Atong Ginasangyaw ang Maayong Balita

¹ Pagkatalagsaong pribilehiyong atong nahuptan ingong mga magdadala sa “maayong balita sa maayong mga butang!” (Roma 10:15) Aduna kitay makapalagsik nga mensahe nga ipaambit sa mga tawong napalibotan sa kasamok ug kawalay-paglaom. Sa unsang paagi matabangan nato sila sa pag-ila nga kita nagatanyag ug “maayong balita sa butang nga mas maayo”?​—Isa. 52:7.

² Andama ang Positibong Mensahe: Ang atong mga panaghisgot diha sa ministeryo makabaton ug maayong epekto kon ang makapalig-ong mga butang ang atong puntingon. Busa, sa dihang mangandam sa atong presentasyon ug magrepaso sa publikasyon nga atong itanyag, kinahanglan natong ipasiugda ang positibong mga bahin sa mensahe. Pinaagi sa pagpaambit sa atong pinasukad-sa-Bibliyang paglaom uban sa pagsalig ug kasibot, kita makadahom ug makapadasig nga mga resulta.​—Prov. 25:11.

³ Bisan pag kita mabination sa dihang ang mga tawo mopahayag kon sa unsang paagi sila naapektahan sa nagkagrabeng mga kahimtang sa kalibotan, angay natong ipunting kanila ang tinuod nga solusyon sa mga suliran sa tawo, ang Gingharian sa Diyos. Bisan sa dihang maghisgot sa nagsingabot nga “adlaw sa panimalos” ni Jehova, buot natong ipakita kon sa unsang paagi kini nagkahulogan gayod nga “maayong balita ngadto sa mga maaghop.” (Isa. 61:​1, 2) Atong mapasaligan ang atong mga tigpaminaw nga ang tanang himoon ni Jehova sa kataposan magdalag labing dakong kalipay ug labing maayong maangkong kalamposan.

⁴ Ipresentar ang Kamatuoran Uban ang Tinuod nga Kangaya: Sa dihang mamatikdan sa mga tawo ang atong mangayaong panagway ug masaligong paningog, sila mas makiling sa pagpaminaw. Kon atong ipabanaag ang positibong panglantaw, masabtan sa atong mga tigpaminaw nga kita ‘nagmaya diha sa paglaom.’ (Roma 12:12) Busa, sila mahimong mas masanongon sa maayong balita. Dayag, kita adunay maayong katarongan kanunay sa pagpasundayag ug positibo, mangayaong tinamdan diha sa matag bahin sa atong ministeryo.

⁵ Ingong mga ministro sa maayong balita, ginabuhat ta ang labaw pa gayod kay sa pagpahibalo. Ang atong pagsangyaw nagpaambit ug seguradong paglaom sa usa ka mas maayong kinabuhi karon maingon man sa umaabot. (1 Tim. 4:8) Sa dihang duolon ta ang matag tawo, ang atong positibong panghunahuna mabanaag kon unsay atong isulti ug makatabang sa mga tawo sa pagdawat sa maayong balita. Pinaagig paghatag ug pagtagad kon unsay atong isulti ug kon sa unsang paagi isulti kana, atong dasigon ang matinud-anog-kasingkasing nga mga tawo sa pagdawat sa makapadasig nga maayong balita nga atong ginasangyaw!