Ang Pagsangyaw Pinaagig Telepono Mahimong Epektibo
1. Nganong ikaingon nga hinungdanong bahin sa ministeryo ang pagsangyaw pinaagig telepono?
1 Nganong hatagan natog pagtagad ang pagsangyaw pinaagig telepono diha sa atong ministeryo? Tungod kay usa kini ka paagi sa pagtabang sa uban nga makabaton ug tukmang kahibalo alang sa kaluwasan. (2 Ped. 3:9) Bisan tuod ang pagpamalaybalay mao ang pangunang paagi sa pagmantala sa maayong balita sa Gingharian sa Diyos, andam kita sa pagpahimulos sa ubang mga paagi aron makasangyaw sa mga tawo nga lagmit dili makaplagan sa balay.—Mat. 24:14; Luc. 10:1-7; Pin. 14:6.
2. Unsaon paghimo ang pagsangyaw pinaagig telepono?
2 Kon Unsaon Kini Paghimo: Sama sa mga kahikayan sa pagpamalaybalay, ang teritoryo sa pagsangyaw pinaagig telepono itagana usab alang sa mga magmamantala. Kini mahimong himoon nga mag-inusara o sa duha o tulo ka magmamantala. Angay kining himoon sa hilom nga dapit diin walay disturbo o kabaldahan. Alang sa uban mas maayo nga maglingkod samtang diha sa lamesa ang mga publikasyon nga kasagarang gamiton sa pagsangyaw sa balaybalay.
3. Unsay angay natong hinumdoman sa dihang magsangyaw pinaagig telepono?
3 Kon Unsaon Pagsangyaw Pinaagig Telepono: Sa dihang magsangyaw pinaagig telepono, kita angayng makig-estorya sa natural nga paagi. Ang pipila nga dili pa kaayo sinati niining paagiha sa pagsangyaw makahimo niana pinaagi sa pagbasa sa ilang presentasyon ngadto sa tagbalay sa paagi nga daw nakig-estorya lang. Ang mga pasiuna diha sa librong Nangatarongan, Atong Ministeryo sa Gingharian, ug sa tract nga Gusto Ka Bang Mahibalo sa Kamatuoran? mahimong makatabang kanato. Sa dihang maghimo ug kaugalingong presentasyon, pag-andam ug tema, paghimog pangutana, ug pag-andam ug pipila ka teksto nga magtubag sa maong pangutana. Mahimo usab nimong itanyag ang mga publikasyon nga ginatanyag sa pagpamalaybalay. Tagda ang mosunod nga mga pahinumdom: Relaks ug sulti nga hinayhinay. Magmatinahoron, magmapailobon, ug magmahigalaon, sanglit mamatikdan kini diha sa telepono. Paminaw samtang ang tagbalay magpahayag sa iyang opinyon, dayon pasalamati siya sa iyang mga komento. Ayaw hisgoti ang bahin sa donasyon, kay basin masaypan nga kini maoy usa ka pagpangolekta pinaagig telepono.
4. Sa unsang paagi makatabang kanato ang pagsangyaw pinaagig telepono diha sa atong teritoryo?
4 Tingali ang tawo nga imong maestorya sa telepono maoy baldado, masakiton, o tawong lisod maabtan sa balay tungod sa iyang eskedyul sa trabaho. Ang uban usab nagpuyo diha sa guwardiyadong mga dapit o mga apartment nga dili pasudlan ug laing tawo. Busa, aron bug-os natong matuman ang atong ministeryo, sulayi ang epektibong paagi sa pagsangyaw pinaagig telepono.