Mag-oksilyare Payunir Ka ba sa Nobyembre o Disyembre?
1 Si Jesus misugod sa usa ka buluhaton nga mahinungdanon kaayo nga ang palaaboton sa tanang katawhan nagadepende sa sangpotanan niana. (Mat. 4:17) Kining buluhatona modangat sa iyang sangkoanan sa dili pa gayod “ang kataposan,” sa dihang ang mensahe sa Gingharian “gikawali na sa tibuok ginapuy-ang yuta alang sa pagpamatuod sa tanang mga nasod.”—Mat. 24:14.
2 Sanglit kay duol na man ta kaayo sa kataposan, kining buluhatona maoy labing dinalian kay sukad masukad. Uban sa mga kinabuhi nga namilegro, ang wala-kinahanglanang paglangan may seryosong mga sangpotanan. Ang oksilyare payunir nga kahikayan nakadasig sa daghan nga labaw pang magmaaktibo sa pagtuman niining dinaliang buluhaton. Makaoksilyare payunir ka ba sa Nobyembre o Disyembre?
3 Maayong mga Bulan sa Pagpayunir: Tungod kay ang Nobyembre sagad may maayong panahon human sa ting-ulan, kini maoy maayong panahon sa pagpalandong sa pagpayunir. Usab, niining tuiga ang Nobyembre may lima ka Domingo, nga makabulig niadtong nagatrabaho sulod sa mga adlawng tingtrabaho. Mahimong makaplagan sa daghan nga sila makaoksilyare payunir sa Disyembre, sanglit kay niining tuiga ang mga kombensiyon dili magsugod hangtod sa ikaupat nga semana sa bulan. Usab, daghan sa atong kabatan-onan adunay bakasyon gikan sa tunghaan sulod sa Disyembre.
4 Sulod sa milabay nga duha ka tuig nag-abireds ta ug kapin sa 5,000 nga mga oksilyare payunir sa kada bulan dinhi sa Pilipinas, nga maoy maayo kaayo. Hinuon, sa miaging Nobyembre diha lamang kita ing 2,658 nga mga oksilyare payunir, ug sa Disyembre 2,068 lamang. Busa buot namong dasigon ang tanan nga makaarang sa pagpalandong sa ilang mga kahimtang sa pagsusi kon sila ba makapayunir. Nganong dili ipakighisgot kining posibilidara ngadto sa mga natudlo na ug mokuhag pipila ka sugyot gikan kanila?
5 Nganong Padakoon ang Atong Ministeryo? Oo, nganong padakoon man sa mga Saksi ni Jehova ang ilang ministeryo inay kay mangagpas sa materyal nga mga bentaha? Tungod kay buot nilang dayegon si Jehova ug sultihan ang uban bahin sa iyang mga katuyoan. Sila nasayod nga “ang kalibotan mahanaw, . . . apan siya nga nagatuman sa kabubut-on sa Diyos magapabilin sa walay kataposan.” (1 Juan 2:17) Usab, sila nagalihok nga uyon sa ilang pag-ampo nga ang Agalon sa alanihon “magapadalag mga mamumuo ngadto sa alanihon.” (Mat. 9:37, 38) Hinaot si Jehova magapanalangin sa imong mga plano sa pagpadako sa imong personal nga pakig-ambit sa ministeryo sulod sa Nobyembre ug Disyembre.