Padayong Pagkapuliki sa Buluhaton ni Jehova

¹ Kita gayod bulahan sa pag-alagad kang Jehova. Tungod kay nakahupot sa kahibalo bahin kaniya ug sa iyang bugtong nga Anak, si Jesus, kita napalihok sa gugma aron bug-os nga hagoon ang atong kaugalingon sa pagbuhat sa Iyang kabubut-on. (Juan 17:3) Mahimong kapuyan kita, apan si Jehova mohatag kanatog gahom aron kita magmakusganon gayod.​—Isa. 40:29.

² Unsaon ta man sa labing maayong paagi sa pagpakita sa atong apresasyon sa dakong gugma nga gibutyag ni Jehova nga Diyos ug ni Jesu-Kristo nganhi kanato? (2 Cor. 5:14, 15) Ang unang paagi mao ang pagsundog kang Jesus, kinsa malahutayong nagpamatuod bahin sa ngalan sa iyang Amahan ug Gingharian. (1 Ped. 2:21) Kon kita adunay malig-ong pagtuo, ang atong mga kinabuhi mahasentro sa hinatag-Diyos nga buluhaton sa pagsangyaw sa maayong balita.​—Mat. 24:14.

³ Aduna bay minimo sa gidaghanon sa panahon nga kinahanglang atong igahin sa ministeryo sa kanataran? Ang mga kahimtang magkalain. Basin kita limitado tungod sa pagkatigulang, di-maayong panglawas, o mga kaakohan sa pamilya. Apan, ang tanan kanato gisugo sa pagbuhat kutob gayod sa atong maarangan diha sa atong pag-alagad kang Jehova. (2 Tim. 2:15) Adunay mga kahigayonan nga bukas sa matag usa kanato sumala sa atong tinagsatagsa ka kahimtang. Unsa man ang pipila niini?

⁴ Mga Paagi sa Pagpalapad sa Atong Ministeryo: Kita gayod unang interesado sa pagpauswag sa kalidad sa atong ministeryo. Kini malampos pinaagig pag-ugmad sa dugang kahanas ingong magtutudlo. Ang usa sa lintunganay nga mga tumong sa Teokratikanhong Ministeryong Tunghaan mao ang pagtabang kanato sa pagkahimong mas epektibo diha sa ministeryo sa kanataran. Kita ba nagahunahuna sa bahing pag-alagad sa kanataran sa dihang nagapangandam sa atong mga asaynment? Ato bang ipadapat ang tambag nga atong madawat aron kita mouswag sa atong personal nga ministeryo? (sg p. 96-9) Mao man usab, daghang sugyot alang sa ministeryo sa kanataran ang ginahatag sa panahon sa Tigom sa Pag-alagad. Ato kining gamiton sa sayo nga maarangan.

⁵ Sunod, tagda ang posibilidad sa pagpasibo sa imong mga kahimtang aron makaambit sa katabang o regular payunir nga buluhaton. Ang paghimo niini tino nga magpapuliki kanimo diha sa pag-alagad sa atong Amahan, si Jehova. (1 Cor.15:58) Unsa man kon dili ka makaarang sa pagpayunir? Imong ikapakita ang espiritu sa pagpayunir pinaagig pag-ugmad sa dulot nga kabalaka sa mga tawo diha sa teritoryo. Imong magamit usab ang matag higayon sa pagbulig sa sinserong mga tawo sa pagkaila kang Jehova pinaagig mga balikduaw ug pagdumalag mga pagtuon sa Bibliya.

⁶ Sa dihang unang nakat-onan ta ang kamatuoran, ang gugma kang Jehova ug kang Kristo Jesus nagpalihok kanato sa paghimog dagkong mga kausaban sa atong kinabuhi. Karon, samtang kita nagatubo diha sa pagpabili sa atong relasyon uban sa atong langitnong Amahan ug kon unsa ang gibuhat sa iyang Anak alang sa atong kaayohan, aduna bay ubang mga kausaban nga atong mahimo aron mapalapad ang atong ministeryo? Tugoting atong hagoon ang atong kaugalingon pinaagig padayong pagkapuliki diha sa buluhaton ni Jehova.​—Roma 12:11.