Usa ka Video nga Seryosong Pagatagdon
1 Pipila ka tuig kanhi, usa ka batan-ong brader ang nawad-ag interes sa kamatuoran, ug nawala ang iyang relasyon kang Jehova tungod sa impluwensiya sa gipili niyang mga higala. Dayon giluwatan ang video nga Young People Ask—How Can I Make Real Friends? Siya misulat: “Nakahilak ako samtang sublisubli nakong gitan-aw ang video. Akong gipasalamatan si Jehova tungod sa maong tabang sa hustong panahon.” Ang video nakapalihok kaniya sa paghimog dagkong mga kausaban sa iyang kinabuhi ug sa pagbatog hustong matang sa mga higala. Siya midugang: “Tataw kaayo nga nahibalo kamo kon unsay nakaimpluwensiya sa mga batan-on karon.” Mga ginikanan ug mga batan-on, nganong dili ninyo tan-awon pag-usab ang maong video sa inyong sunod nga pamilyahanong pagtuon ug hisgotan ang mga pangutana sa mosunod nga mga parapo?
2 Introduksiyon: Unsa ang usa ka tinuod nga higala?—Prov. 18:24.
3 Mga Babag sa Panaghigalaay: Sa unsang paagi imong mabuntog ang pagbati nga walay labot? (Filip. 2:4) Nganong kinahanglan kang andam sa pagpauswag sa imong personalidad, ug kinsay makatabang kanimo sa paghimo niana? Unsay magbukas ug mga kahigayonan aron ikaw makabaton ug mas daghang higala, ug asa sila makaplagan?—2 Cor. 6:13.
4 Panaghigala Uban sa Diyos: Sa unsang paagi imong maugmad ang suod nga relasyon uban kang Jehova, ug nganong ang pagbuhat niana takos paningkamotan? (Sal. 34:8) Kinsa ang labing maayong makapalig-on sa imong pakighigala uban sa Diyos?
5 Ang Sayop nga Matang sa mga Higala: Kinsa ang daotang mga kauban? (1 Cor. 15:33) Sa unsang paagi ang sayop nga mga higala makadaot sa espirituwalidad sa usa? Unsay gitudlo sa asoy sa Bibliya bahin kang Dina nganha kanimo?—Gen. 34:1, 2, 7, 19.
6 Usa ka Modernong-Adlaw nga Drama: Sa unsang paagi naapektohan si Tara sa kamingaw? Sa unsang paagi iyang gipakamatarong ang iyang pagpakig-uban sa kalibotanong mga batan-on? Ila siyang gipasulod sa unsang mga kapeligrohan? Nganong wala maila sa iyang mga ginikanan ang kapeligrohan nga iyang nasudlan, apan uban sa unsang tinamdan nga ilang gitabangan siya nga maulian sa espirituwal? Sa unsang paagi gipakita sa usa ka payunir nga sister nga siya tinuod nga higala ni Tara? Nganong kinahanglang bantayan sa mga Kristohanon ang Proverbio 13:20 ug ang Jeremias 17:9? Unsang hinungdanong leksiyon ang nakat-onan ni Tara?
7 Konklusyon: Unsang mga leksiyon ang imong nakat-onan gikan niining videoha? Unsaon nimo paggamit kini aron matabangan ang uban?—Sal. 71:17.