Ang Gugma Nagpalihok Kanato sa Pagsangyaw
1 Ingong mga Saksi ni Jehova, kita nailhan pag-ayo tungod sa pagkamasibotong magsasangyaw sa mensahe sa Gingharian. (Mat. 24:14) Kapin sa unom ka milyon ang aktibo sa tibuok kalibotan; ang mga bag-ohan gidugang sa dihang sila miduyog kanato sa pagsangyaw. Ang gidaghanon gisumada pinasukad sa pagpakigbahin niining buluhatona.
2 Unsay nagpalihok kanato sa pagboluntaryo nianang usa ka mahagitong asaynment? Kita wala pugsa, hayloa pinaagig materyal nga ganansiya, o tanyagig linaing mga pasidungog. Sa sinugdan, daghan kanato ang nahadlok tungod kay kita mibating dili-takos, ug ang sanong sa publiko sagad dili mauyonon. (Mat. 24:9) Kadaghanang mga tigpaniid dili makasabot kon unsay nagpalihok kanato. Aduna gayoy lig-ong katarongan aron kita molahutay.
3 Ang Gahom sa Gugma: Giila ni Jesus ang kinadak-an sa tanang sugo sa dihang siya miingon nga kita ‘kinahanglang mahigugma kang Jehova sa tibuok natong kasingkasing, kalag, hunahuna, ug kusog.’ (Mar. 12:30) Ang atong gugma kang Jehova gipasikad diha sa dulot nga pagbati sa pagpabili kon kinsa ug kon unsa siya—ang Soberanong Magmamando, ang Maglalalang sa tanang butang, kinsa ‘takos nga modawat sa himaya, dungog, ug sa gahom.’ (Pin. 4:11) Ang iyang katingalahang mga hiyas walay ikatandi.—Ex. 34:6, 7.
4 Ang pagkahibalo ug paghigugma kang Jehova nagpalihok kanato sa pagpalamdag sa atong kahayag atubangan sa mga tawo. (Mat. 5:16) Ang atong kahayag molamdag sa dihang kita magdayeg kaniya sa publiko, magsulti bahin sa iyang kahibulongang mga buhat, ug magpakaylap sa mensahe bahin sa iyang Gingharian. Sama sa manulonda sa kinatung-an sa langit, kita adunay “walay kataposang maayong balita nga ipahayag ingong makapalipay nga balita . . . ngadto sa matag nasod ug tribo ug pinulongan ug katawhan.” (Pin. 14:6) Ang atong gugma mao ang puwersa luyo sa tibuok kalibotang pagsangyaw nga buluhaton.
5 Ang kalibotan nag-isip sa atong pagsangyaw ingong “kabuangan” nga dili angayng patalinghogan. (1 Cor. 1:18) Ang kaylap nga mga paningkamot gihimo aron sa pagpukgo sa atong buluhaton. Ang atong maunongong gugma nagpalig-on kanato sa pagpahayag, sama sa mga apostoles: “Dili kami makahunong sa pagsulti sa mga butang nga among nakita ug nadungog. . . . Kinahanglang among sugton ang Diyos ingong magmamando inay ang mga tawo.” (Buh. 4:20; 5:29) Ang buluhatong pagsangyaw nagpadayon sa pagkaylap sa tanang bahin sa yuta bisan pa sa pagsupak.
6 Ang atong gugma kang Jehova maoy sama sa nagdilaab nga kalayo nga nagtukmod kanato sa kaylap nga pagpahayag sa iyang kahamili. (Jer. 20:9; 1 Ped. 2:9) Atong ipadayon nga “ipahibalo taliwala sa mga katawhan ang iyang mga pakiglabot . . . kay nakabuhat siya nga labaw gayod”!—Isa. 12:4, 5.