Mga Paagi sa Pagpalapad sa Imong Ministeryo

¹ Kapin sa 40 ka tuig kanhi, ang artikulong nag-ulohan ug “Nagabuhat Ka ba sa Imong Kinamaayohan?” migula sa Enero 15, 1955, Watchtower. Kana mahigugmaong nagpunting kon sa unsang paagi mahimong posible alang sa katawhan ni Jehova nga pauswagon ang ilang indibiduwal nga paningkamot diha sa ministeryo aron ilang mapauswag ang ilang kalihokan sa Gingharian. Ang maong maayong tambag mapadapat usab karong adlawa, samtang kita mopadayon nga magmauswagon sa paghimo sa atong kinamaayohan.

² Ang tanan natong pag-alagad angayng mapalihok sa labing dakong sugo: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.” (Mar. 12:30) Atong ipasundayag ang atong bug-os nga gugma kang Jehova pinaagig paggamit nga bug-os sa mga kahigayonan nga atong mabatonan aron pausbawon ang iyang buluhaton sa Gingharian. Tagda ang mosunod nga mga paagi nga hayan imong mapalapad ang imong ministeryo.

³ Abagaha ang Imong Responsabilidad: Ang dedikadong mga igsoong lalaki makapaningkamot sa pagkahimong takos ingong ministeryal nga mga alagad ug dayon mouswag sa pag-alagad ingong mga ansiyano. Ang mga artikulong “Ikaw ba Nagapaninguha?” ug “Ikaw ba May Katakos sa Pag-alagad?,” sa Septiyembre 1, 1990, nga isyu sa Ang Bantayanang Torre, ang nakatukmod sa daghang igsoong lalaki sa paghimo sa ilang kaugalingon nga mabatonan alang sa mga responsabilidad sa kongregasyon. Pagpakisayod sa inyong lokal nga mga ansiyano alang sa espesipikong mga sugyot kon unsaon sa pagkab-ot ug pagkahimong kuwalipikado.

⁴ Ang mga ansiyano ug ministeryal nga mga alagad nga di-minyo gidapit sa paghunahunang seryoso bahin sa pag-aplay sa Ministerial Training School. Mahimo nimong sination ang imong kaugalingon bahin niini nga eskuylahan pinaagi sa pagbasa sa mga reperensiya ubos sa “Ministerial Training School” diha sa Watch Tower Publications Indexes alang sa 1986-​1995, 1996, ug 1997. Imo bang nakita ang maong ‘dakong pultahan sa kalihokan’ nga nagaabli sa imong atubangan? (1 Cor. 16:9a) Daghang igsoong lalaki nga mipahimulos niining pultahan sa kahigayonan wala gayod maghanduraw sa tanang pribilehiyo sa pag-alagad nga posible human sa graduwasyon. Karon sila nagkalipay sa pag-alagad sa Bethel o sa kanataran ingong mga espesyal payunir, mga misyonaryo, o mga magtatan-aw sa sirkito.

⁵ Kab-ota ang Bug-os-Panahong Pag-alagad: Ang mga batan-ong mograduwaray sa hayskul, mga asawa, ug si bisan kinsa nga miretiro na sa sekular nga trabaho angayng seryosong magkonsiderar sa pagpayunir. Repasoha ang pasukip diha sa Hulyo 1998 nga Atong Ministeryo sa Gingharian, dayon pakigsulti sa mga payunir kansang mga kahimtang susama sa imong kaugalingong kinabuhi. Tingali matukmod ka sa pagpalapad sa imong ministeryo pinaagi sa pagpayunir, sama sa ilang gibuhat. (1 Cor. 11:1) Posible ba nga mapalapad ang imong kalihokan ngadto sa 70 ka oras sa usa ka bulan ug busa mag-alagad ingong regular payunir?

⁶ Pag-alagad sa Dapit nga Mas Dako ang Panginahanglan: Ikaw ba nagpuyo sa teritoryo nga subsob kaayong gikobrehan o adunay daghang igsoon ang nagapakig-ambit sa buluhaton? Gihunahuna ba nimo ang pagpalapad sa imong ministeryo pinaagi sa pagbalhin sa dapit nga mas dako ang panginahanglan? Tingali ang pagbalhin mahimong ngadto sa usa ka silingang balangay nga gikinahanglan ang dugang mamumuo. (Mat. 9:​37, 38) Kini dili gayod buhaton nga dinalidali. Takos kini sa mainampoong pagtagad. (Luc. 14:28-​30) Hisgoti ang imong kahimtang uban sa mga ansiyano ug sa magtatan-aw sa sirkito. Ilang ipakighisgot kanimo kon maalamon ba ang paghimo sa maong pagbalhin karon o pagpangandam sa pagbuhat sa ingon sa umaabot. Dugang pa, ang magtatan-aw sa sirkito hayan nahibalo sa mga dapit sulod sa iyang sirkito nga nanginahanglag tabang ug kana praktikal alang nimo. Kon buot nimong mosulat sa Sosyedad alang sa sugyot kon asa ikaw mahimong mobalhin, ang usa ka sulat nga pirmado sa inyong Komite sa Pag-alagad sa Kongregasyon kinahanglang ipauban sa imong sulat.

⁷ Pauswaga ang Kalidad sa Imong Pag-alagad: Lagmit kitang tanan makapakig-ambit nga mas bug-os pa diha sa ministeryo pinaagi sa pagpauswag sa kalidad sa atong pag-alagad sa kanataran. Ikaw ba nalangkit sa tanang hinungdanong bahin sa buluhaton, nga naglakip sa pamalaybalay ug impormal nga pagsangyaw maingon man sa pagbalikduaw ug pagtuon sa Bibliya nga buluhaton? Kon ikaw nagadumalag pagtuon, imo bang mapauswag ang imong arte sa pagpanudlo? Makaayo ang pagrepaso sa Hunyo 1996 nga pasukip sa Atong Ministeryo sa Gingharian alang sa mga sugyot nga magamit mo sa pagpalihok sa imong mga estudyante ngadto sa dedikasyon ug bawtismo.

⁸ Ang labawng mabug-osong panaghisgot sa mga paagi sa pagpalapad ug pagpauswag sa atong ministeryo makaplagan sa kapitulo 9 sa Organisado sa Pagtuman sa Atong Ministeryo. Tataw ang tanan kanato kinahanglang magtinguha sa pagbuhat nga mas pa kutob sa maarangan diha sa pag-alagad sa Diyos. Nganong dili hatagan ug seryosong pagtagad ang imong espirituwal nga mga tumong? Buhata ang sama sa girekomendar sa 1 Timoteo 4:​15: “Hinuktoki kining mga butanga; magpatuhop diha niini, aron ang imong pag-uswag madayag sa tanan nga mga tawo.”