Mga Panalangin Tungod sa Pagpakitag Pagpabili sa Gugma ni Jehova—Bahin 2
1 Sa miaging bulan nga bahin niining ulohana, atong napasiugda ang upat ka paagi nga ang atong pagpabili sa gugma ni Jehova mahimong ikapakita sa ministeryo. (1 Juan 4:9-11) Dinhi atong idugang ang lima pa ka paagi sa pagbuhat niana. Kon bug-os kitang makig-ambit sa pagtabang sa uban sa espirituwal nga paagi, kita mapanalanginan.
2 Di-Pormal nga Pagsangyaw: Kini maoy usa ka epektibong paagi sa pagpangita sa mga tawo nga gigutom ug giuhaw alang sa pagkamatarong ug sa pagpahimutang ug mapuslanong literatura ngadto kanila. Takos gayod ang ‘pagpalit sa nahiangay nga panahon’ ug pagpamatuod sa tanang higayon ug kang bisan kinsa nga atong mahibalag. (Efe. 5:16) Kita mahimong nagkinahanglag kaisog sa pagpamatuod niining paagiha, apan kon atong pabilhan ang gugma sa Diyos ug ang mga panginahanglan sa mga tawo, kita mopamatuod sa matag kahigayonan.—2 Tim. 1:7, 8.
3 Usa ka misyonaryo ang tugob nga gipanalanginan tungod sa pagsugod sa panaghisgot uban sa kaubang pasahero sa taksi. Ang tawo nagpakitag interes. Gihimo ang mga balikduaw, ug nasugdan ang pagtuon sa Bibliya. Ang maong tawo nakadangat sa kamatuoran ug miuswag hangtod nga nahimo siyang ansiyano sa kongregasyon!
4 Pagsulat: Tingali dili kita makahimo sa pagpamalaybalay tungod sa pipila ka kaluyahon sa lawas o dili maayong panahon. Kita makahimo sa pagsulat, nga maghatag ug mubong pamatuod pinaagi sa koreyo ngadto sa mga tawong atong kaila, kanilang namatyag mga minahal sa kinabuhi, o kanilang kinsa wala sa balay diha sa teritoryo. Atong ikasukip ang usa sa atong haom nga mga tract nga adunay madanihong binase-sa-Bibliyang mensahe ug dasigon ang makadawat nga mosanong kon siya adunay mga pangutana. Gamita ang imong personal nga adres o ang adres sa Kingdom Hall; palihog ayawg gamita ang adres sa sangang buhatan.
5 Pagsangyaw Pinaagig Telepono: Kini maoy usa ka maayong paagi sa pag-abot sa mga tawo nga dili nato mahibalag sa buluhatong pagpamalaybalay. Kon maalamon natong himoon kini, uban sa kalumo, taktika, ug kahanas, kita mahimong makadawat ug maayong sanong. Ang Pebrero 2001 nga Atong Ministeryo sa Gingharian, mga panid 5-6, naghatag ug praktikal nga mga sugyot kon unsaon sa pagkuha sa labing maayong mga resulta.
6 Sa dihang usa ka sister nagsangyaw pinaagig telepono, gipangutana niya ang babaye kon gihunahuna ba niya pag-ayo ang bahin sa iyang umaabot ug sa iyang pamilya. Ang babaye miingon nga gihunahuna niya. Gibutyag niya nga tungod sa iyang kawalay-paglaom, iyang gilain ang iyang kaugalingon diha sa balay. Kay napalihok tungod sa tiunayng kahingawa sa maong sister, ang babaye misugot nga makigkita kaniya didto sa duol nga tiyanggihan. Ingong resulta, ang babaye midawat gilayon sa pagtuon sa Bibliya!
7 Pag-abiabi sa mga Di-Kaila: Kon atong gihigugma ang atong mga silingan, kita magmaalisto sa pagmatikod kang bisan kinsang di-kaila nga moduaw sa atong tigomanan ug ipabati kaniya nga giabiabi. (Roma 15:7) Ipakita kaniya nga siya anaa sa taliwala niadtong interesado gayod sa iyang espirituwal nga kaayohan. Ang atong tiunay nga kahingawa ug ang atong pagtanyag ug personal nga pagtuon sa Bibliya mahimong mopalihok kaniya sa pagdawat sa atong tabang.
8 Atong Maayong Panggawi: Pinaagi sa atong maayong panggawi, atong gidayandayanan ang kamatuoran. (Tito 2:10) Sa dihang kadtong anaa sa kalibotan mosulti ug dalayegong mga butang labot kanato ingong mga Saksi ni Jehova, sila magapasidungog sa atong Diyos. (1 Ped. 2:12) Kana usab makatabang sa uban nga makasugod sa pagsubay sa dalan padulong sa kinabuhi.
9 Nganong dili sublion kining lima ka paagi sa pagpakita sa atong pagpabili sa dakong gugma ni Jehova alang kanato ug sa pagpadapat niini? (1 Juan 4:16) Sa paghimo nimo niini, maani nimo ang daghang panalangin.