Imo pa Bang Mapauswag ang Imong Pag-alagad?
1. Unsa nga panginahanglan ang dinalian bahin sa atong ministeryo, ug ngano?
1 Sa dihang nakita ni Jesus nga daghang tawo ang interesado sa maayong balita sa Gingharian, iyang gisugo ang iyang mga tinun-an sa ‘pagpangamuyo sa Agalon sa pagpangani nga magpadalag mga mamumuo ngadto sa iyang pagpangani.’ (Mat. 9:37, 38) Sanglit hapit nang matapos ang ting-ani, ang atong buluhaton mas dinalian karon kay sukad masukad. Kini nagpasabot nga kinahanglan kitang mamalandong uban ang pag-ampo kon sa unsang paagi kita bug-os nga makig-ambit sa ministeryo.—Juan 14:13, 14.
2. Sa unsang paagi ang pipila misanong sa awhag alang sa dugang mga mamumuo?
2 Pagpasangkad sa Ministeryo: Uban sa panalangin ug tabang ni Jehova, daghan ang nakaarang sa pagpayunir. (Sal. 26:2, 3; Filip. 4:6) Ang pipila mihimog linaing paningkamot aron makaoksilyare payunir sa usa ka bulan o kapin pa matag tuig. Kini maoy usa gayod ka maayong paagi sa pagpasangkad sa ilang ministeryo. Tungod sa kalipay nga ilang natagamtam sa pag-oksilyare payunir, daghan kanila ang nakahukom nga magregular payunir.—Buh. 20:35.
3. Kon nakapayunir ka na kaniadto, unsa ang mahimo nimong pamalandongon karon?
3 Makapayunir Ka ba Pag-usab?: Kon nakapayunir ka na kaniadto, lagmit imo pang nahinumdoman ang malipayon nimong mga kasinatian niana. Imo bang ginaampo ug ginapamalandong ang posibilidad nga makabalik sa maong pribilehiyo? Tingali wala na ang mga babag nga maoy nakaingon sa imong pag-undang sa pagpayunir. Basin makahimo ka na karon sa pagpayunir pag-usab.—1 Juan 5:14, 15.
4. Unsang talagsaong pribilehiyo ang bukas alang kanatong tanan?
4 Hapit nang matapos ang buluhatong pagpangani. (Juan 4:35, 36) Hinaot nga atong susihon ang atong mga kahimtang karon aron atong matino kon unsa nga mga pagpasibo sa atong mga kalihokan ang atong mahimo sa pagpasangkad sa atong pagpakigbahin sa ministeryo. O kon dili gayod kita makaarang sa pagpayunir, aduna pa bay mga paagi aron mahimong mas epektibo ang atong ministeryo? (Mar. 12:41-44) Usa gayod ka dakong pribilehiyo ang bukas alang sa tanan kansang mga kahimtang motugot kanila nga gamiton ni Jehova niining maong talagsaong buluhaton!—Sal. 110:3.