Ang mga Tigom Makaayo sa mga Batan-on

¹ Usa ka babayeng tin-edyer miingon: “Usahay ako naghunahuna nga ang mga batan-on adunay labing malisod nga panahon sa kinabuhi. Kami napalibotan sa mga tawong nakighilawas, nagdroga, ug nag-inom ug alkoholikong mga ilimnon.” Kana ba ang imong gibati? Kon mao, sa imong hunahuna unsay makatabang kanimo sa pagsukol niining daotang mga impluwensiya? Imong gikinahanglan ang pagtuo, lig-ong pagtuo sa pagkahusto sa mga paagi ni Jehova, kay kon wala kana “imposible sa pagpahimuot kaniya pag-ayo.” (Heb. 11:6) Ang pagtambong sa mga tigom sa kongregasyon makatabang kanimo sa pagpalig-on sa imong Kristohanong hugot nga mga pagtuo ug determinasyon nga likayan ang daotan.

² Ang mga Tigom Adunay Daghang Itanyag Kanimo: Unsay maghimong makapalipay sa lamiang pagkaon uban sa suod nga mga higala? Dili ba mao ang kombinasyon sa makapahimsog nga pagkaon ug maayong panag-ubanay diha sa relaks nga kahimtang? Aw, ang atong mga tigom nagtanyag ug samang maayong kasinatian, apan sa espirituwal nga diwa.

³ Ang mga butang nga hisgotan sa mga tigom maoy makapalig-on, nga naglangkob gikan sa mga butang maylabot sa matag adlawng mga suliran sa kinabuhi ngadto sa mga pagtuon sa makaiikag nga mga tagna sa Bibliya. Ginapresentar ang praktikal nga instruksiyon nga magtudlo kanimo kon unsaon pagkinabuhi sa labing maayong paagi sa kinabuhi ug sa pagsagubang sa mga suliran nga imong maatubang. Ang mga kauban nga anaa sa mga tigom mao ang labing maayo bisan asa, ug ang espirituwal nga kahimtang maoy maayo ug hilwas. (Sal. 133:1) Dili ikahibulong nga usa ka batan-ong babaye miingon: “Moadto ako sa eskuylahan sa tibuok adlaw, ug ako maluya. Apan ang mga tigom maoy sama sa tubigan sa desyerto, diin ako malagsik aron makalahutay sa sunod nga adlaw sa pagtungha.” Ang usa pang babaye miingon: “Akong nakaplagan nga ang suod nga panag-ubanay sa uban kinsa nahigugma kang Jehova nagtabang kanako nga magpabiling suod kaniya.”

⁴ Pinaagi sa pagpalista sa Tunghaan sa Teokratikanhong Ministeryo, makat-onan nimo ang paghipos ug Biblikanhong impormasyon, ugmaron kana ngadto sa usa ka pakigpulong, ug dayon ipresentar kana diha sa kokabildong paagi atubangan sa mamiminaw sa Kingdom Hall. Handurawa ang kaayohan sa pagkanabansay sa pagtudlo sa nagaluwas-sa-kinabuhing mga kamatuoran sa Pulong sa Diyos sa mahanasong paagi! Aduna pa ba ing laing dapit nga mabatonan sa mga batan-on ang maong bililhong pagbansay?

⁵ Kon Unsaon Pagpahimulos sa Labing Maayo Gikan sa mga Tigom: Aron makapahimulos sa labing maayo gikan sa mga tigom, adunay tulo ka hinungdanong butang ang nalangkit. Kini mao ang pagpangandam, pagpakig-ambit, ug pagpadapat.

⁶ Pagpangandam Alang Niana: Pag-eskedyul ug panahon sa regular nga paagi aron mangandam alang sa mga tigom. Ayawg tugoti nga ang buluhaton sa eskuylahan, partaym nga trabaho, o mga kalihokan sa lulinghayaw moagaw kanimo sa panahon nga imong gikinahanglan sa abanteng pagsubli sa materyal nga hisgotan sa matag tigom. Makatabang kini sa pagbaton ug maayong rutina. Una sa tanan ug labing hinungdanon, pagnunot sa eskedyul sa senemanang pagbasa sa Bibliya alang sa Tunghaan sa Teokratikanhong Ministeryo. Nagkinahanglan lang kini ug pipila ka minuto matag adlaw sa pagbasa ug pagpamalandong sa natudlong mga kapitulo. Paggahin ug panahon aron mangandam alang sa Pagtuon sa Libro sa Kongregasyon ug sa Pagtuon sa Bantayanang Torre. Ang uban naghimo niini labing menos usa o duha ka adlaw sa dili pa kining mga tigoma. Kutob sa maarangan, himoa ang ingon alang sa mga bahin nga naeskedyul diha sa Tigom sa Pag-alagad matag semana.

⁷ Pagpakig-ambit Niana: Ang Bibliya nag-ingon nga sa panuigong 12, si Jesus nakaplagan didto sa templo, nga naminaw, nagsuknag mga pangutana, ug naghatag ug mga tubag. (Luc. 2:​46, 47) Sa laing pagkasulti, siya bug-os nga nalangkit. Ikaw makabenepisyo ug dugang gikan sa mga tigom kon ikaw maningkamot sa pagpakig-ambit niana.​—Prov. 15:23.

⁸ Gikinahanglan nimong tagdon gayod kon unsay ginatudlo sa mga tigom. Usahay, ang pagpaminaw sa pakigpulong mas lisod kay sa pagpakigpulong. Ngano? Ang imong hunahuna mahimong maglatagaw samtang ang usa nagasulti. Sa unsang paagi imong mabuntog kini? Pinaagi sa pagnota. Isulat ang hinungdanong mga puntos nga buot nimong tagdon sa ulahi. Ang pagkuhag nota makatabang kanimo nga isentro ang pagtagad sa programa. Dugang pa, pangitaa ang mga kasulatan, ug sunda samtang kini basahon sa mamumulong.

⁹ Dugang pa, himoa kana nga usa ka tumong nga makaambit sa matag pangutanag-tubag nga panaghisgot diha sa mga tigom. Ikaw makabenepisyo pa gani ug dugang kon hunahunaon nimog maayo kon unsay buot nimong isulti. Ang Proverbio 15:​28 nag-ingon: “Ang kasingkasing sa matarong nagapamalandong aron sa pagtubag.”

¹⁰ Tumana kon Unsay Imong Nakat-onan: Ang kataposang tikang mao ang pagseguro nga kon unsay imong nakat-onan ‘nagalihok kanimo.’ (1 Tes. 2:13) Samtang imong ipadapat ang maayong mga puntos nga imong makat-onan sa matag tigom, ikaw mas masuod kang Jehova nga Diyos. Siya mahimong tinuod alang kanimo, ug imong masinati ang dakong kalipay ug katagbawan samtang ikaw “nagapadayon sa paglakaw diha sa kamatuoran,” nga maghimo niana nga imong kaugalingon.​—3 Juan 4.

¹¹ Mga batan-ong lalaki ug babaye, samtang kamo regular nga mangandam alang sa mga tigom, makig-ambit niana, ug tumanon kon unsay inyong nakat-onan, kamo bug-os nga makapahimulos sa mga tigom. Sa samang panahon, inyong makuha ang tanang kaayohan nga inyong maarangan gikan niana. Ang inyong pagtuo mapalig-on, maingon man ang inyong lig-ong tinguha nga magpabiling maunongon sa inyong langitnong Amahan, si Jehova.​—Sal. 145:18.