Unsay Imong Isulti Ngadto sa Usa ka Budhista?
1 Sa ubang kayutaan kapin sa katunga niadtong mga nagpabawtismo maoy sa Budhistang kagikan. Unsay nakapadani niini nila ngadto sa kamatuoran? Sanglit sa Pilipinas adunay daghang Insek nga gimatuto ingong mga Budhista, unsaon man nato sa pagpresentar sa maayong balita ngadto kanila?
2 Ipakita ang Tiunay nga Kabalaka: Daghang kanhing mga Budhista miingon nga dili ang lalom nga pangatarongan ang nakadani kanila sa kamatuoran. Hinunoa, sila natandog sa gipakitang tiunayng personal nga kabalaka kanila. Usa ka babayeng taga-Asia nga nagpuyo sa Tinipong Bansa nakadayeg kaayo sa kamahigalaon sa sister nga miduaw kaniya nga miuyon siya sa pagtuon. Dili siya makasultig maayo ug Ingles, apan ang sister mapailobon. Sa dihang ang babaye kapoyon o dili makahimo sa pagtuon, ang sister moduaw na lang nga mahigalaon ug hikayon ang sunod nga sesyon. Ngadtongadto ang babaye, ang iyang duha ka anak nga lalaki, ug ang iyang tigulang nga inahan nabawtismohan. Mibalik siya sa iyang yutang natawhan ug mitabang sa daghang uban pa sa pagkat-on sa kamatuoran. Ang usa sa iyang mga anak nga lalaki karon nag-alagad sa sangang buhatan. Pagkadaghang panalangin ang miresulta tungod sa pagpabanaag sa ‘kalulot ug gugma sa tawo’ ni Jehova!—Tito 3:4.
3 Gituohan sa Budhista: Ang mga Budhista sagad nga matinugoton sa ubang mga ideya, apan wala nila isipa nga hinungdanon ang pagtapot sa espesipikong doktrina. Busa ang ilang indibiduwal nga mga tinuohan nagkalahi. Ang komon nga tema sa usa ka sanga sa pagtulon-an sa Budhista mao nga ang kinabuhi puno ug pag-antos, apan pinaagi sa kalamdagan, ang usa makapahunong sa padayong siklo sa pagkatawo pag-usab ngadto sa di-makapatagbawng mga kinabuhi. Gikaingon nga aron makalingkawas gikan niini nga siklo, kinahanglang makab-ot sa usa ang Nirvana, usa ka kahimtang nga dili ikahubit tungod kay kini dili usa ka dapit o usa ka hitabo kondili, hinunoa, usa ka haw-ang nga ang kasakit ug daotan wala maglungtad. (Tan-awa ang Unsay Mahitabo Kanato sa Dihang Mamatay Kita?, mga panid 9-10.) Unsay gisulti niini kanato? Nga dili magmabungahon ang pagpakigdebate sa mga tawo bahin sa Budhistang pilosopiya. Hinunoa, hisgoti ang komon nga mga problema nga gikabalak-an sa tanan.
4 Ipasiugda ang Managsamang mga Interes: Sanglit ang mga Budhista sagad naglantaw sa kinabuhi sa yuta uban ang pag-antos, ang ideya sa walay kataposang kinabuhi sa yuta mahimong sa ilang paminaw dili makataronganon. Sa gihapon, kitang tanan managsamang nagtinguha sa pagpahimulos ug malipayong pamilyahanong kinabuhi, sa pagtan-aw nga mawagtang ang kasakit, ug sa pagkahibalo sa kahulogan sa kinabuhi. Matikdi kon sa unsang paagi kanang managsamang mga panginahanglan ikapasiugda.
5 Mahimo nimong sulayan kini nga introduksiyon:
◼ “Karong adlawa kita nagpuyo sa usa ka kalibotan nga daghang inosenteng tawo ang nag-antos. Unsay imong gituohan nga gikinahanglan sa pagtapos sa kasakit ug kaguol alang sa tanan? [Tugoting motubag.] Adunay karaang saad nga nakapahupay kaayo kanako. [Basaha ang Pinadayag 21:4.] Siyempre, ang maong panahon wala pa moabot, apan sa dihang kini moabot, gusto natong makita kini, di ba?” Dayon motanyag ug publikasyon nga nagsaysay kon sa unsang paagi ang pag-antos taposon.
6 Ngadto sa tigulang nga tawo, ikaw mahimong moingon:
◼ “Lagmit ikaw nabalaka sama kanako bahin sa presenteng pagbaha sa imoral nga ideya ug sa epekto niini diha sa atong mga anak. Nganong adunay ingon nianang pag-uswag sa imoralidad taliwala sa mga batan-on? [Tugoting motubag.] Nahibalo ka ba nga kini gitagna sa basahon nga gisugdan pagsulat dugay na kanhi sa wala pa matukod ang Muslim, Kristohanon, ug Hindu nga mga relihiyon? [Basaha ang 2 Timoteo 3:1-3.] Matikdi nga kining mga kahimtanga naglungtad bisan pa sa padayong pagkat-on. [Basaha ang bersikulo 7.] Kini nga publikasyon nakatabang kanako sa pagsabot sa kamatuoran nga wala gayod makat-oni sa kadaghanang tawo. Buot ka bang mobasa niini?” Itanyag ang haom nga libro o brosyur.
7 Ang mga Budhista sagad nga nagtahod sa Bibliya ingong usa ka sagradong sinulat. Busa deretso nga magbasa gikan niana. (Heb. 4:12) Kon ang tawo magduhaduha bahin sa impluwensiya sa kulturang Kasadpan, isulti kaniya nga ang tanang magsusulat sa Bibliya maoy mga taga-Asia.
8 Unsang mga Publikasyon ang Labing Epektibo? Dugang pa sa atong mga tract, nga mabatonan sa Ininsek, daghang magmamantala ang malamposong naggamit sa mosunod nga mga literatura: ang mga librong Pagpangita sa Katawhan sa Diyos, Ang Sekreto sa Kalipay sa Pamilya, ug Mga Pangutanang Gisukna sa mga Batan-on—Mga Tubag nga Mosaler; ang mga brosyur nga “Tan-awa! Ginabag-o Ko ang Tanang Butang,” ug Unsa ang Katuyoan sa Kinabuhi—Sa Unsang Paagi Makaplagan Nimo Kini?; ug, kon mabatonan pa, Kingdom News No. 35, Maghigugmaay pa Kaha ang Tanang Tawo sa Usag Usa? Kadaghanang mga Budhista nga karon nakakat-on sa kamatuoran nagtuon una sa Gikinahanglan nga brosyur ug dayon ang Kahibalo nga libro.
9 Bisan tuod ang mga misyonaryong Budhista gikaingon nga midangat sa Atenas duolan sa 400 ka tuig sa wala pa si Pablo magsangyaw didto, dili tino kon siya gayod nakahibalag ug usa ka tawo nga naimpluwensiyahan sa Budhistang panghunahuna. Bisan pa niana, kita nahibalo kon unsay pagbati ni Pablo bahin sa pagsangyaw sa tanang matang sa katawhan. Iyang gihimo ang iyang kaugalingon nga “ulipon sa tanan” aron iyang ‘maluwas sa bisan unsa mang paagi ang pipila.’ (1 Cor. 9:19-23) Atong mabuhat ang sama niana pinaagig pagpakitag personal nga interes sa mga tawo ug pinaagig pagpasiugda sa paglaom nga managsama natong gihuptan samtang kita magpamatuod ngadto sa tanan nga atong mahibalag.