Kon Unsaon nga Maka-adjust sa Bag-ong Kongregasyon

Si Nicolas ug Céline nakaatubang ug lahi nga kalisdanan. Nakadawat silag asaynment sa sangang buhatan sa France nga mobalhin ug laing kongregasyon. Sila miingon: “Eksayting kaayo ni sa primero, pero wala madugay, nalisdan mi kay gimingaw mi sa among mga higala. Wala pa kaayo mi nasuod sa mga igsoon sa among bag-ong kongregasyon.”a Bisan pa sa mga kalisdanan, sa unsang paagi ka magmalipayon ug magmadasigon sa imong bag-ong kongregasyon? Unsa kahay matabang sa uban? Unsang mga panalangin ang imong madawat ug mahatag diha sa imong bag-ong kongregasyon?

UPAT KA PRINSIPYO NGA MAKATABANG NIMO SA PAG-ADJUST

1. Salig kang Jehova. (Sal. 37:5) Si Kazumi, sister nga taga-Japan, 20 ka tuig na sa iyang kongregasyon. Pero sa dihang nabalhin ug trabaho ang iyang bana, mibalhin pod silag kongregasyon. Giunsa niya pagpakita ang iyang pagsalig kang Jehova? Siya miingon: “Balikbalik nakong gisulti kang Jehova ang tanan nakong kaguol, kamingaw, ug kabalaka. Sa matag higayon nga ako ning himoon, hatagan ko niyag kusog nga akong gikinahanglan.”

Unsay imong himoon aron mas molig-on ang imong pagsalig kang Jehova? Ang tanom nagkinahanglag tubig ug sustansiya gikan sa yuta aron motubo. Ingon ana pod ang atong pagtuo. Kinahanglang naa tay himoon aron motubo ug molig-on ni. Si Nicolas, nga gihisgotan sa ibabaw, nakakat-on sa mga ehemplo ni Abraham, Jesus, ug Pablo. Gipamalandong niya ang ilang mga sakripisyo sa pagbuhat sa kabubut-on sa Diyos, ug nakapalig-on ni sa iyang pagsalig nga tabangan gyod siya ni Jehova. Ang regular nga pagtuon sa Bibliya makatabang nimo nga maka-adjust sa bisan unsang kausaban sa imong kinabuhi. Makakat-on pod kag nindot nga mga punto nga magamit nimo sa pagdasig sa uban diha sa imong bag-ong kongregasyon.

2. Likayi ang pagkompara. (Eccl. 7:10) Si Jules, nga gikan sa Benin, nag-adjust sa lahi kaayo nga kultura dihang mibalhin siya sa United States. “Gibati nako nga kinahanglan nakong sultihan bahin sa akong kaugalingon ang kada igsoon nga akong mailaila,” si Jules miingon. Tungod kay lahi kaayo ni sa iyang naandan, misugod siyag likay sa mga igsoon. Pero sa dihang mas nailhan niya ang mga igsoon, giusab niya ang iyang panglantaw. Siya miingon: “Nakat-onan nako nga bisag asa pa ta nagpuyo, parehas ra tang tanan. Lainlain lang tag paagi sa pagsulti ug pagtratar sa uban. Maong importante nga dawaton nato ang mga tawo kon kinsa gyod sila.” Busa, likayi nga ikompara ang imong kongregasyon kaniadto sa imong kongregasyon karon. Usa ka payunir nga sister nga si Anne-Lise miingon: “Wala ko mibalhin aron makita kon unsay naa sa akong kongregasyon kaniadto nga wala sa akong kongregasyon karon. Mibalhin ko aron makakat-on ug bag-ong mga butang.”

Ang mga ansiyano kinahanglan pod mag-amping nga dili ikompara ang ilang kongregasyon karon sa ilang kongregasyon kaniadto. Ang mga brader sa inyong bag-ong kongregasyon lahi tingalig mga pamaagi. Pero wala na magpasabot nga sayop ang tanan nilang ginahimo. Maalamon gyod nga mahibaloan una nimo ang lokal nga mga kahimtang sa dili pa mohatag ug mga sugyot. (Eccl. 3:​1, 7b) Mas maayo nga manguna sa pagpakitag maayong ehemplo kay sa ipamugos ang imong opinyon diha sa kongregasyon.—2 Cor. 1:24.

3. Pakigbahin sa mga kalihokan sa kongregasyon. (Filip. 1:27) Ang pagbalhin nagkinahanglag dakong panahon ug kusog. Pero importante nga motambong dayon ka sa mga tigom in person kon posible. Kon dili ka motambong o panagsa ra ka motambong, malisdan tingali ang mga igsoon sa pagtabang nimo. Si Lucinda, uban sa iyang duha ka anak nga babaye, mibalhin sa usa ka dakong siyudad sa South Africa. Siya miingon: “Giingnan ko sa akong mga higala nga makigsuod dayon sa mga igsoon sa kongregasyon, makig-uban nila sa pagsangyaw, ug mokomento sa mga tigom. Gipagamit pod namo among balay para sa mga tigom sa pagsangyaw.”

Ang ‘pagtinabangay’ uban sa mga igsoon diha sa mga kalihokan sa bag-ong kongregasyon maoy usa ka maayong paagi nga mapalig-on nimo ang imong pagtuo ug ang pagtuo sa uban. Si Anne-Lise, nga gihisgotan ganina, gidasig sa mga ansiyano nga mouban sa lainlaing mga igsoon sa pagsangyaw. Unsay resulta? “Nakita dayon nako nga usa ni sa mga paagi aron masuod ko sa kongregasyon,” siya miingon. Dugang pa, ang pagboluntaryo sa mga kalihokan sama sa pagpanghinlo ug pagmentinar sa Kingdom Hall nagpakita nga giisip nimo nga bahin na ka sa kongregasyon. Samtang padayon kang makig-uban sa mga igsoon, mas dali kang masuod nila ug bation dayon nimo nga imo silang pamilya.

4. Pakighigala sa mga igsoon. (2 Cor. 6:​11-13) Ang pagpakitag personal nga interes mao ang pinakamaayong paagi aron makakitag mga higala. Busa paggahin ug panahon sa dili pa magsugod ang tigom ug human sa tigom aron makig-estorya ug makig-ilaila sa mga igsoon. Paningkamoti nga mahinumdoman ang ilang mga ngalan. Kon hinumdoman nimo ang ilang mga ngalan ug mahigalaon ka ug daling duolon, mas ganahan silang makig-uban nimo ug mas magkasuod mo.

Imbes mabalaka kon dawaton ba ka sa mga igsoon, tugoti sila nga mailhan kon kinsa gyod ka. Puwede nimong himoon ang giingon ni Lucinda, “Mihimo mig mga paagi aron maimbitar ang mga igsoon sa among balay. Tungod ana, nakabaton mi karon ug suod nga mga higala.”

“ABIABIHA ANG USAG USA”

Ang uban tingali makulbaan sa dihang mosulod sila sa Kingdom Hall nga walay kaila. Busa unsaon nimo pagtabang kadtong bag-ong mibalhin sa inyong kongregasyon? Si apostol Pablo nagdasig: “Abiabiha ang usag usa, sama nga gidawat mo sa Kristo.” (Roma 15:​7, footnote) Pinaagi sa pagsundog sa Kristo, matabangan sa mga ansiyano ang bag-ong mga namalhin nga mobati nga bahin sila sa kongregasyon. (Tan-awa ang kahong “Mga Paagi nga Molampos ang Imong Pagbalhin.”) Pero ang tanan diha sa kongregasyon, apil ang mga bata, makatabang sa pag-abiabi sa mga namalhin.

Ang pag-abiabi dili lang kutob sa pag-imbitar kanila sa atong balay. Apil pod tingali ani ang paghatag kanilag praktikal nga tabang. Pananglitan, ang usa ka sister naggahin ug panahon aron tabangan ang igsoon nga bag-ong mibalhin nga mapamilyar sa palibot ug kon unsay sakyan kon naa siyay lakaw. Naapresyar gyod sa igsoon ang gihimo sa sister ug nakatabang ni niya nga maka-adjust.

KAHIGAYONAN NGA MOUSWAG

Samtang magkahamtong ang usa ka dulon, ang iyang panit daghang beses nga matangtang hangtod nga ang mga pako niini makahimo na sa paglupad. Sa samang paagi, dihang mobalhin ug laing kongregasyon, kinahanglan nimong tangtangon ang bisan unsang kabalaka nga makapugong nimo sa pagbukhad sa imong mga pako diha sa pag-alagad kang Jehova. “Maayo gyod nga pagbansay ang pagbalhin,” miingon si Nicolas ug Céline. “Aron maka-adjust sa bag-ong mga tawo ug bag-ong lugar, kinahanglan ming mag-ugmad ug bag-ong mga hiyas.” Si Jean-Charles, nga gihisgotan sa sinugdanan niini nga artikulo, miingon kon unsa nga kaayohan ang nadawat sa iyang pamilya: “Ang pagbalhin sa laing kongregasyon nakatabang sa among mga anak nga mouswag. Human lang sa pipila ka bulan, ang among anak nga babaye naa nay bahin sa midweek nga tigom, ug ang among anak nga lalaki nahimo nang dili bawtismadong magmamantala.”

Komosta kon gusto kang mobalhin sa lugar nga mas dakog panginahanglan pero dili ni kaya sa imong kahimtang? Puwede nimong isipon ang imong presenteng kongregasyon ingong bag-ong kongregasyon ug ipadapat ang mga sugyot nga gihisgotan niining artikuloha. Samtang mosalig ka kang Jehova, pakigbahin kanunay sa mga kalihokan sa kongregasyon. Mahimo nimo na kon makig-uban ka sa mga igsoon diha sa pagsangyaw, makighigala sa uban pang mga igsoon, ug padayong makigsuod niadtong nailhan na nimo. Puwede pod kang mohatag ug praktikal nga tabang sa mga bag-ohan o sa mga nanginahanglan. Kon himoon nimo na, mas masuod ka kang Jehova, ug mapakita nimo ang gugma nga maoy ilhanan sa tinuod nga mga Kristohanon. (Juan 13:35) Makaseguro gyod ka nga “malipay pag-ayo ang Diyos sa maong mga halad.”—Heb. 13:16.

Bisan pa sa mga kalisdanan, daghang igsoon ang milampos sa pagbalhin ug laing kongregasyon, ug mahimo pod na nimo! Si Anne-Lise miingon: “Ang pagbalhin ug laing kongregasyon nakatabang nako nga mas masuod sa daghang igsoon.” Si Kazumi kombinsido gyod nga miingon: “Imong maeksperyensiyahan ang tabang ni Jehova sa paagi nga wala pa nimo masulayi sukad.” Komosta pod si Jules? Siya miingon: “Tungod sa akong mga higala sa bag-ong kongregasyon, wala na gyod ko mobati nga nag-inusara. Suod na kaayo ko sa mga igsoon, ug malisdan gyod tingali kog biya kon ugaling mobalhin ko.”