Ang Tunghaan sa Teokratikanhong Ministeryo sa 1998
Ang pagkatinudloan nagakahulogang “natudloan o nahanas diha sa espesipikong kahibalo o katakos.” Pinaagi sa Tunghaan sa Teokratikanhong Ministeryo, kita kanunayng gibansay sa kahibalo sa Diyos. Usab, ang atong pagpakig-ambit niini nga tunghaan magtugot kanato sa pag-ugmad sa atong mga katakos sa pagsulti ug pagtudlo. Ang programa sa tunghaan sa 1998 magpaarang kanato sa daghang kahigayonan sa paghimog dugang espirituwal nga pag-uswag.
Samtang imong susihon ang eskedyul sa tunghaan sa sunod tuig, imong mamatikdan nga usahay ang Asaynment Num. 3 ipasukad sa usa ka karakter sa Bibliya nga makaplagan diha sa mga tomo sa Insight. Dugang pa, ang Kalipay sa Pamilya nga libro gidugang sa kurikulum sa 1998, ug ang mga Asaynment Num. 3 ug Num. 4 magkobre niana sa progresibong paagi. Sa panahon nga ang Kalipay sa Pamilya nga libro maoy basehanan sa Asaynment Num. 4, ang igsoong lalaki angayng magdumala niana ingong pakigpulong ngadto sa kongregasyon. Ug, ingong pahinumdom, walay mausa diha sa programa sa tunghaan ang mosobra sa oras.
Usa ka Bag-ong Bahin: Alang sa atong personal nga kaayohan, ang usa ka “Eskedyul sa Suplemental nga Pagbasa sa Bibliya” gipahiluna diha sa mga braket human gilayon sa numero sa awit alang sa matag semana. Bisan tuod walay mga bahin sa senemanang programa sa tunghaan ang gipasukad diha niana, himoang imong tumong ang pagsunod niana. Magpaarang kini kanimo nga mabatasan ang pagbasa sa Bibliya adlaw-adlaw kon wala pa nimo mahimo kana.
Alang sa dugang impormasyon bahin sa mga asaynment, tambag, ug sinulat nga mga repaso, palihog basaha pag-ayo ang mga instruksiyon nga makaplagan diha sa “Eskedyul sa Tunghaan sa Teokratikanhong Ministeryo sa 1998,” maingon man ang panid 3 sa Oktubre 1996 nga Atong Ministeryo sa Gingharian.
Kon wala ka pa malista sa Tunghaan sa Teokratikanhong Ministeryo, gidapit ka namo sa pagpalista na karon. Kining talagsaong tunghaan padayong nagadula ug hinungdanong papel sa pagbansay sa mapainubsanon ug debotadong mga alagad ni Jehova aron mahimong mas kuwalipikado ingong iyang mga ministro.—1 Tim. 4:13-16.