Mga Panalangin Tungod sa Pagpakitag Pagpabili sa Gugma ni Jehova—Bahin 1
1 Ang apostol nga si Juan misulat: “Bahin kanato, kita nahigugma, tungod kay [si Jehova] unang nahigugma kanato.” (1 Juan 4:19) Sa dihang atong hunahunaon ang tanang gitagana ni Jehova alang kanato, matukmod kita sa pagpasundayag sa atong dulot nga pagpabili ingong balos. Si Jesus naghatag ug panig-ingnan sa paghimo niini pinaagi sa masinugtanong pagpamatuod bahin sa ngalan sa Diyos ug sa Gingharian. (Juan 14:31) Makaayo kon atong konsiderahon ang pipila ka paagi nga mahimo natong ikapakita ang atong pagpabili sa gugma ni Jehova ug sa mga panalangin nga mosunod niana.
2 Pagpamalaybalay: Gitudloan ni Jesus ang iyang mga tinun-an kon unsaon paghimo ang buluhatong pagsangyaw sa Gingharian. Ang iyang mga direksiyon tin-awng nagpaila nga sila namalaybalay, nga nagpakaylap sa maayong balita. (Luc. 9:1-6; 10:1-7) Nagkinahanglan kinig gugma sa Diyos ug sa silingan aron magpadayon sa pagpamalaybalay sa dihang mahibalag ta ang kawalay-pagtagad ug pagsupak. Sa padayong pagpamalaybalay, hinuon, kita sa personal nga paagi makabatog kaayohan tungod kay ang atong pagtuo mahimong mas malig-on, ang atong kombiksiyon mas kusganon, ug ang atong paglaom mas masanagon.
3 Kay naghimo niining buluhatona ubos sa pagtultol sa manulonda, daghan ang atong nakaplagan kinsa gigutom ug giuhaw sa kamatuoran. (Pin. 14:6) Ang mga tagbalay nag-ingon nga sila nag-ampo alang sa tabang sa dihang ang usa ka Saksi miadto sa ilang pultahan. Duha ka Saksing babaye ug usa ka gamayng bata ang namalaybalay sa usa ka isla sa Caribbeano. Sa dihang ang mga hamtong nakahukom nga mamauli na sila, ang bata nag-inusarang miuna ngadto sa sunod nga pultahan ug mituktok. Usa ka batan-ong babaye ang miabli sa pultahan. Sa dihang nakita kini sa mga hamtong, misunod sila ug nakig-estorya sa babaye. Gipadayon sila sa babaye ug misaysay nga bag-o pa lang siyang nag-ampo sa Diyos nga ipadala ang mga Saksi sa pagtudlo kaniya sa Bibliya!
4 Pagsangyaw Diha sa Kadalanan: Sanglit lisod kaayo sa pipila ka dapit nga maabtan ang mga tawo sa balay, ang pagsangyaw sa kadalanan maoy usa ka epektibong paagi aron masangyawan ang mga tawo. Dugang pa, daghang tawo ang nagpuyo diha sa mga komunidad nga binantayan ang mga ganghaan o binantayan-pag-ayong mga tinukod nga dili ta mahimo ang pagpamalaybalay. Apan, ang atong pagpabili sa gugma ni Jehova magtukmod kanato sa pagpahimulos sa matag posibleng paagi aron kontakon ang mga tawo dala ang mensahe sa Gingharian, nga naglakip sa pagsangyaw sa kadalanan.—Prov. 1:20, 21.
5 Paghimog mga Balikduaw: Sanglit kita nagapangita kanilang “mahunahunaon sa ilang espirituwal nga panginahanglan,” buot natong himoon ang kutob sa atong maarangan sa pagtagbaw nianang panginahanglana. (Mat. 5:3) Kini nagkinahanglan nga kita mobalik aron sa pagbisibis sa mga binhi sa kamatuoran nga atong gipugas. (1 Cor. 3:6-8) Usa ka sister sa Australia ang nakapahimutang ug usa ka tract ngadto sa babaye nga wala kaayo magpakitag interes. Bisan pa niana, ang sister padayong misulay sa pagpakigkita kaniya pag-usab sa iyang balay. Sa dihang sa kataposan iya siyang nakontak, nakaplagan sa atong sister nga human sa unang pagduaw, ang babaye mipalit ug usa ka mahalong Bibliya. Gisugdan sa sister ang pagtuon uban kaniya!
6 Pagdumalag mga Pagtuon sa Bibliya: Kini mahimong mao ang labing makalilipay ug makapatagbaw nga bahin sa atong ministeryo. Pagkadakong panalangin ang pagtabang sa mga tawo nga makakat-on bahin kang Jehova, sa pagtan-aw kanila nga mohimog mga kausaban sa ilang kinabuhi aron sa pagpahimuot kaniya, ug unya sa pagsaksi sa ilang Kristohanong bawtismo ingong simbolo sa ilang pahinungod ngadto sa Diyos!—1 Tes. 2:20; 3 Juan 4.
7 Sa sunod gula, atong tagdon ang dugang mga paagi nga kita mapanalanginan tungod sa pagpakitag pagpabili sa gugma ni Jehova.