Usa ka Madasigong Tubag!
1 Ang Kristohanong mga pamilya bisan asa nagpahayag sa ilang madasigong pagpabili sa video nga Young People Ask—How Can I Make Real Friends? Usa ka amahan sa Tinipong Bansa nag-ingon nga human makatan-aw niini, ang iyang mga anak nga lalaki hilom nga nanglingkod—sila nakasabot ug nakauyon sa tanan diha sa video! Usa ka taho gikan sa Malawi nag-ingon nga ang batan-ong mga igsoong lalaki ug babaye didto nakasabot ug nakauyon usab niana tungod kay ilang nasinati ang samang mga pagpit-os gikan sa ilang mga katalirongan sa eskuylahan. Usa ka amahan nga taga-Alemanya nag-ingon bahin sa video: “Giisip nako kini nga tubag sa akong mga pag-ampo.” Usa ka batan-ong babaye miingon: “Salamat sa inyong pagpahinumdom kanako nga si Jehova nagtagad gayod kanako.” Usa ka ansiyano sa New Zealand mitaho: “Nakatabang kini sa usa sa among batan-ong mga babaye nga mahibalik sa dalan sa kinabuhi.” Usa ka hingkod nga babayeng minyo mitan-aw niana ug miingon: “Pagkamaayo unta kon ang kada batan-on nga anaa sa kamatuoran makakita niining videoha ug matukmod sa paghimo sa kamatuoran nga iya gayod!” Mga pamilya, nganong dili ninyo tan-awon kini pag-usab? Human niana, dungang hisgoti ang mosunod nga mga pangutana.
2 Introduksiyon: Unsa ang matuod nga higala?—Prov. 18:24.
3 Mga Babag sa Panaghigalaay: Unsaon nimo pagbuntog ang pagbating sinalikway? (Filip. 2:4) Nganong kinahanglan kang magmaandam sa pagpauswag sa imong personalidad, ug kinsa ang makatabang kanimo sa paghimo niana? Unsay makamugna ug mga kahigayonan aron makabaton ug dugang mga higala, ug asa man sila makaplagan?—2 Cor. 6:13.
4 Panaghigalaay Uban sa Diyos: Sa unsang paagi maugmad nimo ang relasyon uban kang Jehova, ug nganong takos ang paningkamot niana? (Sal. 34:8) Kinsa ang labing maayong makapalig-on sa imong panaghigalaay uban sa Diyos?
5 Ang Sayop nga Matang sa mga Higala: Kinsa ang daotang mga kauban? (1 Cor. 15:33) Sa unsang paagi ang sayop nga mga higala motultol sa usa ngadto sa espirituwal nga kadaotan? Unsay gitudlo sa asoy sa Bibliya bahin kang Dina nganha kanimo?—Gen. 34:1, 2, 7, 19.
6 Usa ka Modernong-Adlaw nga Drama: Sa unsang paagi ang kamingaw nakaapektar kang Tara? Giunsa niya pagpakamatarong ang iyang pagpakig-uban sa kalibotanong mga batan-on? Ngadto sa unsang mga kapeligrohan nga sila nagladlad kaniya? Nganong wala mamatikdi sa iyang mga ginikanan ang kapeligrohan nga iya untang naagoman, apan uban sa unsang tinamdan nga ilang natabangan siya nga maulian sa espirituwal? Sa unsang paagi napamatud-ang tinuod nga higala ang usa ka sister nga payunir ngadto kang Tara? Nganong kinahanglang patalinghogan sa mga Kristohanon ang Proverbio 13:20 ug Jeremias 17:9? Unsang hinungdanong leksiyon ang nakat-onan ni Tara?
7 Konklusyon: Unsang mga leksiyon ang imong nakat-onan gikan niini nga video? Sa unsang paagi magamit mo kini sa pagtabang sa uban?—Sal. 71:17.