Malamposong Pagpamatuod Pinaagig Telepono

¹ Ang atong tumong ingong mga Saksi ni Jehova dili lamang aron makig-ambit sa pagsangyaw sa maayong balita kondili aron usab mapaabtan ang tanan kutob sa maarangan sa mensahe sa Gingharian. (Buh. 10:​42; 20:24) Bisan pag ang pamalaybalay nga buluhaton magpadayon nga mahimong pangunang paagi sa pag-abot sa mga tawo, atong naamgohan nga dili nato makontak ang tanan bisan niining sistematikong paagi. Busa aron ‘matuman sa bug-os ang atong ministeryo,’ atong gigamit ang laing mga paagi​—lakip ang pagpamatuod pinaagig telepono​—sa pagpangita sa samag-karnero nga mga tawo.​—2 Tim. 4:5.

² Sa daghang dapit, ang mga tawo nagpuyo diha sa binantayan-pag-ayo nga mga apartment, mga tinukod nga daghang pamilya ang nagpuyo, o mga komunidad nga binantayan ang mga ganghaan, diin malisod himoon ang atong naandang pamalaybalay nga paagi sa pag-abot sa mga tawo. Apan, daghang magmamantala ang nagmalamposon sa pag-abot niining mga tawhana pinaagig telepono. Samtang dinhi sa Pilipinas hayan dili kini sayon kaayo, tingali posible nga makakuhag mga numero sa telepono gikan sa teleponong direktoryo para sa mga adres sulod sa inyong teritoryo sa kongregasyon. Dugang pa, daghan nga nakig-ambit sa pagsangyaw diha sa dalan, sa mga parke, o mga shopping mall ang nakahimo sa pagkuha sa mga numero sa telepono niadtong ilang nakaestorya.

³ Nagpanuko ka ba sa paglakip sa pagpamatuod pinaagig telepono sa imong ministeryo? Usa ka igsoong lalaki miangkon: “Dili ko buot nga adunay bisan kinsa nga motelepono kanako sa balay aron baligyaan ako ug bisan unsa, busa ako adunay negatibong hunahuna alang niining matanga sa pagpamatuod.” Apan, human sa paghimog duha lamang ka tawag sa telepono, siya miingon: “Nagustohan ko kini! Wala ko gayod hunahunaa nga kana mahitabo, apan nagustohan ko kini! Ang mga tawo maoy relaks diha sa telepono, ug aduna kay tanang mabatonan nga imong gikinahanglan. Epektibo kaayo kini!” Adunay susamang reaksiyon ang usa ka sister: “Wala gayod ako maghinamhinam bahin sa pagpamatuod pinaagig telepono. Sultihan ti ka sa tinuod, dili ko gustong buhaton kana. Apan akong gisulayan kini ug nakaplagan kini nga mabungahon kaayo. Nakabaton akog 37 ka balikduaw gumikan sa pagpamatuod pinaagig telepono ug dugang mga pagtuon kay sa akong maatiman!” Kon buot nimong sulayan ang pagpamatuod pinaagig telepono, ikaw usab mahimong magmalamposon.

⁴ Pag-organisar Alang sa Pagpamatuod Pinaagig Telepono: Ang pagpamatuod nga kalihokan sa kongregasyon maoy ubos sa pagdumala sa magtatan-aw sa pag-alagad. Depende sa panginahanglan, ang lawas sa mga ansiyano mahimong mopalabi sa pagtudlog laing ansiyano o takos nga ministeryal nga alagad aron suod nga makigtambayayong kaniya sa pag-organisar sa pagpamatuod pinaagig telepono.

⁵ Asa ka man makakuha ug mga numero sa telepono? Kon ang binantayan-pag-ayo nga mga tinukod adunay kaugalingon niining listahan sa telepono, mahimong makuha nimo ang mga numero gikan didto. Kay kon dili, hayan posible nga kopyahon ang mga ngalan sa mga pumoluyo gikan sa direktoryo diha sa lobby ug pangitaon kini diha sa naandang libro sa telepono.

⁶ Sa dihang ang mga ansiyano mohimog mga duaw nga iya sa magbalantay sa mga nagkulong o mga baldado, sila mahimong magmaalisto sa pagdasig niining mga tawhana nga moapil sa pagpamatuod pinaagig telepono. Basin ang ansiyano mohimog pipila ka tawag samtang ang magmamantala maniid, ug dayon ang magmamantala mahimong magpahimulos sa kahigayonan sa pagtawag. Daghan nga misugod niining paagiha ang naggugol ug pipila ka minuto matag adlaw niining buluhatona, ug nagustohan gayod nila kini.

⁷ Mga Sugyot Alang sa Kalamposan: Sa dihang gipadala ni Jesus ang iyang mga tinun-an sa pagsangyaw, “gipadala [niya] sila nga tinagurha.” (Luc. 10:1) Ngano? Nahibalo siya nga pinaagi sa pagbuhat nga duyog sila magkat-onanay ug magdinasigay sa usag usa. Tinuod kini diha sa pagpamatuod pinaagig telepono. Pinaagig pagbuhat nga may kauban, kamo magkat-onanay sa usag usa, makahisgot sa inyong mga resulta, ug makahatag ug mga sugyot alang sa sunod nga panaghisgot. Bisan panahon sa pagtelepono, kamo magkatinabangay sa usag usa sa pagpangitag tukmang impormasyon.

⁸ Aron maugmad ang tin-awng panghunahuna ug pagsentro sa pagtagad, lingkod diin ikaw makahikyad sa imong mga materyales sa pagpamatuod​—Bibliya, librong Nangatarongan, brosyur nga Gikinahanglan, mga magasin, ug uban pa—sa imong atubangan. Isulat ang pipila ka presentasyon, ug ibutang kini sa dapit nga imong makita kini. Magmaandam sa pagtipig ug tukma ug kompletong mga talaan, lakip ang petsa ug oras sa adlaw aron imong mahibaloan kon kanus-a sundalon ang nakaplagang interes.

⁹ Ang mga tawo kasagarang mapanagan-on sa dihang makadungog ug di-pamilyar nga tingog diha sa telepono. Busa magmainiton, mahigalaon, ug mataktikanhon. Pinaagi lamang sa imong tingog nga matino sa tagbalay ang imong pagkatawo ug pagkasinsero. Pagrelaks ug pagsulti nga kinasingkasing. Sulti nga hinayhinay ug tin-aw ug may igong gikusgon aron madunggan. Tugoti ang tagbalay sa pagsulti. Gamita ang imong enterong ngalan, ug isulti nga ikaw nagpuyo diha sa komunidad. Dili nato buot nga ang mga tawo maghunahuna nga kita mga tigbaligya pinaagig telepono. Inay kay mosulti nga ikaw nagtawag sa tanang molupyo sa usa ka partikular nga tinukod o mga tinukod, himoang personal ang imong tawag.

¹⁰ Mga Presentasyon sa Telepono: Daghan sa mga pasiuna sa mga panid 9-15 sa librong Nangatarongan mahimong ipahiangay sa pagpamatuod pinaagig telepono. Ikaw makaingon: “Nagatawag ako kanimo sa telepono tungod kay dili ako makaanha ug makita ka sa personal. Ang tuyo sa akong pagtawag maoy sa pagpangayo sa imong opinyon bahin sa makapainteres kaayong pangutana.” Dayon isukna ang pangutana.

¹¹ Ang unang presentasyon ubos sa ulohang “Krimen/Kaluwasan” mahimong magamit niining paagiha: “Halo. Ang akong ngalan maoy ______. Ako nagpuyo sa komunidad. Buot kong tinoon kanimo nga dili ako magbaligyag bisan unsang butang o magsurbi. Nagtawag ako tungod sa akong kabalaka mahitungod sa personal nga kaluwasan. Nagdagsang ang krimen sa atong palibot, ug kana nag-apektar sa atong kinabuhi. Sa hunahuna mo moabot ra kaha ang panahon sa dihang ang tanang tawo makahimo na sa paglakaw sa kadalanan sa magabii ug mobating luwas? [Tugoting motubag.] Tugoti akong basahon kon unsa ang gisaad sa Diyos nga buhaton.”

¹² Ang paggamit ug deretsong paagi sa pagtanyag ug mga pagtuon sa Bibliya pinaagi sa telepono adunay maayong mga resulta. Ang pagtuon mahimong ipasundayag sa pipila ka minuto. Tanyagi nga duawon ang indibiduwal sa iyang balay aron ipadayon ang pagtuon, o kon ang tawo nagpanuko, tanyagi nga ipadayon ang pagtuon pinaagi sa telepono sa laing adlaw.

¹³ Sa dihang imong taposon ang panaghisgot, paghunahuna sa usa ka butang nga motultol sa imong pagduaw sa tawo diha sa iyang balay o sa pagpadalag usa ka basahon. Kon ang tawo magpanuko sa paghatag kanimo sa iyang adres, tanyagi nga motawag ka pag-usab. Tingali mokabat ug ubay-ubayng mga tawag una pa siya mobating komportable na sa pagdapit kanimo ngadto sa iyang balay.

¹⁴ Pagpanikaysikay: Gisugdan sa 15-anyos nga sister ang iyang buntagong pag-alagad pinaagi sa pagtawag sa telepono. Nakigsulti siya sa usa ka babaye nga miuyon sa pagdawat sa librong Kahibalo. Sa dihang gihatod sa sister ang libro ngadto sa balay, ang babaye buot masayod kon sa unsang paagi nahibaloan sa batan-ong sister ang iyang numero sa telepono, sanglit wala kini malista. Nasayop lang ang sister sa pagdayal! Ang babaye midawat sa usa ka pagtuon ug karon usa na ka di-bawtismadong magmamantala.

¹⁵ Usa ka sister mikuhag telephone territory apan wala kobrehi kana sulod sa tulo ka semana tungod sa kahadlok. Unsay naghatag kaniyag kaisog sa pagsugod? Iyang nahinumdoman ang artikulo sa Enero 22, 1997, Pagmata! nga nag-ulohang “Sa Dihang Ako Maluya, Niana Ako Gamhanan.” Mahitungod kadto sa usa ka Saksing babaye nga nagsangyaw pinaagig telepono bisan pa sa pisikal nga mga kakulian. Ang sister miingon: “Miampo ako kang Jehova ug nangamuyo alang sa kusog. Nangamuyo ako kaniya nga hatagan ako sa hustong mga pulong sa paghatag sa akong presentasyon.” Unsay resulta sa iyang unang adlaw sa pagpamatuod pinaagig telepono? Siya mitaho: “Gitubag ni Jehova ang akong pag-ampo. Naminaw kanako ang mga tawo, ug gihikay ko nga mobalikduaw.” Sa ulahi ang iyang pagpamatuod pinaagig telepono miresultag usa ka pagtuon sa Bibliya. Siya nagkanayon: “Gitudloan ako ni Jehova sa makausa pa nga mosalig kaniya ug dili sa akong kaugalingon.”​—Prov. 3:5.

¹⁶ Ang pagpresentar sa kamatuoran pinaagig telepono nahimong malamposong paagi sa pagsangyaw sa maayong balita. Pangandam pag-ayo, ug pakig-ambit nga kinasingkasing. Ayawg kaluya kon dili paborable ang sanong nga madawat sa unang pipila ka tawag. Moampo alang sa pagtultol ni Jehova, ug itandi ang mga nota sa uban nga nagsangyaw niining makapadasig nga paagi. Tungod sa tinguha nga walay masayloan diha sa atong teritoryo, hinaot tumanon nato sa bug-os ang atong ministeryo nga may pagkadinalian.​—Roma 10:​13, 14.