Padakoa ang Imong Bahandi sa Pag-alagad sa Gingharian
1 Si Jesus nagpakasama sa paglaom sa Gingharian sa usa ka bililhong bahandi. (Mat. 13:44-46) Kita ba sama sa mga tawo sa mga ilustrasyon ni Jesus nga nagbaligya sa tanan nilang mga kabtangan aron pagpalit sa usa ka butang nga mas dakog bili? Kon mao, ibutang nato sa unang dapit ang Gingharian sa Diyos.—Mat. 6:19-22.
2 Sanglit kay ang atong pag-alagad sa Gingharian usa man ka bahandi, tinguhaon gayod nato ang pagpadako niana. Ato bang gipalapad ang atong kalihokan sa Gingharian? Kita makahimo niana pinaagig pagpakig-ambit sa balaybalay nga buluhaton, paghimog mga balikduaw, pagdumalag mga pagtuon sa Bibliya, ug pagsangyaw nga impormal.
3 Unsaon Nako Pagpadako ang Akong Pagpakig-ambit?: Sa pagsugod sa usa ka bag-ong tuig sa pag-alagad, maoy maayo sa matag usa nga repasohon ang iyang personal nga kalihokan ug mosukna: ‘Mahikay ba nako ang akong mga kalihokan aron makapalista ingong oksilyare payunir sa pupanahon o bisan makanunayon? Uban ang pipila ka pagpasibo, makasulod ba ako sa regular payunir nga pag-alagad?’ Ang bag-ong mga payunir nga magpalista sa Septiyembre 1 takos nga motungha sa Pioneer Service School sunod tuig.
4 Ang pipila ka magmamantala nagpahilunag personal nga tumong aron paghimog dugang pang impormal nga pagsangyaw. Ang uban hayan mobati sa panginahanglang magpauswag sa paghimog epektibong mga balikduaw o pagsugod ug bag-ong mga pagtuon sa Bibliya.
5 Kon atong namatikdan nga ang atong ministeryo limitado, unsay atong mahimo sa pagpadako niana? Kadtong nagmalamposon nagarekomendar nga una natong tinoon ang pagbutang nga una sa intereses sa Gingharian bisag unsay mahitabo. (Mat. 6:33) Ang bug-os nga pagsalig kang Jehova kinahanglan. (2 Cor. 4:7) Pangayoa ang iyang tabang pinaagig pag-ampo. (Luc. 11:8, 9) Kita makasalig nga panalanginan ni Jehova ang atong mga paningkamot sa pagpauswag sa atong pagpakig-ambit sa iyang pag-alagad.—1 Juan 5:14.
6 Pakigsulti sa uban nga malamposong nagpalapad sa ilang ministeryo. Pangutan-a sila kon giunsa nila pagbuntog ang mga kababagan. Ang ilang mga kasinatian hayan makahaylo kanimo nga ang usa ka napalapad nga ministeryo makab-ot gayod.
7 Sa dihang mabasa mo ang mga artikulo sa Ang Bantayanang Torre o Atong Ministeryo sa Gingharian nga nagahisgot sa pag-alagad sa kanataran, tagdang mainampoon kon sa unsang paagi ikapadapat mo ang mga sugyot. Buhata ang ingon sa dihang magatambong sa mga tigom sa kongregasyon o mga asembliya. Ang mga sugyot niining artikuloha gipasukad sa programa sa sirkitong asembliya sa miaging tuig. Kini maoy una sa serye sa mga artikulo nga gidesinyo sa pagtabang kanato sa pagpadapat sa pagdasig nga gitagana nianang programaha.
8 Si Jesus naghatag ug pangunang kabalaka sa iyang ministeryo. Siya nag-ingon: “Ang akong pagkaon mao ang pagbuhat ko sa kabubut-on niya nga nagpadala kanako.” (Juan 4:34) Gibati ba nato kana? Kon mao, kita manikaysikay sa pagpalapad sa atong kalihokan ug magpaambit sa “maayong mga butang” sa uban gikan sa atong tinipigang bahandi.—Mat. 12:35; Luc. 6:45.