Pagpadako sa Pagpamatuod Samtang Nagkaduol ang Kataposan
1 Ang panahon sa pagpangani maoy usa ka mangayaong panahon. Panahon usab kana sa hagong buluhaton. Aduna lamang ing limitadong panahon sa pagtigom sa mga abot. Ang mga mamumuo kinahanglang dili maglangaylangay sa ilang gimbuhaton.
2 Nga misulting mahulagwayon, si Jesus mitandi sa “usa ka katiklopan sa usa ka sistema sa mga butang” ngadto sa ting-ani. (Mat. 13:39) Kita nagkinabuhi sa konklusyon niining sistemaha sa mga butang, nga may limitadong panahong nahibilin sa pagpamatuod “sa tibuok gipuy-ang yuta.” (Mat. 24:14) Samtang ang kataposan nagakahiduol na gayod, kinahanglang atong padak-an pa ang atong pakig-ambit diha sa ministeryo. Ngano? Si Jesus mipatin-aw: “Dako ang anihon, apan diyutay ang mga mamumuo.”—Mat. 9:37, 38; Roma 12:11.
3 Magmadinalion Diha Niini: Sa dihang gisugdan ni Jesus ang iyang buluhatong pagsangyaw, siya aduna lamay tulo ug tunga ka tuig aron tumanon ang gipabuhat kaniya. Nagsangyaw siya uban ang pagbati sa pagkadinalian, nga nag-ingon: “Kinahanglan kong ipahayag ang maayong balita sa gingharian sa Diyos, tungod kay alang niini ako gipadala.”—Luc. 4:43.
4 Gisilsil ni Jesus sa iyang mga tinun-an ang susamang pagbati sa pagkadinalian. (Mar. 13:32-37) Kana ang hinungdan kon nganong sa “matag adlaw diha sa templo ug sa balay ug balay sila nagpadayong walay hunong sa pagpanudlo ug sa pagpahayag sa maayong balita bahin sa Kristo, si Jesus.” (Buh. 5:42) Ang di-kaayo hinungdanong mga kalihokan wala himoang panguna sa ilang mga kinabuhi. Bisag ang mga tinun-an gamay ra, sila nagmalamposon sa pagwali sa maayong balita “sa tibuok kalalangan ilalom sa langit.”—Col. 1:23.
5 Aduna pa ganiy mas dakong katarongan alang kanato sa pag-ugmad nianang samang pagbati sa pagkadinalian karon, tungod kay “ang kataposan sa tanang butang duol na.” (1 Ped. 4:7) Si Jehova nagtakda ug adlaw ug oras alang sa kataposan niining sistema sa mga butang. (Mat. 24:36) Ang buluhatong pagsangyaw pagataposon sa panahong nahibilin. Kana ang hinungdan kon nganong kita magpadayon sa pagpauswag sa atong mga paningkamot aron maabot ang dugang ug dugang mga tawo dala ang maayong balita.
6 Pinaagig pagpadako sa atong pakig-ambit diha sa buluhatong pagsangyaw samtang nagkaduol ang kataposan, kita makabaton ug katagbawan sa pag-ingon kang Jehova, sama sa gibuhat ni Jesus: ‘Among natapos ang buluhaton nga imong gihatag kanamo nga buhaton.’—Juan 17:4.