. Ang usa ka maayong rutina uban ang hustong tinamdan motabang kanato sa pagkab-ot sa mga tumong nga nalangkit sa atong pag-alagad sa Diyos.—Sal. 1:1, 2; Filip. 4:6; Heb. 10:24, 25.
3 Kinahanglang atong ugmaron ang pagkamanggihatagon ug pagsakripisyo sa kaugalingon aron atong mapauswag ang atong ministeryo. Atong maugmad kining mga hiyasa pinaagi sa pag-ampo ug pagpamalandong sa maayong panig-ingnan ni Jesus. (Mat. 20:28) Si Jesus nalipay gayod sa pag-alagad sa uban sa tibuok niyang ministeryo. (Buh. 20:35) Atong masundog si Jesus pinaagi sa pagpakitag personal nga interes sa mga tawo ug sa pagkahimong alisto sa mga kahigayonan sa pagpauswag sa atong ministeryo.—Isa. 6:8.
4 Papel sa mga Ginikanan: Ang tinguha nga moalagad sa uban ug ang tinguha nga mapauswag ang atong ministeryo ikasilsil sa mga anak samtang sila bata pa. Mamatikdan sa mga bata ang kakugi ug kasibot sa mga membro sa ilang pamilya sa pagpauswag sa ilang ministeryo. Ang usa ka brader nadasig sa pagpauswag sa iyang ministeryo sa bata pa siya tungod sa iyang pagpakig-uban kanunay sa iyang Lolo sa pagpakigbahin sa mga kalihokan sa kongregasyon. Tungod kay iyang nakita ang kakugi ug kalipay sa iyang Lolo, siya nadasig sa pagpangitag mga kahigayonan sa pag-alagad sa iyang mga igsoon sa pagtuo. Siya karon usa na ka ministeryal nga alagad.
5 Mga Igsoong Lalaki Gikinahanglan: “Kon adunay magapangab-ot . . . , siya matinguhaon sa usa ka maayong buhat.” (1 Tim. 3:1) Kining mga pulonga nagdasig sa mga igsoong lalaki sa pagpaningkamot aron mahimong kuwalipikado alang dugang pang mga pribilehiyo sa pag-alagad diha sa organisasyon ni Jehova. Kini wala magkinahanglag linaing mga kahanas. Ang usa ka brader nga nagapangab-ot mangita pag-una sa Gingharian ug masibotong makigbahin sa ministeryo. (Mat. 6:33; 2 Tim. 4:5) Siya maningkamot nga mahimong usa ka maayong panig-ingnan sa uban.
6 Sa Tibuok Kalibotan: Gipadali ni Jehova ang pagpanigom. (Isa. 60:22) Adunay dinaliang panginahanglan alang sa tanang nanagsunod sa panig-ingnan ni Jesus sa pagtuman sa ilang ministeryo sa mas bug-os pa. Ang tibuok-kalibotang taho sa 2006 nga tuig sa pag-alagad nagpakita nga 248,327 ang nabawtismohan. Kana nagpasabot nga sa aberids adunay kapin sa 680 ang nabawtismohan kada adlaw! Hinaot kitang tanan mopadayon sa pagpangitag mga paagi sa pagpauswag sa atong ministeryo sa mas bug-os pa.