Mga Pangutana

◼ Sa dihang magsangyaw pinaagig telepono, angay ba natong isaysay ang bahin sa kahikayan sa donasyon?

Sa dihang personal kitang magsangyaw, posible tingali nga ikapatin-aw nga ang tibuok-kalibotang edukasyonal nga buluhaton sa mga Saksi ni Jehova bug-os nga gisuportahan sa boluntaryong mga donasyon ug nga malipay kita sa pagdawat sa maong mga donasyon. Apan, dili angayng hisgotan ang kahikayan sa donasyon sa dihang magsangyaw pinaagig telepono, tungod kay kini mahimong sayop nga sabton ingong matang sa pagpangolekta diha sa telepono. Ang ministeryo sa mga Saksi ni Jehova dili komersiyal sa bisan unsa mang paagi.—2 Cor. 2:17.

◼ Sa dihang magsangyaw pinaagig telepono, unsay angayng buhaton kon ang usa ka tawo mohangyo nga dili na patawagon pag-usab ang mga Saksi ni Jehova?

Angayng tahoron ang kagustohan sa maong tawo. Ang usa ka gipetsahang nota uban ang ngalan sa maong tawo angayng ibutang diha sa sobre nga gibutangan sa teritoryo aron ang mga magmamantala dili makatawag sa maong numero sa umaabot. Kas-a sa usa ka tuig, ang listahan sa mga tawong naghangyo nga dili na kita motawag angayng susihon pag-usab. Ubos sa pagdumala sa magtatan-aw sa pag-alagad, ang may kasinatian, mataktikanhon nga mga magmamantala mahimong itudlo sa pagkontak sa maong mga tawo aron sa pagtino kon sila dili pa ba gihapon gustong tawgan sa mga Saksi ni Jehova.​—Tan-awa ang “Pangutana” sa Hunyo 1994 nga Atong Ministeryo sa Gingharian.

◼ Unsay atong isulti ngadto sa usa ka answering machine?

Ayawg ibutang ang telepono. Hinunoa, paghupot ug maayong pagkaandam nga sinulat nga tubag nga imong mabasa diha sa telepono. Tingali makaingon ka: “Anugon nga wala ko ikaw maabti sa balay. Kon buot nimong makabati ug binase-sa-Bibliya nga paghisgot sa [ulohan sa pakigpulong publiko], palihog tambong sa Kingdom Hall sa mga Saksi ni Jehova. Gidapit ang publiko. Wala gayoy himoong pagpangolekta.” Dayon isulti nga klaro ang adlaw ug oras sa tigom, ug ihatag ang adres sa kalye o isaysay pag-ayo ang nahimutangan sa Kingdom Hall.