Aduna Ka ba ing “Tunok sa Unod”?

¹ Kita masibotong maninguha sa pagtuman sa atong sugo sa pagsangyaw sa maayong balita sa labing maayo nga atong maarangan. Daghan sa atong minahal nga mga igsoong lalaki ug babaye, hinunoa, malisdan sa bug-os nga pagpakig-ambit niana tungod kay ang seryosong pisikal nga mga sakit ug mga kaluyahon mobabag, nga magpalisod sa pagbuhat sa gidak-on nga gusto unta nila. Alang kanila, kana mahimong usa ka hagit aron buntogon ang mga pagbati sa kaluya, ilabina sa dihang makita nila ang uban sa ilang palibot nga aktibo kaayo diha sa ministeryo.​—1 Cor. 9:16.

² Usa ka Panig-ingnan nga Pagasunbogon: Ang apostol nga si Pablo kinahanglang makigbugno sa “tunok sa unod.” Tulo ka higayon nga siya nangaliyupo kang Jehova nga kuhaon ang makapasakit nga babag, nga iyang gihubit ingong “usa ka anghel ni Satanas” nga padayong nagsagpa kaniya. Apan, bisan pa niana, si Pablo milahutay ug mipadayon sa iyang ministeryo. Wala niya kaluy-i ang iyang kaugalingon o nahimong usa ka mapadayonong reklamador. Ang iyang labing maayo iyang gihatag. Ang yawi sa iyang kalamposan sa pagsagubang mao kining pasalig nga gikan sa Diyos: “Ang akong dili-takos nga kalulot igo na alang kanimo; kay ang akong gahom ginahimong hingpit diha sa kaluyahon.” Ang kahuyangan ni Pablo nahimong kalig-on sa dihang iyang nakat-onan ang pagdawat sa iyang kahimtang ug sa pagsalig kang Jehova ug sa balaang espiritu aron makalahutay.​—2 Cor. 12:7-10.

³ Kon sa Unsang Paagi Ikaw Makalahutay: Ang tawhanong kaluyahon makapahinay ba sa imong pag-alagad sa Diyos? Kon mao, sundoga ang panglantaw ni Pablo. Bisan pa kon ang imong sakit o kaluyahon walay permanenteng kaayohan niining sistemaha sa mga butang, ikaw makabutang sa imong bug-os nga pagsalig kang Jehova, kinsa mosabot sa imong mga panginahanglan ug motaganag “gahom nga labaw sa kasarangan.” (2 Cor. 4:7) Pahimusli ang tabang nga imong mabatonan diha sa kongregasyon, nga dili magpalain sa imong kaugalingon. (Prov. 18:1) Kon makaplagan mong lisod ang pagpakig-ambit sa buluhatong pamalaybalay, pangitag praktikal nga mga paagi sa pagsangyaw nga di-pormal o ginamit ang telepono.

⁴ Bisan tuod ang tunok sa unod tingali mopugong kon unsay imong mahimo sa ministeryo, dili kinahanglang mobati ka nga walay bahin sa ministeryo. Sama kang Pablo, ikaw usab makahimo nga “bug-os ipanaksi ang maayong balita bahin sa dili-takos nga kalulot sa Diyos,” nga mobuhat kon unsay itugot sa imong kusog ug mga kahimtang. (Buh. 20:24) Samtang ikaw maningkamot sa pagtuman sa imong ministeryo, hibaloi nga si Jehova malipay pag-ayo.​—Heb. 6:10.