Sundoga ang Atong “Malipayong Diyos,” si Jehova
1 Gusto gayod ni Jehova nga magmalipayon ang mga tawo. Ang iyang Pulong nagpahinam kanato sa kahibulongang mga panalangin nga iyang giandam alang sa katawhan. (Isa. 65:21-25) Angayng madayag sa uban nga kita nalipay sa pagpaambit kanila “sa mahimayaong maayong balita sa malipayong Diyos.” (1 Tim. 1:11) Angayng mabanaag sa atong paagi sa pagsulti sa mensahe sa Gingharian ang atong gugma alang sa kamatuoran ug ang atong tiunay nga interes sa mga tawo nga atong ikaestorya.—Roma 1:14-16.
2 Tinuod, usahay dili sayon ang paghupot ug malipayong tinamdan. Diha sa pipila ka teritoryo, kita makakaplag ug pipila lang ka tawo nga mosanong sa mensahe sa Gingharian. May mga panahon usab nga kita nagsagubang ug malisod nga mga kahimtang sa atong kinabuhi. Aron mahuptan ang malipayong tinamdan, angay natong hunahunaon kon unsa ka hinungdanon nga ang mga tawo sa atong teritoryo makadungog ug makasabot sa maayong balita sa Gingharian nga atong gisangyaw. (Roma 10:13, 14, 17) Ang pagpamalandong niini motabang kanato sa pagpadayon sa pagpahibalo nga may kalipay sa maluluy-ong tagana ni Jehova alang sa kaluwasan.
3 Isentro ang Pagtagad sa Positibong mga Butang: Kinahanglan usab natong tagdon ang atong isulti. Bisan tuod mahimong sugdan nato ang usa ka panagkabildo pinaagi sa paghisgot ug usa ka problema o usa ka balita nga nahibaloan sa mga tawo, likayan nato ang wala-kinahanglanang paghisgot ug makapaguol nga mga butang. Ang atong buluhaton maoy pagdalag “maayong balita sa butang nga mas maayo.” (Isa. 52:7; Roma 10:15) Kining maayong balita maoy usa ka mensahe nga gipasukad sa mga saad sa Diyos bahin sa usa ka mas maayong kaugmaon. (2 Ped. 3:13) Nga naghunahuna niini, gamita ang Kasulatan aron sa “pagbugkos sa mga may gun-ob nga kasingkasing.” (Isa. 61:1, 2) Kini motabang sa matag usa kanato sa paghupot ug malipayon ug positibong tinamdan.
4 Ang mga tawo seguradong makamatikod sa atong malipayong tinamdan samtang kita nagsangyaw. Busa, ibanaag nato kanunay ang tinamdan sa atong “malipayong Diyos,” si Jehova, samtang kita nagpaambit sa maayong balita sa Gingharian ngadto sa mga tawo sa atong teritoryo.