“Iwali ang Pulong . . . Magmadalion”
1 Kon makadawat ka ug usa ka butang nga namarkahan ug “DINALIAN,” unsay imong panglantaw niana? Ang pulong “dinalian” nagkahulogan ug “nanginahanglag dihadihang pagtagad.” Tungod sa maayong katarongan, si apostol Pablo nagsugo sa mga Kristohanon nga “iwali ang pulong . . . magmadalion.” (2 Tim. 4:2) Ikaw ba mosanong pinaagig paghatag niining buluhatona sa imong dihadihang pagtagad?
2 Gitaho na tingali kang Pablo nga ang pipila sa iyang mga igsoon nagpakitag hilig sa ‘paglangaylangay sa ilang alatimanon’ ingong mga Kristohanon. (Roma 12:11) Kini naglimite sa mga sangpotanan sa ilang mga paghago maingon man sa kalipay nga ila untang nadawat sa laing paagi gumikan sa pagtabang sa uban.
3 Ang Panglantaw ni Jesus sa Ministeryo: Pagkadakong kalipay ang nakaplagan ni Jesus diha sa pagtuman sa iyang ministeryo! Siya miingon: “Ang akong pagkaon mao ang pagbuhat ko sa kabubut-on niya nga nagpadala kanako ug ang paghuman sa iyang buluhaton.” Ang panig-ingnan ni Jesus nagtukmod sa iyang mga tinun-an, kinsa iyang gidasig pinaagi sa pagsulti kanila nga ‘ang kaumahan puti na aron anihon.’ (Juan 4:34, 35) Ang pagsabot sa pagkadinalian nga iyang gipasundayag sa tibuok niyang ministeryo nadayag sa dihang iyang gisultihan ang iyang mga tinun-an sa ‘pagpangamuyo sa Agalon sa anihon nga magpadalag mga mamumuo ngadto sa iyang anihon.’ (Mat. 9:38) Gipabilhan ni Jesus nga ang iyang buluhaton mao ang pagsangyaw, ug siya determinado nga dili tugotan ang bisan unsa nga mopugong kaniya gikan sa pagbuhat sa ingon.
4 Komosta Kita? Karong adlawa, adunay mas dakong pagkadinalian kay sukad masukad sa pagpadayon sa buluhatong pagsangyaw. Sa daghang bahin sa kalibotan, ang mga umahan hinog na aron anihon. Bisan sa mga nasod diin ang bug-os nga pagpamatuod daw gikahatag na, linibo pa ang nabawtismohan matag tuig. Tungod kay ang kataposan niining sistema sa mga butang tulin nga nagasingabot, adunay “daghang buhaton diha sa buluhaton sa Ginoo.” (1 Cor. 15:58) Labaw kay sa bisan unsang ubang panahon, hinungdanon nga manikaysikay gayod sa atong kaugalingon nga ipakig-ambit ang mensahe sa Gingharian ngadto sa uban.
5 Tugoting magmaikagon kita nga aboton ang uban pinaagig maayong balita, sa pamalaybalay man ug bisan asa nga makaplagan ang mga tawo diha sa teritoryo. Pinaagi sa bug-os nga pagpakig-ambit kutob sa maarangan diha sa buluhatong pagsangyaw, atong tatawng ginapasundayag nga giuna ta ang Gingharian diha sa atong mga kinabuhi. (Mat. 6:33) Ang atong pagkamatinumanon sa pagsangyaw sa pulong nga dinalian mohatag kanatog dakong kalipay.