Ikaw ba Malahutayon?
1 “Wala akoy labaw nga hinungdan sa pagkamapasalamaton kay sa niining mga butanga, . . . nga ang akong mga anak nagapadayon sa paglakaw diha sa kamatuoran.” (3 Juan 4) Ang pagkamalahutayon sa espirituwal nga mga anak ni Juan naghatag kaniyag dakong kalipay. Pagkadako gayod nga kalipay sa atong langitnong Amahan nga makita ang milyonmilyon sa iyang umaabot nga mga anak nga “nagapadayon sa paglakaw diha sa kamatuoran”!—Prov. 23:15, 16; 27:11.
2 Samtang ang katawhan sa Diyos ingong kinatibuk-an nagmapinadayonon sa masibotong Kristohanong kalihokan, ang pipila inanayng nagakaluya. Bisan kini sila madasigon tingali sa dihang una nilang nakat-onan ang kamatuoran, sa paglabay sa katuigan, ilang gihimong naandan ang pagpakig-ambit lamang ug diyutay o panalagsa diha sa paghimog-tinun-an nga buluhaton.
3 Masabtan, ang pipila hayan nagakahinay tungod sa pisikal nga mga kakulian ug mga epekto sa pagkatigulang. Bisan pa niana, sila angayng dayegon tungod sa ilang pagkamalahutayon. Sila nagabuhat kon unsay ilang maarangan. Apan ang matag usa nga nagpahinungod sa iyang kinabuhi ngadto sa Diyos angayng mosukna sa iyang kaugalingon: ‘Ako bang gitugotan ang akong kaugalingon sa hilabihang pagtagad sa personal nga mga pangagpas nga ang intereses sa Gingharian adunay gamayng bahin na lamang sa akong kinabuhi? Ako ba nahimong usa ka ‘dagaang,’ o ako ba sa gihapon kusganong ‘nanlimbasog’ sa akong kaugalingon?’ (Pin. 3:15, 16; Luc. 13:24) Hinaot ang tanan kanato mainampoong mamalandong maylabot sa atong ginabuhat ug mohimog pag-uswag segun sa gikinahanglan, nga anaa sa hunahuna nga si Jehova nagsaad nga motagana ug “himaya ug dungog ug kalinaw alang sa matag usa nga nagabuhat kon unsa ang maayo.”—Roma 2:10.
4 Kon Unsaon sa Paglahutay: Unsay nakatabang kang Jesus sa paglahutay? Si Pablo misaysay: “Tungod sa kangaya nga gibutang atubangan kaniya siya miagwanta ug sakitanang estaka, nagpakawalay-bili sa kaulaw, ug milingkod na sa tuong kamot sa trono sa Diyos.” (Heb. 12:1-3) Ang kangaya nga gibutang sa atubangan ni Jesus mas labaw gayod sa temporaryong mga pagsulay nga kinahanglan niyang atubangon. Ang padayong paghunahuna sa kangaya nga gibutang sa atong atubangan makatabang usab kanato sa paglahutay. (Pin. 21:4, 7; 22:12) Kon kita modangop kang Jehova sa paghatag kanatog kalig-on pinaagi sa personal nga pagtuon, regular nga pagtambong sa tigom, ug makanunayong pag-ampo, kita makalahutay diha sa buluhaton nga iyang gihatag kanatong buhaton.
5 Si Jehova nagmaya diha sa pagkamalahutayon sa iyang mga maunongon. Busa atong dugangan ang iyang kangaya pinaagig padayong ‘paglakaw diha sa kamatuoran.’