Gusto Mo Bang Mohimog Mas Pa?
1 Gipakasama ni Jesus ang Gingharian sa bililhong mga bahandi. (Mat. 13:44-46) Ang buluhaton sa pagpakaylap sa maayong balita sa Gingharian maoy bililhon usab nga bahandi. Kini nga ministeryo takos sa unang dapit sa atong kinabuhi, bisan kon ang bug-os nga pagpakig-ambit niana naglangkit sa usa ka sukod sa pagdumili-sa-kaugalingon. (Mat. 6:19-21) Gusto mo bang mohimog mas pa diha sa pag-alagad sa Gingharian?
2 Tagda Kini nga mga Kinahanglanon: Ubay-ubayng mga butang ang kinahanglanon aron mapalapad ang atong personal nga pagpakig-ambit sa ministeryo: (1) pagkahimong determinado sa pag-una sa intereses sa Gingharian diha sa kinabuhi (Mat. 6:33); (2) pagpakitag pagtuo ug pagsalig kang Jehova (2 Cor. 4:1, 7); (3) pagpangayog tabang sa Diyos pinaagi sa sinsero ug malahutayong pag-ampo (Luc. 11:8-10); (4) pagsunod ug pagbuhat uyon sa atong mga pag-ampo.—Sant. 2:14, 17.
3 Mga Paagi sa Pagpalapad sa Atong Ministeryo: Ang tanan kanato makahimog pangunang tumong sa regular nga paggugol ug pipila ka panahon diha sa ministeryo matag bulan. Apan imo bang gihunahuna usab ang pagsakmit sa matag kahigayonan sa pagpamatuod sa impormal nga paagi, nga manlimbasog sa paghimo sa imong mga presentasyon nga mas makahuloganon, nga magpauswag sa kaepektibo sa imong mga balikduaw, ug maningkamot sa pagdumalag mauswagong mga pagtuon sa Bibliya sa balay? Makahimo ka ba sa pag-oksilyare o pagregular payunir o sa pag-alagad sa dapit diin mas dako ang panginahanglan? Kon ikaw bawtismadong igsoong lalaki, ikaw ba makapangab-ot sa pagkakuwalipikado ingong usa ka ministeryal nga alagad o usa ka ansiyano? (1 Tim. 3:1, 10) Mapalapad mo ba ang imong ministeryo pinaagi sa pag-aplay sa pag-alagad sa Bethel o sa Ministerial Training School?—Luc. 10:2.
4 Usa ka igsoong lalaki nga adunay bug-os-panahong trabaho ug migugol ug daghang panahon sa mga kalihokan sa esports ang gidasig nga mahimong usa ka regular payunir. Misugod siya sa pag-oksilyare payunir ug dayon gipasibo ang iyang mga kahimtang sa pagsulod sa bug-os-panahong ministeryo. Sa ulahi siya mitambong sa Ministerial Training School, nga nakatabang sa pag-andam kaniya alang sa iyang presenteng asaynment ingong magtatan-aw sa sirkito. Malipayon kaayo siya nga misanong siya sa pagdasig nga iyang nadawat, ug siya masaligon nga siya mas malipayon ingong resulta sa iyang desisyon sa paghimog mas pa diha sa pag-alagad sa Gingharian.
5 Gipanalanginan ni Jehova kadtong naghimo sa ilang kaugalingon nga mabatonan. (Isa. 6:8) Ayawg tugoti ang bisan unsa nga magpugong kanimo sa pagpalapad sa imong ministeryo ug sa pagpahimulos sa mas dakong katagbawan ug kahayahay ingong resulta.