Sulat sa Sangang Buhatan

Minahal nga mga Magmamantala sa Gingharian:

Kita malipay nga mahibalo sa pag-uswag sa buluhaton dinhi sa Pilipinas sulod sa 2007 nga tuig sa pag-alagad! Atong nakab-ot ang kinatas-ang ihap nga 154,858 ka magmamantala sa Abril. Sa maong gidaghanon, 42,252 ang nakigbahin sa bug-os-panahong pag-alagad ingong mga oksilyare, regular, o espesyal payunir, nga maoy 27% sa katibuk-ang mga magmamantala.

Niadtong Oktubre ug Nobyembre 2006, kapin sa 8 ka milyong kopya sa Kingdom News Num. 37, “Ang Kataposan sa Bakak nga Relihiyon Haduol Na!” ang napanagtag sa tibuok Pilipinas. Dayon sa Marso ug Abril 2007, 8 ka milyong imbitasyon sa Memoryal ang napanagtag. Ang tumong sa maong mga kampanya mao ang pagtabang sa matinud-anog-kasingkasing nga mga tawo sa pagkakat-on kon unsay tinuod nga gitudlo sa Bibliya. Daghan ang nasangyawan niining mga paagiha nga lagmit dili masangyawan sa ubang mga paagi.

Makapalipay ang pagkahibalo nga kapin sa 140,000 ka pagtuon sa Bibliya ang nadumala sa Abril 2007. Gipakita niini nga mas daghang magmamantala ang nahimo na karong mga magtutudlo sa Pulong. (Mat. 28:19, 20) Ang librong Gitudlo sa Bibliya mao ang gigamit sa kadaghanan alang niining buluhatona. Sukad nga giluwatan kining libroha niadtong 2005, kapin na sa 1 ka milyong kopya ang napanagtag sa tibuok Pilipinas. Kami malipay sa pagpakigtambayayong kaninyo niining hinungdanong buluhaton, ug palihog dawata ang among mainit nga Kristohanong gugma.

Inyong mga igsoon,

Sangang Buhatan sa Pilipinas