Dugangi ang Imong Kalipay sa Pagsangyaw
1 Ang kalipay sa pagpaambit sa maayong balita—nakasinati ka ba niana diha sa imong ministeryo? Kon dili kita mag-amping, ang daotang kalibotan libot kanato makapahimo kanatong walay kaisog bahin sa pagsangyaw, nga maghanaw sa atong kalipay. Ang pagsangyaw sa di-masanongong teritoryo makapaluya usab kanato. Unsang praktikal nga mga lakang ang atong himoon sa pagpauswag sa atong kalipay diha sa pagsangyaw?
2 Magmapositibo: Ang padayong paghupot ug positibong tinamdan makatabang gayod. Ang usa ka paagi sa pagbuhat niana mao ang pagpamalandong sa atong dakong pribilehiyo ingong “mga isigkamagbubuhat sa Diyos.” (1 Cor. 3:9) Si Jesus usab nagauban kanato sa pagpalampos niining buluhatona. (Mat. 28:20) Ug siya nagpaluyo kanato uban sa panon sa mga manulonda. (Mat. 13:41, 49) Nan, makaseguro kita nga ang atong mga paningkamot gitultolan sa Diyos. (Pin. 14:6, 7) Busa bisan unsa pay reaksiyon sa mga tawo sa atong buluhaton, ang langitnong sanong mao ang dakong pagmaya!
3 Pangandam Pag-ayo: Ang maayong pagpangandam makaamot usab sa atong kalipay. Ang pagpangandam alang sa ministeryo wala magkinahanglan ug daghang buluhaton. Mokabat lang kanag pipila ka minutos sa pagkonsiderar sa puntong hisgotan gikan sa bag-ong mga magasin o sa tanyag nga literatura sa bulan. Pagpilig presentasyon gikan sa “Kon Unsay Isulti Labot sa mga Magasin,” diha sa Atong Ministeryo sa Gingharian, o tan-awa ang librong Nangatarongan alang sa epektibong introduksiyon. Kon napugngan ka sa usa ka pagsupak nga kasagarang ipatungha sa mga tagbalay, pangandam ug tubag nga magpahayag ug apresasyon sa ilang komento ug ipunting ang pagtagad ngadto sa makapukaw-sa-interes nga ulohan. Ang librong Nangatarongan makatabang kaayo sa paghimo niana. Ang paggamit niining maong mga tabang mohatag kanatog pagsalig nga atong gikinahanglan sa pagsangyaw nga malipayon.
4 Pag-ampo nga Kinasingkasing: Ang pag-ampo mahinungdanon alang sa dumalayong kalipay. Sanglit gihimo nato ang buluhaton ni Jehova, kita kinahanglang mangamuyo kaniya alang sa iyang espiritu, nga ang usa ka bunga niini mao ang kalipay. (Gal. 5:22) Si Jehova mohatag kanato ug kusog aron makapadayon sa pagsangyaw. (Filip. 4:13) Ang pag-ampo bahin sa atong ministeryo makatabang kanato sa paghupot ug hustong panglantaw sa dihang mahibalag nato ang di-maayong mga kasinatian. (Buh. 13:52; 1 Ped. 4:13, 14) Kon mobati kitag kahadlok, ang pag-ampo makatabang kanato nga padayong magmaisogon ug malipayon.—Buh. 4:31.
5 Paghimog mga Kahigayonan: Siyempre, ang atong ministeryo mas malipayon sa dihang makakaplag kitag mga tawo ug makapamatuod kanila. Ang pag-usab-usab sa imong eskedyul sa pagpamalaybalay sa lainlaing oras, tingali sa haponhapon o sa kilumkilom na, mahimong moresulta ug dugang kalamposan. Mahibalag nimo ang mga tawo sa matag higayon nga molakaw ka diha sa dalan, mamalit, mosakay ug bus, o mosuroy sa parke. Nganong dili andamon ang usa ka mubong pagsugod sa panaghisgot ug manguna sa pagduol niadtong morag mahigalaon? O mahimong aduna kay trabaho o nagtungha sa publikong eskuylahan, diin makapakigsulti ka sa uban adlaw-adlaw. Tingali makahigayon ka sa pagpamatuod pinaagi sa yanong pagpatunghag usa ka ulohan sa Kasulatan nga makapukaw ug interes. Bisan hain niining mga paningkamota makaamot ug dako sa pagpauswag sa sukod sa kalipay sa usa diha sa pagsangyaw.
6 Sanglit ang kalipay motabang kanato sa paglahutay, pagkahinungdanon gayod nga padayong huptan kana! Sa pagbuhat niana, maani nato ang dakong ganti sa dihang matapos na kining dili-na-gayod-masubli nga buluhaton. Ang maong kalaoman mismo makapauswag sa atong kalipay diha sa pagsangyaw.—Mat. 25:21.