‘Sulayan Mahitungod sa Pagkaangayan’—Sa Unsang Paagi?
1 Duyog sa padayong pagtubo sa organisasyon ni Jehova, adunay padayong panginahanglan sa kuwalipikadong mga igsoong lalaki sa pag-alagad ingong ministeryal nga mga alagad. Ang kadaghanang mga igsoong lalaki nga wala pa matudlo, lakip ang mga tin-edyer, adunay tinguha sa pag-alagad diha sa kongregasyon. Sa dihang sila itudlo sa ekstrang buluhaton, bation nilang mapuslanon ug adunay kalamposan. Ang ilang dugang pag-uswag mag-agad sa ilang pagkahimong ‘nasulayan mahitungod sa pagkaangayan.’ (1 Tim. 3:10) Sa unsang paagi kini molampos?
2 Ang Papel sa mga Ansiyano: Ingong bahin sa pagpatakos sa igsoong lalaki pinaagig Kasulatanhong mga kuwalipikasyon alang sa ministeryal nga mga alagad nga makaplagan sa 1 Timoteo 3:8-13, ang mga ansiyano mosulay sa pagkaangayan sa igsoong lalaki sa pag-abaga ug responsabilidad. Tingali ilang itudlo siya sa pagbuhat ug mapuslanong mga serbisyo nga nalangkit sa pag-apod-apod ug mga magasin ug literatura, pagtunol sa mga mikropono, pagmentinar sa Kingdom Hall, ug uban pa. Obserbahan sa mga ansiyano kon sa unsang paagi siya mosanong ug moatiman sa iyang mga asaynment. Ilang tan-awon ang mga hiyas sa pagkakasaligan, kauntop, kakugihan, pagkamakasaranganon, mahinangpong espiritu, ug katakos sa maayong pakig-uban sa uban. (Filip. 2:20) Siya ba panig-ingnan sa iyang pamesti ug pamostura? Siya ba adunay pagbati sa responsabilidad? Buot nilang makita sa “iyang maayong panggawi ang iyang mga buhat uban ang kalumo nga iya sa kaalam.” (Sant. 3:13) Nagtinguha ba gayod siya nga makatabang sa kongregasyon? Nagtuman ba siya sa sugo ni Jesus sa “paghimog mga tinun-an sa katawhan” pinaagig mainitong pagpakig-ambit sa ministeryo sa kanataran?—Mat. 28:19; tan-awa ang Septiyembre 1, 1990, Bantayanang Torre, mga panid 18-28.
3 Bisag walay gisitar nga minimo nga edad aron ang usa ikatudlo nga ministeryal nga alagad, ang Bibliya nagpunting sa maong mga igsoong lalaki ingong “mga tawo nga nagaalagad.” Dili gayod kita maghunahuna nga sila anaa sa ilang sayo o tungatunga sa pagkatin-edyer, ilabina nga gihisgotan man ang posibilidad sa pagbaton ug asawa ug mga anak. (1 Tim. 3:12, 13) Ang maong mga lalaki dili angayng magpadala sa “mga tinguha nga iya sa pagkabatan-on” apan kinahanglang nanaggawi sila sa ugdang nga paagi, nga adunay maayong pagbarog ug hinlo nga tanlag atubangan sa Diyos ug sa mga tawo.—2 Tim. 2:22.
4 Bisan tuod ang kinaiyanhong abilidad mapuslanon, ang tinamdan ug ang espiritu sa usa maoy tinuod nga hinungdanon. Mapaubsanon ba nga nagtinguha ang usa ka igsoong lalaki nga makadayeg sa Diyos ug makaalagad sa iyang mga igsoon? Kon mao, panalanginan ni Jehova ang iyang mga paningkamot nga mouswag diha sa kongregasyon.