‘Isul-ob ang Bag-ong Pagkatawo’
1 Gipabilhan sa mga Kristohanon ang pagkahibalo sa kamatuoran! Kita nakakat-on kon unsaon pagkinabuhi aron makalikay sa dalan niadtong anaa sa kalibotan. Kay “nahimulag gikan sa kinabuhi nga iya sa Diyos,” sila “anaa sa kangitngit sa kaisipan.” (Efe. 4:18) Kita natudloan sa pagbag-o sa atong mga hunahuna gikan sa kalibotanong panghunahuna pinaagi sa paghukas sa daang pagkatawo ug pagsul-ob sa bag-o.—Efe. 4:22-24.
2 Ang daang pagkatawo motultol sa padayong pag-us-os sa moral nga pagkaunlod, nga moresulta sa kahugawan ug kamatayon. Busa, atong awhagon kadtong maminaw sa mensahe sa Gingharian sa pagwaksi sa tanang kapungot, kasuko, kadaotan, abusadong sinultihan, ug law-ayng pinulongan. Kadtong naninguha sa pag-uyon sa Diyos kinahanglang maghukas sa daang pagkatawo sa tino ug bug-os nga paagi—sa paagi gayod sa ilang paghukas sa hugawng besti.—Col. 3:8, 9.
3 Usa ka Bag-ong Puwersa nga Nagapalihok sa Hunahuna: Ang pagsul-ob sa bag-ong pagkatawo nagalakip sa pagbag-o sa puwersa nga nagapalihok sa mga hunahuna. (Efe. 4:23) Sa unsang paagi ang usa maghimo sa maong puwersa, o disposisyon sa hunahuna, nga bag-o aron mokiling sa hustong direksiyon? Mahimo kini pinaagig regular ug makugihong pagtuon sa Pulong sa Diyos ug pagpamalandong kon unsay ipasabot niini. Dayon, ang bag-ong sumbanan sa panghunahuna maugmad, ug ang tawo molantaw sa mga butang sumala sa panglantaw sa Diyos ug ni Kristo. Ang kinabuhi sa usa mabag-o samtang iyang bestihan ang kaugalingon sa daghang samag-Kristong mga hiyas, lakip ang pagkamabination, kalulot, pagkamapaubsanon sa hunahuna, kalumo, pagkamainantoson, ug gugma.—Col. 3:10, 12-14.
4 Pinaagig pagsul-ob sa bag-ong pagkatawo, atong gibulag ang atong kaugalingon gikan sa kalibotan. Ang atong paagi sa kinabuhi makapalahi kanato. Kita mosulti sa kamatuoran ug mogamit sa maayong sinultihan sa pagpalig-on sa uban. Atong makontrolar ang atong kasuko, kapungot, sininggitay, pagkaabusado, ug tanang pagkadaotan ug pulihan kini uban sa matarong, diyosnong mga hiyas. Mosaylo kita sa kon unsay kasagarang gikinahanglan kanato sa pagkamapinasayloon. Kining tanan daling mahimo gikan sa kasingkasing.—Efe. 4:25-32.
5 Ayaw gayod hukasa ang bag-ong pagkatawo. Dili kita makaalagad kang Jehova sa dalawatong paagi kon wala kana. Tugoting motabang kana sa pagbutad sa mga tawo ngadto sa kamatuoran, ug tugoti kana sa paghimaya kang Jehova, ang Maglalalang sa atong kahibulongang bag-ong pagkatawo.—Efe. 4:24.