Mobalhin Ka Ba?
Sa dihang ang tubag nianang pangutanaha maoy oo, adunay daghang butang nga ikaw ug ang uban nagkinahanglan sa paghimog inisyatibo. Pinaagi sa pagsunod sa paninugdang mga tikang nga gilaraw sa ubos, ikaw daling maestablisar sa imong bag-ong kongregasyon.
(1) Sa dihang ikaw nahibalo kon asa ka mobalhin, ang imong presenteng sekretaryo sa kongregasyon tingali makakuha sa adres sa Kingdom Hall sa imong bag-ong kongregasyon. Sa pag-abot sa maong dapit, dihadiha pangitaa ang tigomanan ug tinoa ang mga panahon sa tigom sa kongregasyon. Kon kapin sa usa ka kongregasyon ang naggamit sa Kingdom Hall, pangutan-a ang mga ansiyano kon kang kinsang teritoryo sa kongregasyon nasakop ang imong gipuy-an. Ayaw paglangan sa pagtambong sa mga tigom ug sa pagsinati sa lokal nga mga ansiyano.
(2) Ang mga sekretaryo sa presente nimong kongregasyon ug sa imong bag-ong kongregasyon makigtambayayong sa pagbalhin sa Congregation’s Publisher Record nga kard para nimo ug sa imong pamilya. Ang usa ka sulat nga pagpailaila ipadala usab ngadto sa mga ansiyano sa imong bag-ong kongregasyon. (Tan-awa ang Marso 1991 nga Atong Ministeryo sa Gingharian nga “Pangutana.”) Kinahanglang pahibaloon sa Komite sa Pag-alagad sa Kongregasyon didto ang haom nga tagdumala sa pagtuon sa libro bahin sa imong pag-abot aron siya makakontak kanimo ug tabangan ka sa pagtino sa dapit sa imong bag-ong grupo sa pagtuon sa libro.—Roma 15:7.
(3) Ang tanang magmamantala sa imong bag-ong kongregasyon adunay mangayaong bahin nga dulaon—ang pagsinati kanimo ug mopabati kanimong giabiabi. (Itandi ang 3 Juan 8.) Siyempre, kini nagkahulogan nga ikaw kinahanglang presente sa mga tigom aron ikaw makapahimulos sa makapadasig ug makapalig-ong panaghisgot uban sa mga igsoong lalaki ug babaye.
(4) Ikaw dili na angay nga maghulat pa hangtod nga ang tanang trabaho nga nalangkit sa pagbalhin makompleto antes makig-ambit diha sa ministeryo sa kanataran sa imong bag-ong kongregasyon. Samtang unahon nimo ang intereses sa Gingharian, ang ubang mga butang maatiman, ug ikaw mobating komportable kaayo sa imong bag-ong mga palibot. (Mat. 6:33) Sa dihang ikaw nahiluna na sa imong bag-ong puy-anan, lagmit buot nimong dapiton ang pipila sa kongregasyon sa pagduaw ug mas masinati pa.—Roma 12:13b.
Ang pagbalhin maoy usa ka dakong proyekto. Apan, kon ang tanang nalangkit mobuhat sa kon unsay girekomendar, wala unyay espirituwal nga mga kakulian. Ang tanang nalangkit makadayeg sa atong mahigugmaong Kristohanong panag-igsoonay.