Mosanong Ka ba sa Gugma ni Kristo?
1 Namalandong sa dalan sa kinabuhi sa iyang Agalon, ang apostol nga si Juan misulat: “Si Jesus, nga nahigugma sa mga iyaha nga diha sa kalibotan, mihigugma kanila hangtod sa kataposan.” (Juan 13:1) Sulod niining panahona sa Memoryal, ang atong mga hunahuna nakasentro ngadto sa kinadak-ang kapahayagan sa gugma ni Kristo. Kita makasanong nianang gugmaha pinaagig pagpasundayag ug pagtuo sa lukat, pinaagig masibotong pagpakig-ambit diha sa buluhatong pagsangyaw ug, sama ni Jesus, pinaagig paglahutay “hangtod sa kataposan.”—Mat. 24:13; 28:19, 20; Juan 3:16.
2 Pagsanong sa Gugma ni Kristo: Si Jesus aktibo kaayo sa kataposang semana sa iyang yutan-ong kinabuhi. (Mat. 21:23; 23:1; 24:3) Ingong mga tigsundog ni Kristo, kita usab napalihok sa gugma aron ‘manlimbasog sa atong kaugalingon nga kusganon’ diha sa pag-alagad kang Jehova. (Luc. 13:24) Mahimo ba nimong pahimuslan ang mga kahikayan alang sa dugang kalihokan sa pagsangyaw sulod sa Abril pinaagig pagpauswag sa panahon nga imong magugol sa ministeryo?
3 Niining tuiga ang Panihapon sa Ginoo matunong sa Miyerkoles sa gabii, Abril 19. Unsa ka daghan ang motambong unya alang niining hinungdanong okasyon? Sa dakong gilapdon, kana nag-agad kanato. Nakahimo ka na bag listahan niadtong imong giplanong dapiton—imong mga estudyante sa Bibliya ug ubang mga interesado, mga paryente, mga kaila sa negosyo, ug mga eskolmet? Nakontak na ba nimo sila ug gidapit nga kinasingkasing? Pahinumdoman ba nimo sila pipila ka adlaw sa dili pa ang Memoryal? Nagkinahanglan ba sila sa imong tabang sa pagtambong didto? Ang mga ansiyano modapit usab ni bisan kinsa nga nahimong di-aktibo diha sa ministeryo. Ang kamatuoran nga ang Memoryal ipahigayon sa gabii sa semana inay kay sa hinapos sa semana wala maghimo niana nga di-hinungdanon alang sa tanan nga motambong.
4 Moabot nga Andam: Hinungdanon alang kanato nga magmaandam ug maanaa sa hustong tinamdan sa hunahuna sa dihang kita motambong sa Memoryal. Gitambagan ni Pablo ang mga isigkamagtutuo nga kanunayng ibutang sa hunahuna ang kaseryoso sa okasyon. (1 Cor. 11:20-26) Mahimo ninyong basahon ang mga kapitulo 13 hangtod sa 17 sa Ebanghelyo ni Juan sa panahon sa inyong pagtuon sa Bibliya sa pamilya ug dayon ipaasoy sa matag membro sa pamilya kon unsay kahulogan sa halad ni Jesus alang kaniya. Ayawg kalimti usab ang adlaw-adlaw nga pagbasa sa Bibliya alang sa semana sa Memoryal!
5 Ang atong gugma kang Kristo magkalalom, ug kini mosaylo pa gayod sa Abril 19. Determinado kita sa pagpasundayag sa atong gugma kaniya sa walay kataposan! Kining tuiga sa pagsaulog sa Memoryal motabang kanato sa pagpalig-on nianang tinguhaa.