Unsay Imong Isulti Ngadto sa Usa ka Ateyista?

¹ “Usa ako ka ateyista,” usa ka propesora nga taga-Polandia miingon sa usa ka misyonarya sa Aprika. Apan, ang sister nakapahigayon sa panaghisgot uban sa babaye ug mihatag kaniyag libro nga Life​—How Did It Get Here? By Evolution or by Creation? Sa dihang ang misyonarya mibalik sa pagkasunod semana, ang propesora miingon kaniya: “Ako dili na usa ka ateyista!” Iyang nabasa ang tibuok librong Creation ug karon mihangyo ug pagtuon sa Bibliya. Unsay imong mahimo aron molampos sa paghatag ug pamatuod ngadto kanilang kinsa moingon nga sila dili motuo sa Diyos? Una, tagda ang lainlaing mga katarongan kon nganong ang mga tawo mihimo niini nga pangangkon.

² Mga Butang nga Nakaamot sa Kawalay-Pagtuo: Dili tanang ateyista gimatuto sa ingon. Daghan ang naladlad sa usa ka matang sa relihiyon ug sa usa ka panahon mituo sa Diyos. Apan, ang seryosong mga suliran sa panglawas o pamilya o pipila ka inhustisya nga ilang nasinati nagpahuyang sa ilang pagtuo. Alang sa uban, ang mga kurso nga gitudlo sa mga eskuylahan sa labawng edukasyon adunay negatibong epekto sa ilang ideya sa Diyos. Matikdi ang mosunod nga mga panig-ingnan sa mga ateyista nga sa ngadtongadto nakaugmad ug lig-ong pagtuo kang Jehova nga Diyos ug nahimong iyang mga Saksi.

³ Usa ka babaye sa Paris natawo nga dunay makapaluyang sakit sa bukog. Bisan tuod bawtismado ingong usa ka Katoliko, siya nagpahayag sa iyang kaugalingon nga ateyista. Sa dihang iyang gipangutana ang mga madre kon nganong ang Diyos nagtugot kaniya nga matawo uban sa maong kakulian, ang ilang tubag mao: “Tungod kay siya nahigugma kanimo.” Siya midumili sa pagdawat nianang di-makataronganong ideya. Dugang pa, tagda ang usa ka batan-on sa Pinlandia kinsa nadayagnos nga dunay di-maulian nga sakit sa kusog ug anaa na lang kanunay sa wheelchair. Gidala siya sa iyang inahan ngadto sa usa ka Pentekostal nga nangangkon nga moayo ug masakitong mga tawo. Apan wala ing milagrosong pagkaayo. Ingong resulta, ang batan-ong lalaki nawad-ag interes sa Diyos ug nahimong ateyista.

⁴ Usa ka lalaki sa Honduras gimatuto ingong Katoliko apan nagtuon ug Sosyalistang pilosopiya ug ateyismo. Kay nakombinsir sa pagtudlo sa unibersidad nga ang katawhan maoy produkto sa ebolusyon, siya mihunong na sa pagtuo sa Diyos. Sa susama, usa ka babaye sa Tinipong Bansa gimatuto ingong Metodista. Sa kolehiyo, siya mikuhag sikolohiya nga mga klase. Sa unsang paagi naapektohan ang iyang pagtuo? Siya miingon: “Sa usa ka ting-init ilang gibungkag ang tanang pagtuo nga akong nabatonan sa relihiyon.”

⁵ Pag-abot sa mga Kasingkasing sa Sinserong mga Tawo: Daghang indibiduwal nga moingon nga sila dili motuo sa Diyos moapresyar nga masayod kon duna bay solusyon sa mga suliran sa dili maayong panglawas, panagbingkil sa pamilya, inhustisya, ug uban pa. Sila tim-os nga interesado sa pagpangitag mga tubag sa maong mga pangutana sama sa: ‘Nganong naglungtad ang daotan?’ ‘Nganong nahitabo ang daotang mga butang ngadto sa maayong mga tawo?’ ug ‘Unsay kahulogan sa kinabuhi?’

⁶ Usa ka bana ug asawa nga nagpuyo sa Switzerland parehong namatuto ingong mga ateyista. Sa dihang sila unang nakontak sa kamatuoran, ang ilang sanong maoy negatibo. Apan dihay ilang seryosong mga suliran sa pamilya ug naghunahunang magdiborsiyo. Sa dihang ang magtiayong Saksi miduaw pag-usab, ilang gipakitaan ang magtiayon gikan sa Bibliya kon unsaon sa pagbuntog sa ilang mga suliran. Ang magtiayon nahingangha sa praktikal nga tambag nga anaa sa Kasulatan, ug sila miuyon sa usa ka pagtuon sa Bibliya. Ang ilang kaminyoon nalig-on, sila miuswag sa espirituwal, ug sila nabawtismohan.

⁷ Kon Unsay Mahimo Nimong Isulti sa Usa ka Ateyista: Sa dihang ang usa moingon kanimo nga siya usa ka ateyista, paningkamoting mabutyag ang katarongan kon nganong siya nakasulti niana. Tungod ba kana sa edukasyon nga iyang nadawat, sa mga suliran nga iyang nasinati, o sa relihiyosong pagkasalingkapaw ug bakak nga mga pagtulon-an nga iyang nakita? Mahimong pangutan-on nimo siya: “Ikaw ba mibati kanunay niining paagiha?” o “Unsay katarongan sa imong konklusyon?” Ang iyang tubag motabang kanimo sa pagtino kon unsay isulti. Diin ang kusganong mga argumento gikinahanglan, ang librong Is There a Creator Who Cares About You? hayan mao gayod ang gikinahanglan.

⁸ Ikaw tingali makapadayon sa panaghisgot sa usa ka ateyista pinaagi sa pagsukna:

◼ “Nahibulong ka ba sukad: ‘Kon adunay usa ka Diyos, nganong adunay hilabihang pag-antos ug inhustisya sa kalibotan?’ [Tugoting motubag.] Mahimo bang akong ipakita kanimo ang hunahuna sa Bibliya bahin niining ulohana?” Basaha ang Jeremias 10:23. Human mabasa kana, pangayoa ang iyang opinyon sa teksto. Dayon ipakita kaniya ang mga panid 16 ug 17 diha sa brosyur nga Will There Ever Be a World With­out War? O, hinunoa, mahimong imong gamiton ang kapitulo 10 sa librong Creator. Dasiga siya sa pagdawat sa publikasyon ug basahon ang materyal.​—Alang sa dugang mga sugyot, tan-awa ang librong Nangatarongan, mga panid 146-47.

⁹ Ang tinuod, dili tanang ateyista modawat sa kamatuoran. Apan dunay daghan nga andam sa pagkonsiderar sa laing hunahuna. Gamita ang lohiko, pangdani ug, labaw sa tanan, ang gahom sa Pulong sa Diyos sa pagtabang kanila nga masabtan ang kamatuoran.​—Buh. 28:​23, 24; Heb. 4:12.