Imantala ang Ngalan ug mga Pakiglabot ni Jehova

¹ “Magpasalamat kamo kang Jehova, sangpita ang iyang ngalan, ipahibalo taliwala sa mga katawhan ang iyang mga pakiglabot. . . . Magmaya unta ang kasingkasing niadtong nagapangita kang Jehova.” (Sal. 105:​1, 3) Ang salmista nga misulat nianang mga pulonga nakakaplag ug dakong personal nga kalipay sa pagsulti sa uban bahin kang Jehova ug sa iyang “mga pakiglabot.” Unsang mga pakiglabot? Sa walay duhaduha kadtong maylabot sa mahimayaong pagkahari sa Diyos ug sa “maayong balita sa iyang pagluwas.”​—Sal. 96:​2, 3; 145:​11, 12.

² Samtang nagsingabot kita sa 2001 nga panahon sa Memoryal, aduna kitay daghang katarongan nga magmaya bahin sa mga pakiglabot ni Jehova kanato. Sa unsang paagi? Sa walay duhaduha, ang Panihapon sa Ginoo mao ang labing dakong kasaulogan sa tuig alang sa tanang matuod nga mga Kristohanon. Walay laing okasyon nga sama niini maylabot sa kahinungdanon, katuyoan, o pamaagi. Kini maoy panahon alang kanatong tanan nga hinumdoman ang gibuhat ni Jehova ug ni Jesus sa pagtaganag paagi alang sa atong kaluwasan. Dili ikahibulong nga sulod sa panahon sa Memoryal, kinaiyanhon natong dahomon nga makita ang pagbul-og sa kalihokan diha sa pag-alagad sa kanataran, samtang atong imantala ang “maayong balita sa kaluwasan”!

³ Mag-oksilyare Payunir Ka Ba? Sa miaging Abril, 19,704 ang nagpatala ingong oksilyare nga mga payunir. Sa Mayo, 13,775 ang nagpatala. Sa Marso ang gidaghanon maoy 6,125. Niining tuiga, puwede ba natong himoon pag-usab ang Marso, Abril, ug Mayo nga linaing mga bulan sa gipadakong kalihokan sa ministeryo? Ang Marso adunay lima ka Sabado, ug ang Abril adunay lima ka Dominggo. Pinaagi sa pagplano nga mag-alagad sa tibuok nga mga adlaw sa mga hinapos sa semana, daghang magmamantala nga nagtrabaho sa bug-os-panahon nakakaplag nga ang pag-oksilyare payunir ilang maarangan. Aron makab-ot ang kinahanglanon nga 50 ka oras sa usa ka bulan, ang oksilyare payunir nagkinahanglan nga moaberids ug mga 12 ka oras kada semana. Tagda pag-ayo ang gisugyot nga mga eskedyul diha sa kahon sa panid 4. Ang usa ba niini mohaom sa imong mga kahimtang? Kon dili, lagmit makagama ka ug imong kaugalingong eskedyul aron makaoksilyare payunir niining Marso, Abril, ug Mayo.

⁴ Ang mga ansiyano angayng mosugod na karon sa pagtukod ug kadasig ug pagpaluyo alang sa gipadakong kalihokan sa pag-alagad. Sa miaging tuig sa usa ka kongregasyon diin ang tanang ansiyano ug ministeryal nga mga alagad nagpatala ingong mga oksilyare payunir, 64 sa 121 ka magmamantala ang nagpayunir sa Abril! Nalipay usab ang kongregasyon nga makita ang unom ka di-bawtismadong mga magmamantala nga misugod sa pagtaho sa Marso ug Abril. Sa pagkamatuod, kini mao ang labing maayong panahon alang sa mga bata ug sa mga bag-ohan sa pagpangutana sa mga ansiyano kon sila ba takos nga mosugod sa pagpakig-ambit diha sa publikong kalihokan sa pagpamatuod.

⁵ Dugang Paningkamot Mohatag ug mga Panalangin: Ang mga kongregasyon nga nagpahimutang ug linaing mga tumong ug naghimog dugang paningkamot nakatagamtam ug daghang panalangin. Ang pipila ka kongregasyon tingali maghatag ug pasiugda ilabina sa pagkobre sa talagsa rang makobrehan nga teritoryo, nga magsentro sa pagtagad bahin sa kapiliang mga paagi sa pagpamatuod, o magpasiugda sa pagpamatuod pinaagig telepono​—usa ka epektibong paagi sa pagkontak sa mga wala-sa-balay ug mga pumoluyo nga lisod maabot.

⁶ Ang dili maayong panglawas o pagkatigulang angay bang magpugong kang bisan kinsa gikan sa pagkalangkit kutob sa maarangan diha sa pag-alagad? Dili sa tanang kaso. Pananglitan, usa ka 86-anyos nga sister kinsa adunay kanser nag-oksilyare payunir sa Abril bisan pa sa panghupong sa iyang mga bitiis. Ang pagpamatuod pinaagig telepono ang nagpaposible kaniya sa pagbaton ug bug-os nga pagpakig-ambit sa pag-alagad, nga gipadak-an ang iyang pagdayeg kang Jehova. Kini adunay makapalihok nga epekto kaniya ug sa kongregasyon.

⁷ Pangandam Pag-ayo Alang sa Memoryal: Niining tuiga ang Memoryal matunong sa Abril 8. Sanglit kini maoy Dominggo, posible gayod nga daghan ang motambong niini. Tingali maabot nato ang kinadaghanang motambong sukad masukad kon buhaton nato ang atong bahin pinaagi sa (1) pagtambong nato mismo ug (2) pagdapit sa uban nga moduyog kanato sa Memoryal. Kinsa ang angay natong dapiton?

⁸ Susiha sa imong personal nga mga talaan sa pag-alagad sa kanataran ang mga ngalan niadtong nagpakitag pipila ka interes sa kamatuoran, bisan pag tingali dili ka regular nga nagaduaw kanila. Duha o tulo ka semana una pa sa Memoryal, isentro ang pagtagad sa pagduaw kanilang tanan dala ang imbitasyon sa Memoryal. Kon itugot sa imong mga kahimtang, itanyag ang pagtaganag transportasyon alang kanila nga gustong motambong.

⁹ Sa pipila ka kongregasyon, wala magamit ang tanang pinatik nga mga imbitasyon sa Memoryal. Ang mga sekretaryo sa kongregasyon kinahanglang magseguro nga ang tanang imbitasyon mabatonan sa igong panahon aron maapod-apod. Tingali buot nimong imakenilya o isulat nga hapsay ang oras ug dapit alang sa Memoryal diha sa ubos sa imbitasyon. O tingali imong ilakip ang usa ka handbill nga nagpakita sa adres sa Kingdom Hall kon didto himoa ang inyong Memoryal. Ingong pahinumdom, sa kasagarang mga kahimtang ang mga imbitasyon sa Memoryal kinahanglang personal nga itunol ngadto sa tagbalay.

¹⁰ Hinumdomi ang mga Di-aktibo: Makapalipay sa dihang ang usa ka estudyante sa Bibliya magpahinungod sa iyang kaugalingon ngadto kang Jehova ug magpasimbolo niini pinaagi sa pagtuslob sa tubig. Sa matag tuig, bisan pa niana, ang pipila sa atong taliwala miurong sa pagpakig-uban kanato, ug sila mihunong sa pagpakigsulti sa uban bahin sa ngalan ug mga pakiglabot ni Jehova. Aduna kitay maayong katarongan nga mabalaka. Bisan tuod kadaghanang mga di-aktibo wala mobiya sa kamatuoran, sila tingali mihunong na sa pagsangyaw tungod sa pagkaluya, personal nga mga suliran, o ubang mga kabalaka sa kinabuhi. (Mat. 13:​20-22) Kadtong anaa sa huyang nga kahimtang sa espirituwal nagkinahanglan ug tabang aron makabalik sa kongregasyon sa dili pa sila malamoy sa sistema ni Satanas. (1 Ped. 5:8) Niining panahon sa Memoryal buot natong mohimog linaing paningkamot sa pagtabang sa tanang takos nga mga di-aktibo nga malangkit pag-usab sa pagsangyaw sa maayong balita.

¹¹ Ang sekretaryo sa kongregasyon angayng magpaalinggat sa mga tagdumala sa pagtuon sa libro kang bisan kinsa nga di-aktibo diha sa ilang grupo. Ang Komite sa Pag-alagad sa Kongregasyon manguna sa paghikay sa mga duaw nga iya sa magbalantay aron duawon ang tanang di-aktibo. Kon matino nga makaayo sa indibiduwal ang personal nga pagtuon sa Bibliya, ang komite sa pag-alagad kinahanglang mohukom kon kinsay labing angay nga modumala sa pagtuon. Bisan tuod dili tingali kinahanglanon nga dumalahon ang pagtuon sa dugayng panahon, ang usa nga natudlo sa pagdumala niana mahimong motaho sa oras, mga balikduaw, ug pagtuon sa Bibliya.

¹² Sa miaging Abril usa ka sister nga gikan sa pagpamalaybalay mitanyag ug mga magasin ngadto sa batan-ong lalaki diha sa dalan. Ang lalaki mibutyag nga ang iyang asawa maoy usa ka di-aktibong Saksi. Nangutana siya kon asa nahimutang ang Kingdom Hall ug gidapit ang sister sa pagduaw kaniya ug sa iyang asawa. Ingong resulta, ang magtiayon mitambong sa sunod tigom ug miuyon sa usa ka pagtuon sa Bibliya.

¹³ Pangandam Alang sa Gipadakong Kalihokan! Ang salmista kinsa mipahayag nga kinahanglan natong imantala ang ngalan ug mga pakiglabot ni Jehova midugang: “Pag-awit kamo kaniya, pag-awit ug mga pagdayeg kaniya, magmahunahunaon kamo sa tanan niyang katingalahang mga buhat. Magpasigarbo kamo sa iyang balaan nga ngalan.” (Sal. 105:​2, 3) Ipasundayag nato ang atong pagkamahunahunaon sa dakong ngalan ni Jehova ug sa iyang “katingalahang mga buhat” pinaagi sa pagdugang sa atong mga paningkamot diha sa ministeryo, nga maghimo niini nga kinalabwang panahon sa Memoryal sukad!

[Kahon sa panid 4]

Lainlaing mga Paagi sa Pag-eskedyul ug 12 ka Oras Kada Semana Aron Makaoksilyare Payunir

Adlaw Oras

Lunes 1 2 – –

Martes 1 – 3 –

Miyerkoles 1 2 – 5

Huwebes 1 – 3 –

Biyernes 1 2 – –

Sabado 5 4 3 5

Dominggo 2 2 3 2

Total: 12 12 12 12

Ang usa ba niini nga mga eskedyul mosaler kanimo? Kon dili, nganong dili ka maghimog imong kaugalingong eskedyul?